Amazon-ის შვილობილი კომპანია Zoox ელექტრონული უპილოტო რობოტაქსის აამოქმედებს. ეს იქნება მსოფლიოში პირველი უპილოტო ელექტროტაქსი, რომელიც ჩვეულებრივ საქალაქო გზებზე იმოძრავებს.
რობოტაქსის შემქმნელი კომპანია ონლაინ-რითეილერმა 2020 წელს იყიდა და ამ ეტაპზე Zoox თავისი გამოგონების მასშტაბური დანერგვისთვის ემზადება.
პირველად უპილოტო ელექტროტაქსი ლას-ვეგასში ამუშავდება. გარდა ამისა ახალი ტექნოლოგიის ტესტირება სიეტლში და სან-ფრანცისკოში იგეგმება. Zoox-ის დამფუძნებლის და ტექნიკური დირექტორის ჯესი ლევინსონის თქმით, მისი კომპანია იქნება პირველი, რომელიც ელექტრონულ რობოტაქსის სრულფასოვნად აამოძრავეს ქალაქების გადატვირთულ ქუჩებში.
„ხმაურიანი პრეზენტაციების ნაცვლად ჩვენ აქცენტს კომპანიის განვითარებაზე ვაკეთებთ, იმისთვის, რომ ჩვენი ამბიციები და ბიზნეს-შესაძლებლობები ერთმანეთს ემთხვეოდეს. ეს ფართომასშტაბიანი მუშაობისთვის მზადებას და კადრების ოპტიმალურად გამოყენებას გულისხმობს. სწორედ ამით ვართ დღეს დაკავებულები“ - განაცხადა ლევინსონმა.
Zoox-ს რამდენიმე ძლიერი კონკურენტი ჰყავს - Waymo, რომელიც Google-s მფლობელი კომპანიის Alphabet-ს შექმნილია, Cruise (ინვესტიციები მიიღო General Motors-ისგან) და Argo AI (აფინანსებენ Ford და Volkswagen).
ყველა ეს კომპანია იბრძვის იმისთვის, რომ ელექტრონული თვითმავალი ტაქსები ამერიკის ქალაქების ქუჩებში პირველმა დანერგოს.
ამ ეტაპზე Waymo მართავს საშუალო ზომის ავტონომიური ელექტროტაქსების სერვისს ქალაქ ფინიქსში და ფილიალის გახსნას სან-ფრანცისკოში გეგმავს. თუმცა, ორივე შემთხვევაში სერვისი მოქმედებს მხოლოდ შეზღუდულ, მკვეთრად განსაზღვრულ ზონებში და ძირითად გზებზე ჯერ არ ვრცელდება.
ამ დროისთვის არც Zoox და არც მისი კონკურენტები რობოტაქსის სრულფასოვან საზოგადოებრივ ტრანსპორტად ჩამოყალიბების ვადებზე არაფერს ამბობენ.
როგორც ცნობილია, ილონ მასკი რობოტაქსის სრულფასოვან ამოქმედებას 2022 წელს გეგმავდა, თუმცა, გაცხადებულ მიზანს ვერ მიაღწია. უკვე 2021 წელი სრულდება, Tesla-ს რობოტაქსი კი ამერიკის ქალაქების ქუჩებში ჯერაც არ გამოჩენილა.
კომპანია Zoox კალიფორნიის ქალაქ ფოსტერ-სიტიში დაარსდა, ამავე შტატში, ქალაქ ფრიმონტში მდებარეობს მისი ფუტურისტული ავტომობილების მწარმოებელი მცირე ქარხანა.
ამჟამად კომპანიაში 1500 ადამიანი მუშაობს და ხელმძღვანელობა შტატების შემცირებას არ გეგმავს, თუმცა, ძველ თანამშრომელთა ნაწილი კომპანიას ტოვებს.
„ჩვენ მათ ძალიან ვაფასებთ იმის გამო, რომ ჩვენს გვერდით პირველივე ეტაპზე იყვნენ. ალბათ მათთვის კომპანიის განვითარების პირველი ნაბიჯები უფრო საინტერესო და მრავალფეროვანი იყო, ვიდრე ის, სადაც ჩვენ ამჟამად ვიმყოფებით. დღევანდელი ფაზა უფრო მოსაწყენი და მონოტონურია, თუმცა, სწორედ დღეს ჩვენ გვაქვს შანსი ავაშენოთ კომპანია,რომელიც რეალურ პროდუქტს ქმნის და საზოგადოებას ცვლის“ - განაცხადა ლევინსონმა.
წყარო: forbes.ru
ავტორი: თენგიზ აბლოთია