„დღევანდელმა საფინანსო-საბიუჯეტო კომიტეტის სხდომამ დაგვანახა, რომ ჩვენი სახელმწიფო უწყებები შეკრულები არიან ბანკის ხელმძღვანელობასთან. ამბობენ, რომ ვერც ეროვნული ბანკი ვერ დაარეგულირებს პროცესს და ვერც ჯანდაცვის სამინისტრო. ამასობაში კი 400 000 პენსიონერი „ლიბერთი ბანკის“ ხახაშია ჩაგდებული,“ - განაცხადა „ხალხისთვის“ ლიდერმა ანა დოლიძემ პარლამენტის საფინანსო-საბიუჯეტო კომიტეტის სხდომაზე დასწრების შემდეგ, სადაც საპენსიო სესხებზე დაწესებულ საპროცენტო განაკვეთთან დაკავშირებით იმსჯელეს.

„ფაქტია, რომ ჩვენ ქვეყანაში ათწლეულების განმავლობაში მიდის გატყავება ყველაზე უფრო მოწყვლადი ფენის, ჩვენი პენსიონერების. ორი პენსიონერიდან ერთს აქვს საპენსიო სესხი, რომელიც დაახლოებით ორჯერ უფრო ძვირია მისთვის, ვიდრე  საშუალო ასაკის ადამიანისთვის. პენსიონერი ყოველთვიური პენსიიდან დიდ თანხას ტოვებს „ლიბერთი ბანკში“, ისე რომ შეიძლება მას საარსებო მინიმუმიც კი არ დარჩეს ჯიბეში. დღეს ნათლად დავინახეთ, რომ ჩვენი სახელმწიფო უწყებები შეკრულები არიან ბანკის ხელმძღვანელობასთან, დავრწმუნდით, რომ სახელმწიფოს არავითარი სურვილი არ აქვს, რომ აიღოს ამ სიტუაციაზე პასუხისმგებლობა. ეროვნული ბანკი ამბობს, რომ ეს არის ჯანდაცვის სამინისტროს პასუხისმგებლობა, ჯანდაცვის მინისტრის მოადგილე, ეროვნული ბანკის პასუხისმგებლობაზე საუბრობს. მთავარი კი ის არის, რომ ჩვენს ქვეყანაში 400 000 პენსიონერი დღეს „ლიბერთი ბანკის“ ხახაშია ჩაგდებული და საკუთარი პენსიის, ჩვენ მიერ გადახდილი გადასახადების დიდ ნაწილს ტოვებს სწორედ „ლიბერთი ბანკში“, მაშინ როდესაც არსებობს ყველანაირი საშუალება, რომ პენსიონერებს დღეს ჰქონდეთ ზუსტად ისეთივე საპროცენტო განაკვეთი, როგორიც აქვთ ჩვეულებრივ ადამიანებს“ - აღნიშნა ანა დოლიძემ.

ანა დოლიძის თქმით, ძალინ მნიშვნელოვანია, რომ ამ თემაზე ყინული დაიძრა და პროცესები აუცილებლად უნდა გაგრძელდეს. 

„უმთავრესია, რომ დღეს ეს შეხვედრა მოეწყო, ეს არის უპრეცედენტო შემთხვევა, როდესაც სხდომაზე მოიყვანეს „ლიბერთი ბანკის“ ხელმძღვანელი, რომელმაც თუნდაც მინიმალურად, მაგრამ ისაუბრა საპენსიო სესხის თემაზე. თუკი ამას მოჰყვება შემდგომი აქციები, შეხვედრა „ლიბერთი ბანკთან“, წნეხი ჯანდაცვის სამინისტროზე, შესაძლოა შედეგად პენსიონერებს მოექცნენ არა როგორც გასატყავებელ, საექსპლუატაციო მასალას, არამედ როგორც ჩვეულებრივ ადამიანებს,“ - განაცხადა დოლიძემ.

საფინანსო-საბიუჯეტო კომიტეტის სხდომის დაწყების წინ, „ხალხისთვის“ ლიდერმა ანა დოლიძემ მხარდამჭერებთან ერთად პარლამენტის უკანა შესასვლელთან აქცია მოაწყო. აქციის მონაწილეებმა პენსიონერებისთვის 40%-იანი საპროცენტო განაკვეთის მინიმუმ განახევრება მოითხოვეს.