ჯეფ ბეზოსის კომპანია Amazon აუდიო–კონტენტის გადაცემის სერვისის შექმნაზე მუშაობს, მათ შორის პოდკასტების, ცოცხალი კონცერტების და რადიო–ეთერების. ამის შესახებ გამოცემა Axios წერს.
გამოცემის წყაროები ამბობენ, რომ Amazon მნიშვნელოვან ინვესტიციას ახორციელებს Clubhouse-ს მსგავსი აუდიო ტრანსლაციის პლატფორმის შესაქმნელად. Amazon ამ ახალ სერვისს პოტენციურად თავისი Alexa-ს და საფირმო ჭკვიანი დინამიკების დამატებით ფუნქციად განიხილავს.
გამოცემის წყაროები ირწმუნებიან, რომ ცნობილი არტისტების კონცერტების პირდაპირ ეთერში ტრანსლირების მიზნით Amazon–მა უკვე დაიწყო მოლაპარაკებები ხმის ჩამწერ მსხვილ სტუდიებთან. მომხმარებლები ცოცხალ კონცერტებზე წვდომას Amazon Music საკუთარი ანგარიშებიდან შეძლებენ.
სერვისი, ძირითადად, ცოცხალი მუსიკის ტრანსლირებისთვის იქმნება, თუმცა კომპანია პოდკასტებისა და რადიოს ფორმატებსაც განიხილავს.
Amazon–ის გარდა მსგავს პროექტზე Facebook-იც მუშაობს. სოციალურმა ქსელმა ჯერ კიდევ აპრილში განაცხადა, რომ დაემატა პოდკასტები, აუდიო კომენტარები, მოკლე აუდიო კლიპების გაცვლის სერვისი და ჩაშენებული ფლეიერი.