მსოფლიოში ონლაინ გაყიდვების მზარდი მაჩვენებლის მიუხედავად, გლობალურმა პანდემიამ ისევე, როგორც სხვა სექტორზე საერთაშორისო ამანათებზეც მოახდინა გავლენა. თუმცა ამ ეტაპზე საქართველოში ამანათების გადამზიდავ კომპანიებს წინა წელთან შედარებით გზავნილებზე მოთხოვნის პროცენტული სხვაობის დასახელება უჭირთ.

რა გავლენა მოახდინა კორონავირუსის პანდემიამ საერთაშორისო გზავნილებზე, რა ძირითადი პრობლემები გამოიკვეთა და რომელ პროდუქტებზე იყო ძირითადად მოთხოვნა, ამ და სხვა კითხვებით კომერსანტი ამანათების გადამზიდავ ქართულ კომპანიებს დაუკავშირდა.

როგორც „კომერსანტს“ „საქართველოს ფოსტის“ საზოგადოებასთან ურთიერთობის მენეჯერმა ნუკა ბაინდურაშვილმა განუცხადა, პანდემიის პერიოდში საერთაშორისო გზავნილებთან მიმართებაში გარკვეული პრობლემები გამოიკვეთა.

„პანდემიამ განსაკუთრებული გავლენა საერთაშორისო მიმართულებაზე იქონია, თუმცა კარანტინის პერიოდში ადგილობრივი გზავნილების რაოდენობა საგრძნობლად გაიზარდა. ჩვენ სპეციალური პროდუქტიც კი შევქმენით -  „სახლიდან სახლში“, რათა სხვადასხვა რეგიონში ჩარჩენილ ადამიანებს ერთმანეთთან კომუნიკაცია არ დაეკარგა და შეღავათიან ფასებში ამანათების გაგზავნა მოეხერხებინათ.

ზოგიერთ ქვეყანაში ამანათები შეაჩერეს. მაგალითად ჩინეთიდან და სხვა რიგი ქვეყნებიდან მარტში გამოგზავნილი ამანათები ახლა ჩამოდის. დამუშავებისა და ჩამოსვლის პროცესიც საკმაოდ გახანგრძლივდა, ტრანზიტზე დამატებით სადეზინფექციო სამუშაოები ტარდებოდა როგორც სახლმელეთო, ასევე ავიაგადაზიდვების შემთხვევაში“, - აცხადებს ნუკა ბაინდურაშვილი.

როგორც ნუკა ბაინდურაშვილი აღნიშნავს შემომავალმა საერთაშორისო გზავნილებმა თითქმის 60%-ით იკლო.

„ერთადერთი უწყება ვიყავით, რომელსაც მუშაობა არ შეუწყვიტავს, მაგრამ მარტიდან ივნისის ჩათვლით საერთაშორისო მიმართულებით, როგორც კომერციული ტვირთების, ასევე პირადი გზავნილების შემცირება მოხდა.

საფოსტო სერვისების მიმართულებით პერსონალურ ამანათებზე მოთხოვნა ბევრად გაზრდილი იყო, ვიდრე წერილობით კორესპონდენცია. ასევე, შიდა ბაზარზე რიგი მაღაზიების ელექტრონულ კომერციაზე გადასვლაც დადებითად აისახა კომპანიაზე და გაზარდა ამანათების რაოდენობა. ამ ეტაპზე, თანდათანობით ვუბრუნდებით წინა წლის ანალოგიურ პერიოდს“, -განმარტავს ნუკა ბაინდურაშვილი.

ანალოგიური პრობლემა შეექმნა კომპანია Camex.ge-საც. როგორც კომპანიის ბიზნესის განვითარების დირექტორმა გიგა სეთურიძემ აღნიშნა, პანდემიის დაწყებიდან პრიველი ორი თვე გამოწერების კუთხით კრიტიკული ვარდნა იყო.

საკმაოდ დიდი ვარდნა იყო წონებში, მაგრამ კომპანიამ რამდენიმე ათეული თანამშრომლის შესანარჩუნებლად ყველაფერი გააკეთა. განსაკუთრებულად მძიმე პირველი ორი თვე იყო, როდესაც ყველაფერი ჩაიკეტა და მსოფლიო პანიკამ მოიცვა. სწორედ ამ დროს გამოწერები დაახლოებით 70-80%-ით შემცირდა.

იმ დროს როცა კომპანიას ყოველწლიური ზრდა ჰქონდა, წინა წლებთან შედარებით წელს 40%-იანი კლებაა. ეს დიდი სხვაობაა, რაც არა მარტო პანდემიამ, არამედ დოლარის კურსის ზრდამაც გამოიწვია. — განმარტავს გიგა სეთურიძე.

InexGroup-ის დირექტორის გიორგი კაპანაძის განცხადებით განსაკუთრებული ზიანი მათ კომპანიას არ მიადგა, რადგან მუშაობას კარანტინის პერიოდშიც აქტიურად აგრძელებდნენ.

„ჩვენ მუშაობის უფლება თავიდანვე გვქონდა. შესაბამისად, კომენდატის საათი და სხვა შეზღუდვა არ შეგვხებია. ზოგადად, პანდემიის პერიოდში (აპრილი-მაისი) გამოწერების რაოდენობა დაახლოებით 10-15 %-ით შემცირდა, თუმცა ეს მნიშვნელოვანი მაჩვენებელი არ არის.

ჩვენ ორი ტიპის ამანათები გვაქვს -  გამოწერილი და პერსონალური. პერსონალური ამანათები იმ პერიოდში ფაქტობრივად გაჩერდა, რადგან იტალია და საბერძნეთი დაკეტილი იყო, ადამიანები გარეთ გამოსვლას ვერ ახერხებდნენ. თუმცა მაისის დასაწყისში როგორც კი ქვეყნები გაიხსნა, სიტუაცია რადიკალურად შეიცვალა და რეალურად იმაზე დიდი რაოდენობით წამოვიდა ამანათები ვიდრე პანდემიამდე იყო.

რაც შეეხება გამოწერებს, სტაბილურად გრძელდება, ის 10 %-იანი ჩავარდნა იყო, თუმცა შემდეგ ისევ მოიმატა. რეალურად უარყოფითი ფინანსური  გავლენა ჩვენს კომპანიაზე არ ყოფილა.

ზოგადად, ყოველწლიურად, ივლისისა და აგვისტოს თვეები პასიური პერიოდია, თუმცა აგვისტოს ბოლოს, როდესაც ადამიანები უკვე სექტემბრისთვის იწყებენ მზადებას შეკვეთების რაოდენობა ისევ მატულობს. ამ მიმართულებით შეგვიძლია ვთქვათ, რომ იგივე ტენდენციაა რაც სხვა წლებში იყო“, - აცხადებს გიორგი კაპანაძე.

როგორც გიორგი კაპანაძე აღნიშნავს, შეკვეთებმა უმეტესწილად ჩინეთიდან იმატა და რაიმე კონკრეტულ პროდუქტზე მოთხოვნა არ გაზრდილა.

„ამ პერიოდში შეკვეთებმა უფრო ჩინეთიდან მოიმატა, სხვა ქვეყნებთან მიმართებაში სტაბილური ვითარებაა, თუმცა ამას პანდემიას არ ვუკავშირებთ. პროდუქტების კუთხით მოთხოვნა არ შეცვლილა. ძირითადად, შეკვეთების 80% ისევ ტანსაცმელზე, ფეხსაცმელსა და საყოფაცხოვრებო ნივთებზეა.“ - განმარტავს გიორგი კაპანაძე.

 ანი ცარციძე