მსოფლიო ახალი საფრთხის წინაშე დგას, ბოლო პერიოდში ისედაც მომრავლებულ ვირუსებს შესაძლოა ჩინეთიდან ახალი ამოუცნობი მომაკვდინებელი ვირუსის ტალღაც შეემატოს. ჩინეთში ახალი უცნობი ვირუსით დაინფეცირებულთა რიცხვი მკვეთრად გაიზარდა, 20 იანვრის მდგომარეობით, ექიმებმა 198 დადასტურებული შემთხვევა დაარეგისტრირეს.
„Deutsche Welle" წერს, რომ ამოუცნობ ვირუსულ ინფექციას სამი ადამიანის სიცოცხლე ემსხვერპლა, ამის შესახებ სააგენტოს, ჩინეთის ქალაქ ვუჰანის მუნიციპალურ ჯანმრთელობის კომიტეტში განუცხადეს, სადაც პირველად აღმოაჩინეს აღნიშნული უცნობი ვირუსი.
გავრცელებული ინფორმაციით, ამჟამად ჩინეთის საავადმყოფოებში ამოუცნობი ვირუსის გამო, 170 ადამიანი მკურნალობს, 35 პაციენტის მდგომარეობა სტაბილურად მძიმეა, ხოლო 9 ადამიანი კრიტიკულ მდგომარეობაშია. ამავე ვირუსისგან განკურნებული 25 ადამიანი კი საავადმყოფოებიდან უკვე სახლში გაწერეს. გარდა ამისა, 126-მა პაციენტმა დაავადების მსუბუქი ფორმა გადაიტანა.
ჩინეთის ხელისუფლების ოფიციალური დადასტურებით, 60 ადამიანი, რომელებმაც ქვეყნის სამედიცინო დაწესებულებებს მიმართეს, დღემდე უცნობი ვირუსით არიან დაავადებულნი. თუმცა, ექსპერტები ვარაუდობენ, რომ დაავადებულთა რიცხვი გაცილებით მეტია და ის შესაძლოა 1700-ს აჭარბებდეს.
თავად ამოუცნობი ვირუსის შესახებ, ცნობილია ის, რომ ის კორონავირუსების ჯგუფს მიეკუთვნება. ახალი ვირუსის პირველი შემთხვევები ქალაქ ვუჰანის ზღვის პროდუქტების საბითუმო ბაზარში დაფიქსირდა, სადაც ზღვის პროდუქტებთან ერთად, მღრღნელები, ფრინველები, კურდღლები და ქვეწარმავლებიც იყიდება, სავარაუდოდ კი ამათგან ერთ-ერთი სახეობა ვურუსული ინფექციის წყარო გახდა.
მსოფლიო ჯანდაცვის ორგანიზაციის ინფორმაციით, კორონავირუსი 2013 წელს საუდის არაბეთში დაფიქსირდა. ვირუსის შემთხვევები ასევე გამოვლენილია იორდანიაში, ყატარში, ტუნისსა და ევროპაში.
ახალი უცნობი ვირუსი იწვევს ხველებას, სიცხესა და ფილტვების ანთებას. გასული წლის დეკემბერში ვირუსის შემთხვევა ჩინეთში, შემდეგ კი ტაილანდში დაფიქსირდა.
იაპონიაში მცხოვრებ 30 წლის ჩინელს ოფიციალურად დაუდგინდა კორონავირუსი, რომელიც, ცოტა ხნით უხანში იყო ჩასული, რის შედეგადაც კორონავირუსის პირველი შემთხვევა ოფიციალურად უკვე იაპონიაშიც დადასტურდა. ამის შესახებ ინფორმაციას Kyodo News-ი ავრცელებს.
შეერთებული შტატები უცნობი კორონავირუსით დაავადებულთა გამოსავლენად ქვეყნის სამ აეროპორტში ჩინეთიდან შესული მგზავრების შემოწმებას იწყებს. აშშ-ის დაავადებათა კონტროლისა და პრევენციის ცენტრების ინფორმაციით, სან ფრანცისკოს, ნიუ-იორკისა და ლოს-ანჯელესის აეროპორტებში ჩინეთის ქალაქ ვუჰანიდან შემოსული მგზავრების სკრინინგი დაიწყება. მათი თქმით, ვირუსი ჩინეთის გარდა, იაპონიასა და ტაილანდშიც გავრცელდა.
ამის გამო, ჯანდაცვის მსოფლიო ორგანიზაციამ განგაშის უმაღლესი დონე გამოაცხადა. ბრიტანელი სპეციალისტები ვირუსის სწრაფად გავრცელებას არ გამორიცხავენ. ჩინეთის ჯანდაცვაში კი მიიჩნევენ, რომ პანდემიის საფრთხე ჯერ არ არსებობს, რადგან ახალ ვირუსს ადამიანები ერთმანეთს ვერ გადადებენ, ამისათვის ვირუსმა სახე უნდა იცვალოს.
საქართველოში დაავადებათა კონტროლის ცენტრში აცხადებენ, რომ პნევმონიის გამომწვევ ახალ ვირუსს ნაცნობი რესპირაციული დაავადებების მსგავსი სიმპტომები აქვს. ამ ეტაპზე ცენტრში ვირუსთან დაკავშირებით ჯანდაცვის მსოფლიო ორგანიზაციის რეკომენდაციებს ელოდებიან, მანამდე კი აეროპორტებში მგზავრების სამედიცინო შემოწმების აუცილებელი არ არის.
გაზეთი „რეზონანსი“