ამჟამად, კორონავირუსთან დაკავშირებით სიტუაცია საქართველოში სხვა ქვეყნებთან და არა მხოლოდ მეზობელ ქვეყნებთან შედარებით, უფრო უსაფრთხო და სტაბილურია, - ამის შესახებ დაავადებათა კონტროლის ეროვნული ცენტრის ხელმძღვანელმა Atlantic Council-ის ვებინარზე განაცხდა.
„ამჟამად 879 ლაბორატორიულად დადასტურებული შემთხვევა გვაქვს. აქედან 161 აქტიური. გამოჯანმრთელების კოეფიციენტი დაახლოებით 80%-ია და სამწუხაროდ, 14 ადამიანი გარდაიცვალა. ამჟამად კარანტინში, და ეს ერთ-ერთი მთავარი ზომაა, რომლითაც ვირუსს ვებრძვით, 2 795 ადამიანია“, - განაცხადა გამყრელიძემ.
მან ვებინარზე ასევე ილაპარაკა იმაზეც, თუ როგორ მიაღწია საქართველომ წარმატებას კორონავირუსთან ბრძოლაში. „თუ რა არის ჩემი გადმოსახედიდან ვირუსთან ბრძოლაში საქართველოს წარმატების ფორმულა? ეს იყო დროული და სწრაფი მრავალსექტორული რეაგირება. 6 იანვრიდან დავიწყეთ მზადება ამ პანდემიისთვის, როდესაც დაავადებათა კონტროლის ცენტრმა ჯანდაცვის სამინისტროს შეატყობინა, რომ რაღაც უჩვეულო ხდებოდა ჩინეთში და რომ ჩვენ უნდა მოვემზადოთ პანდემიისთვის. ამიტომაც, ჩვენ დავიწყეთ საგანგებო ოპერაციების ცენტრის აქტივირება. ჩვენ მუდმივად ვახდენთ რესპირატორული ინფექციების მონიტორინგს. ნაბიჯ-ნაბიჯ ვახორციელებდით ზომებს. ძირითადად შემზღუდავს. შევაჩერეთ ფრენები ჩინეთთან, ირანთან, შემდეგ იტალიასთან. საქართველოში ჩამოსული ყველა უცხოელი 2-კვირიან კარანტინს გადიოდა. კარანტინის რეჟიმში ასევე ვაწარმოებდით გამოკვლევებს.
22 მარტს მთავრობამ საგანგებო მდგომარეობა გამოაცხადა. შემზღუდავი ზომებისა, ცნობიერების ამაღლების კამპანიისა და ტესტირებების მეშვეობით მოხერხდა გავრცელების შეკავება. მულტისექტორული რეაგირება ასევე წარმატებული იყო. სექტორებს შორის თანამშრომლობა საკმაოდ კარგი იყო. პრემიერ-მინისტრმა სწრაფად მიიღო გადაწყვეტილება და იმპლემენტაცია საკმაოდ წარმატებული აღმოჩნდა. ვფიქრობ, ამ წარმატების საიდუმლო ერთ წინადადებაშია: ადრეული მომზადება“, - აღნიშნა გამყრელიძემ.
Imedinews.ge