დიდუბე-ჩუღურეთის დამოუკიდებელი კანდიდატი, მოძრაობა “ხალხისთვის” ლიდერი ანა დოლიძე „ქართული ოცნება – დემოკრატიული საქართველოს” თავმჯდომარე ბიძინა ივანიშვილს მიმართავს.

მისი თქმით, საარჩევნო კანპანიის დროს მმართველი პარტიის მხარდამჭერების მხრიდან აქტივისტების მისამართით ხორციელდება მუქარა, ზეწოლა და ძალადობა, რაზეც პასუხისმგებელი თავად ბიძინა ივანიშვილია.

“ნებისმიერი მცდელობა მუქარის, ზეწოლის და ძალადობის, აქტივისტებზე და საარჩევნო კამპანიის მონაწილეებზე პირდაპირ უკავშირდება “ქართულ ოცნებას” და მის ლიდერს ბიძინა ივანიშვილს. გუშინ, საარჩევნო კამპანიის დროს, აშკარად გამოჩნდა, რომ თბილისის უბნებში თარეშობენ კანონგარეშე მყოფი ჯგუფები, რომლებიც ქმნიან “შიშის ზონებს” პირველ რიგში იქ მაცხოვრებელთათვის. მათი მთავრი მიზანია, არჩევნებში მონაწილე პირებმა ვერ მოახერხონ მოქალაქეებთან კონტაქტი და ვერ ჩაატარონ საარჩევნო კამპანია.

დიდუბე-ჩუღურეთში რამდენიმე ადგილას შეგვხვდნენ ამგვარი ჯგუფები. თუმცა დავასახელებ წერეთლის N105 – ში მომხდარ ფაქტს. ამ კორპუსის ეზოში თავს დაგვესხნენ ალკოჰოლური ან ნარკოტიკული ზემოქმედების ქვეშ მყოფი პირები. კარგად ორგანიზებული კანონგარეშე მყოფი ჯგუფები მოდიოდნენ ჩვენთან და გვეუბნებოდნენ, რომ არ მოგვცემდნენ უფლებას გავსაუბრებოდით ხალხს. რაც უფრო საზარელია, უბნებში შექმნილი “შიშის ზონები” აშინებენ მეზობლებს, რომლებიც გაბედავენ დალაპარაკებას.

ჩვენს თვალწინ მათ საშინელი აგრესიული მუქარა განახორციელეს იქ მყოფ მოქალაქეებზე, აიძულეს ისინი შეეწყვიტათ საუბარი და გაგვცლოდნენ. პირობას გაძლევთ, ყველა ასეთი ფაქტი იქნება აღრიცხული და გახმაურებული და თითოეულ შემთხვევაზე პირდაპირ აგებს პასუხს “ქართული ოცნება”და მისი ლიდერი ბიძინა ივანიშვილი.

ეს არის ფორმა რისი მეშვეობითაც “ქართული ოცნება” აპირებს ჩაატაროს არჩევნები. სამწუხაროდ, აშკარად ჩანს, რომ საარჩევნო კამპანიის ოფიციალურად დაწყების შემდეგ ასეთი “შიშის ზონები” კიდევ უფრო გააქტიურდებიან და მათი მუქარის ზონებიც უფრო გამკაცრდება. ამიტომ მივმართავ ბიძინა ივანიშვილს, დროულად მოახდინოს რეაგირება, წინააღმდეგ შემთხვევაში მას არ ექნება საშუალება და უფლება თქვას, რომ არაფერი იცის ასეთი ფაქტების შესახებ,” – განაცხადა ანა დოლიძემ საგანგებოდ გამართულ ბრიფინგზე.