„ამერიკის შეერთებული შტატები საქართველოს სტიმულირების პოლიტიკიდან იძულების პოლიტიკაზე გადადის“, - ასე აფასებს პოლიტოლოგი გია ხუხაშვილი აშშ-ის კონგრესის წარმომადგენელთა პალატის საბიუჯეტო კომიტეტის მიერ დარეგისტრირებულ კანონპროექტს, რომელიც 2021 წელს საქართველოსთვის დახმარების სახით მისაღები თანხის 15 პროცენტის გაყინვას გულისხმობს. დოკუმენტის მიხედვით, შესაძლოა დაახლოებით 20 მლნ დოლარის გაცემა შეჩერდეს იქამდე, სანამ სახელმწიფო დეპარტამენტი არ დაადგენს, რომ საქართველოში ინსტიტუტები დამოუკიდებელია და  ქვეყანაში უცხოური ბიზნესი დაცულია.  ხუხაშვილი აცხადებს, რომ მსგავსმა კრიტიკულმა შეფასებებმა სისტემური ხასიათი მიიღო, რაც მისი თქმით შემაშფოთებელია.

„ამერიკის შეერთებულ შტატებში საქართველოს ხელისუფლებას უნდობლობას უცხადებენ დემოკრატიული ინსტიტუტების განვითარების თვალსაზრისით და შემოაქვთ კონკრეტული მექანიზმები იმისა, რომ მოხდეს ხელისუფლების იძულება რომ  დემოკრატიულ კალაპოტში გააგრძელოს მოძრაობა.  აქ 15 პროცენტს იმდენად არ აქვს მნიშვნელობა, რამდენადაც იქმნება პოლიტიკური პრეცედენტი. ეს ფაქტობრივად სასანქციო ნორმაა, შეიძლება ვიღაცას ფინანსური პასუხისმგებლობას არ აკისრებენ, მაგრამ ესაა ნორმა, რომლის მნიშვნელობა სანქციის მნიშვნელობის ტოლფასია. ეუბნებიან ხელისუფლებას რომ არ ენდობიან და შეიძლება ითქვას, რომ ყვითელი შუქი აუნთეს. მმართველ გუნდში როდესაც აცხადებენ, რომ ცალკეული კონგრესმენების აზრს არსებით მნიშვნელობა არ აქვს, ეს არის სიბრიყვე ან უბრალოდ ვირეშმაკობა. იმიტომ, რომ საქართველოს საკითხით რამდენიმე კონგრესმენი ინტერესდება. ნურავინ წარმოიდგენს, რომ 400 ზე მეტ კონგრესმენს ღამე არ ძინავს საქართველოზე დარდით.

საქართველოზე მუშაობს რამდენიმე კონგრესმენი და ფაქტობრივად ისინი განსაზღვრავენ საქართველოსთან მიმართებაში პოლიტიკას, დანარჩები რუკაზეც ვერ იპოვიან საქართველოს, ზოგ ქვეყნის სახელიც შეიძლება არ ქონდეს გაგებული. სამწუხაროდ ჩვენთან იმდენი მანკიერება დაგროვდა, სურვილის შემთხვევაშიც ამ ყველაფრის გამოსწორება ძალიან რთულია, თუმცა სასურველია გაითვალისწინონ ის რეკომენდაციები რომელზეც უკვე დიდი ხანია ჩვენი პარტნიორები საუბრობენ“, - განაცხადა გია ხუხაშვილმა.

 ბაჩო ადამია