პარლამენტში არაგადამდებ დაავადებათა პრევენციისა და კონტროლის ახალი ეროვნული სტრატეგიის პრეზენტაცია გაიმართა.

დოკუმენტი ჯანდაცვის კომიტეტს დაავადებათა კონტროლის ეროვნული ცენტრის ხელმძღვანელმა ამირან გამყრელიძემ გააცნო.

„არაგადამდები დაავადებები ავადობის, შრომისუუნარობის და სიკვდილიანობის მთავარი მიზეზია როგორც საქართველოში, ისე გლობალურად. ქვეყანაში საერთო ავადობის არანაკლებ სამი მეოთხედი და სიკვდილიანობის 94 პროცენტი არაგადამდებ დაავადებებზე მოდის. არაგადამდები დაავადებები ნაადრევი სიკვდილიანობის მთავარი მიზეზიც არის. ამ საკითხმა განსაკუთრებული ყურადღება მიიპყრო ახლა, კოვიდპანდემიის პერიოდში, ვინაიდან კოვიდით გამოწვეული სიკვდილიანობის 80-85% მოდის სწორედ იმ ადამიანებზე, სადაც იყო არაკონტროლირებადი არაგადამდები დაავადებები. აღსანიშნავია, რომ არაგადამდებ დაავადებათა მნიშვნელოვანი ნაწილის განვითარების თავიდან აცილება შესაძლებელია მათი გამომწვევი რისკ-ფაქტორების შემცირებით და სოციალურ, გარემო თუ სხვა დეტერმინანტებზე ზემოქმედებით. ამასთან ერთად, შესაძლებელია, უკვე დამდგარი ამ ჯგუფის ბევრი დაავადების სათანადო მკურნალობა და მართვა, რათა შენარჩუნებულ იყოს ცხოვრების მაღალი ხარისხი, თავიდან იქნას აცილებული გართულებები და ნაადრევი სიკვდილიანობა“, - განაცხადა ამირან გამყრელიძემ.

მისი თქმით, სტრატეგიის მოქმედების არეალი გაფართოებულია - ნაცვლად ოთხი არაგადამდები დაავადებისა: გულ-სისხლძარღვთა დავადებები, კიბო, შაქრიანი დიაბეტი და ქრონიკული რესპირატორული დაავადებები და ოთხი რისკის ფაქტორისა - თამბაქო, ალკოჰოლის ჭარბი მოხმარება, დაბალი ფიზიკური აქტივობა, არაჯანსაღი კვება, დამატებით მოიცავს ვალდებულებებს ჰაერის დაბინძურების შემცირების და ფსიქიკური ჯანმრთელობისა და კეთილდღეობის ხელშეწყობის მიმართულებით.

გამყრელიძის განცხადებით, აუცილებელია ეროვნული შესაძლებლობების და საერთაშორისო თანამშრომლობის გაძლიერება არაგადამდები დაავადებების პრევენციისა და მართვის მიზნით და ამ პროცესში მნიშვნელოვანია არა მარტო ჯანდაცვის, არამედ ყველა სექტორის ჩართულობა, მათ შორის, პარლამენტის.

დოკუმენტი აღწერს არსებულ პრევენციის მექანიზმებს, განსაზღვრავს მომავალი 5 წლის პრიორიტეტებს, იძლევა რეკომენდაციებს, რომელიც ეფექტური და მისაწვდომია ქვეყნისთვის.

IPN.GE