ჩვენ არ გვაქვს დამშვიდების საფუძველი, ირგვლივ მდგომარეობა ისეთია, რომ ყოველწუთს შეიძლება გამწვავდეს ეპიდემიოლოგიური ვითარება, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
როგორც ამირან გამყრელიძემ აღნიშნა, მიუხედავად იმისა, რომ ზოგიერთ ქვეყნებში შემსუბუქების პოლიტიკა დაიწყო, მათ შორის ევროპის ქვეყნებში, გლობალურად სიტუაცია არასახარბიელოა.
„2013 ქვეყანაში არის დაფიქსირებული ინფექცია, ყველაზე მნიშვნელოვანია, რომ აშშ-ს შემდეგ უკვე ე.წ რენკიგნი რასაც ჰქვია, შეიცვალა. მეორე თუ იყო გარკვეული პერიოდი იტალია, შემდეგ ბრიტანეთი და ა.შ. ახლა მეორე ადგილზე გადაინაცვლა რუსეთმა, რაც ჩვენთვის განსაკუთრებით საყურადღებოა გავრცელების თვალსაზრისით, რადგან ჩვენი უშუალო ჩრდილოელი მეზობელია. ასევე ძალიან მნიშვნელოვანი ნიშანია, რომ მესამე ადგილზე გადავიდა ბრაზილია, სამხრეთ ნახევარსფერო, სადაც უკვე აცივების პერიოდი, ანუ ზამთრის პერიოდი იწყება, ეს სწორედ ინდიკატორია, რომ ჩვენ გარკვეულწილად უნდა ვემზადოთ აცივების პერიოდისთვის. ჩინეთი, საიდანაც დაიწყო ეს პანდემია, დღეს მეცამეტე ადგილზეა. ბევრმა ქვეყანამ, გავრცელების, სიკვდილიანობის მაჩვენებლით გადაასწრო, ერთადერთი ზოგადად გლობალურად დამაიმედებელია ის, რომ სიკვდილიანობის მაჩვენებელი ბოლო ერთ თვის განმავლობაშ, სადღაც 7 პროცენტზე ადიოდა გლობალურად, ჩამოსულია 6,4%-ზე და არის ტენდენცია შემცირების, ანუ ჯანდაცვის სისტემები უფრო მომზადებულია და მეტი ადამიანის გადარჩენა ხერხდება“, – განაცხადა ამირან გამყრელიძემ.
მისივე თქმით, გადარჩენისა და გამოჯანმრთელების მაჩვენებელი გლობალურად დღეს არის სადღაც 38%, რაც შეეხება საქართველოს, ეს პროცენტი არის 68, რაც პოზიტიური ინდიკატორია.
„ძალიან საყურადღებოა ჩვენი სამეზობლო. ოთხივე ქვეყანა, რომელთანაც ჩვენ საზღვარი გვაქვს მხედველობაში გვაქვს, რუსეთი, სომხეთი, აზერბაიჯანი და თურქეთი, ყველგან სიტუაცია არასახარბიელოა. შედარებით უფრო დაწყნარების ტენდენცია გამოჩნდა თურქეთში, მაგრამ სამწუხაროდ ზრდა არის სერიოზული რუსეთში. ის თავის გავრცელებით მეორეა მსოფლიოში, ასევე სომხეთში და ასევე აზერბაიჯანში. ამიტომ ჩვენ არ გვაქვს დამშვიდების საფუძველი. ირგვლივ მდგომარეობა ისეთია, რომ ყოველწუთს შეიძლება გამწვავდეს, თუ ჩვენ სწრაფად გადავგდამთ ნაბიჯებს იგივე რომელიმე ქვეყანასთან საზღვრის გახსნის და ა.შ. სწრაფად შეიძლება მივიღოთ ეპიდაფეთქება., ეს არის ხაზგასასმელი, რომ ჩვენ ძალიან სკულპუოზურად უნდა ვაკვირდებოდეთ ჩვენს ირგვლივ მყოფ ქვეყნებს, მათ შორის იმ ქვეყნებს, რომლებთანაც ჩვენ ეკონომიკური ინტენსიური ურთიერთობა გვაქვს. მაგალითად ბელარუსი, სადაც პოსტსაბჭოთა ქვეყნებში რუსეთის შემდეგ ყველაზე მეტია ინფექცია. უკრაინაში, ცენტრალური აზიის ქვეყნებში, მოლდოვაში, ყველგან სიტუაცია გაცილებით უფრო რთულია“, – განაცხდა ამირან გამყრელიძე.
პირველი არხი