"სახელმწიფო ვერ ახერხებს დაარეგულიროს კერძო ბაღების საკითხი. ამ ბიზნესის უკან რამდენიმე ათასი ადამიანი დგას, რომელებიც საფრთხის ქვეშ არიან, დაკარგონ სამუშაო ადგილები და ელემენტარული საარსებო საშუალება. კერძო ბაღები, რომლებიც სერიოზულ კონტრიბუციას ახდენენ ბიუჯეტში, გაკოტრების წინაშე დგას. ამიტომ, მოვუწოდებთ ეკონომიკის სამინისტროს, 5 ივლისამდე პასუხი გასცეს და შემოიღოს რეგულაცია კერძო ბაღებთან დაკავშირებით, რომელიც მათ მუშაობის საშუალებას მისცემთ," - განაცხადა მოძრაობა "ხალხისთვის" ლიდერმა ანა დოლიძემ კერძო ბაღების გაერთიანების წარმომადგენლებთან ერთად გამართულ სპეციალურ ბრიფინგზე.
დოლიძის თქმით, კერძო ბაღების წარმომადგენლებმა არაერთხელ მიმართეს სახელმწიფო უწყებებს, თუმცა უშედეგოდ.
"მოგეხსენებათ, პანდემიის პერიოდში დაწესებული შეზღუდვების გამო გაჩერდა უამრავ დაწესებულებას, მათ შორის კერძო ბაღები. თუმცა ივნისის დასაწყისიდან თითქმის ყველა დაწესებულება ამუშავდა. მოქალაქეები გავიდნენ სამსახურებში და ამ დროს მშობლები პრობლემის წინაშე დარჩნენ - მათ არ იციან, სად წაიყვანონ მცირეწლოვანი შვილები. გარდა ამ პრობლემისა, კერძო ბაღებში დასაქმებულია რამდენიმე ათასი ადამიანი, რომლებიც მილიონობით ლარს იხდიან გადასახადის სახით საქართველოს ბიუჯეტში. პანდემიის დროს დაწესებული შეზღუდვების გამო, სექტორი დღემდე გაჩერებულია და არც არავინ ეუბნებათ როდის და რა ფორმით ამუშავდებიან. ამ ხნის მანძილზე კერძო ბაღების წარმომადგენლებმა მიმართეს ყველა სახელმწიფო დაწესებულებას, არაერთ ტელევიზიას, თუმცა ხელისუფლებას პასუხი კვლავ არ აქვს. ისინი ითხოვენ ნებართვას გახსნაზე და კონკრეტულ რეგულაციებს, რომელსაც დაემორჩილებიან" - განაცხადა ანა დოლიძემ.
მოძრაობა „ხალხისთვის“ ლიდერი მოუწოდებს ეკონომიკის სამინისტროს დროულად მოახდინოს რეაგირება და კერძო ბაღებთან დაკავშირებით დააწესონ შესაბამისი რეგულაციები.
"მოვუწოდებთ ეკონომიკის სამინისტროს, 5 ივლისამდე, გასცეს პასუხი და შეიმუშავონ რეგულაციები კერძო ბაღებთან დაკავშირებით. რეგულაცია, რომელიც მისცემს საშუალებას მცირე ბიზნესს გააგრძელოს მუშაობა და კვლავ დაასაქმოს ათასობით მოქალაქე," - განაცხადა ანა დოლიძემ.
კერძო ბაღების გაერთიანების წარმომადგენლის მაია ღვინჯილიას თქმით, ბაღების გახსნასთან დაკავშირებით და რეგულაციების მიმართებით გაურკვევლობის გამო კარგავენ თანამშრომლებს და აღსაზრდელებს, რაც მათ მძიმე მდგომარეობაში აყენებთ.
"ჩვენს გაერთიანებაში გაწევრიანებულია 60-მდე კერძო საბავშვო ბაღი, რაც გულისხმობს 1500 თანამშრომელს და 6000-მდე აღსაზრდელს. ჩვენი საქმიანობა არის განწირული. ვკარგავთ თანამშრომლებს, აღსაზრდელებს და, ფაქტობრივად, ვართ გაკოტრების წინაშე. მივმართეთ ძალიან ბევრ დაწესებულებას - ჯანდაცვის და ეკონომიკის სამინისტროს, თუმცა დღემდე არანაირი პასუხი არ მიგვიღია. თანახმა ვართ გამოცხადებულ ნებისმიერ რეგულაციას დავემორჩილოთ. ასევე მინდა ჯანდაცვის სამინისტრომ გაითვალისწინოს, რომ ექვსი თვის განმავლობაში მოზარდის სახლში ყოფნა უარყოფითად აისახება მათ განვითარებაზე", - განაცხადა მაია ღვინჯილიამ.