კორონავირუსის გამო შეჩერებული ფრენების, დახურული საწარმოებისა და საფონდო ბირჟებზე ინდექსების ვარდნის პარალელურად „კომერსანტი“ დაინტერესედა რა გავლენა ექნება კორონავირუსის შედეგად    მსოფლიოში განვითარებულ ეკონომიკურ კრიზისს საქართველოზე? გლობალური პრობლემების მიუხედავად, ამ ეტაპზე საქართველოში პანიკის საფუძველს ვერ ხედავენ ქრთველი იმპორტიორები და აცხადებენ, რომ საკვებ პროდუქტსა და ჰიგიენის საშუალებებზე დეფიციტი და ფასის ზრდა მოსალოდნელი არ არის.

მას შემდეგ რაც საქართველოში კორონავირუსის შემთხვევა ოფიციალურად დადასტურდა, მოსახლეობის ნაწილმა სუპერმარკეტებში პროდუქტების მომარაგება დაიწყო.„დისტრიბუტორთა ასოციაციის“ ხელმძღვანელი ივა ჭყონია აცხადებს,რომ ამ ეტაპზე  პანიკის საფუძველი არ არსებობს, არც საკვებ და არც ჰიგიენურ პროდუქტებზე. ამ მხრივ კომპანიებს მარაგები გააჩნიათ. 

„ჩვეულებრივ რეჟიმში მუშაობენ კომპანიები, როგორც შარშან ამ დროს მუშაობდნენ. საზღვრები ღიაა პროდუქტის შემომტანი კომპანიებისთვის და მათ პროდუქტის შემოტანაზე შეფერხება არ ჰქონიათ. ტექნიკისა და ტანსაცმლის გარეშე დროებით გაძლებს ადამიანი, მაგრამ სარეცხი საშუალებები და საკვები ყოველდღიურად სჭირდება და ამ მხრივ შეფერხება რომ იყოს ამას თავად იგრძნობდნენ. არც პროდუქტის მომარაგების შემთხვევები ფიქსირდება.“-ამბობს ივა ჭყონია.

ივა ჭყონია არც პროდუქტზე ფასის შესაძლო ზრდას აანონსებს, მისი თქმით, მსოფლიო ბაზარზე არსებობს დიდი კონკურენციაა და თუ ერთ კონკრეტულ პროდუქტზე გაჩნდა დეფიციტი მისი ჩანაცვლება სხვა ქვეყნის  პროდუქტითაა შესაძლებელი.

„თუ ერთი კონკრეტული პროდუქტი არ შემოვა და რომელიმე მწარმოებელი ქვეყანა შექმნილი მდგომარეობის გამო წარმოებას გააჩერებს,  ალტერნატივა არსებობს, ბაზარი დიდია კონკურენციაც დიდია და თუ ერთ სარეცხ საშუალებას ვერ იყიდი, მეორეთი ჩაანაცვლებ. ასევეა საკვების შემთხვევაშიც. იმ შემთხვევაში თუ ჩვენმა ძირითადმა მომწოდებლებმა საიდანაც პროდუქტით ვმარაგდებით, თურქეთი, უკრაინა რუსეთი,  შეაჩერეს წარმოება და მოგვიხდა სხვა ქვეყნებიდან შემოტანა, პროდუქტს დაემატება მხოლოდ ტრანსპორტირების ხარჯი, მხოლოდ ამ შემთხვევაში შესაძლოა პროდუქტი გაძვირდეს, თუმცა, უმნიშვნელოდ. მინდა გითხრათ, რომ  ჯერ ამის საფრთხეც არ არსებობს. „-ამბობს ჭყონია.

„პროდუქტის დეფიციტის ან ფასის ზრდის წინაპირობას ვერ ხედავს იმპორტიორი კომპანია „შარმ-ტრეიდინგის“ დირექტორი ვახტანგ საძაგლიშვილი.

„მშვიდი ვითარება არ არის მსოფლიოში და შეიძლება ხვალ მეტად დამძიმდეს მდგომარეობა, ვერ გავაკეთებთ ამის პროგნოზს, თუმცა, დღეს რომ პანიკის არანაირი საფუძველი არ გვაქვს ამას თამამად ვიტყვი. თუ მდგომარეობა უფრო დამძიმდა და რომელიმე ქვეყანამ კონკრეტული პროდუქტის წარმოება შეაჩერა, ეს რა თქმა უნდა დროებით შეზღუდავს პროდუქტს.დიდ მწარმოებლებს ბევრ ქვეყანაში აქვთ თავიანთი წარმოება და სხვა ქვეყანაზე მოხდება ბაზრის გადაწყობა .“-ამბობს ვახტანგ საძაგლიშვილი.

შეგახსენებთ, რომ ახალი კორონავირუსის გამო, რომელიც ჩინეთში გაჩნდა და 25-მდე ქვეყანაში გავრცელდა,სრულად ან ნაწილობრივ დახურეს საკუთარი დაწესებულებები ჩინეთში ისეთმა კორპორაციებმა, როგორიცაა Apple, Google, IKEA, Burger King, Hyundai, Swatch. აშშ, ევროპისა და აზიის სახელმწიფოები ახალი რეგულაციებით ცდილობენ აღკვეთონ ვიზიტები ჩინეთიდან. 40-ზე მეტმა ავიაკომპანიამ - მათ შორის, American, Delta, United, Lufthansa and British Airways -- გააუქმა ფრენები ჩინეთის მიმართულებით.

ნათია ლომიძე