კორონავირუსის პანდემიის გამო, საზღვრების ჩაკეტვამ და ფრენების გადადებამ, ტურიზმზე დამოკიდებული კომპანიების შეჩერება გამოიწვია. ერთ-ერთი ასეთია, კომპანია „ბორანია“, რომელიც მომხმარებელს როგორც ღია კაფეს, ასევე სუფრის თანხლებით მტკვარზე ტივით გასეირნებას სთავაზობს.
როგორც კომპანიაში აცხადებენ, ბორანი ამ ეტაპზე მხოლოდ ძალიან მცირე რაოდენობის შეკვეთებზე მუშაობს.
„ჩათვალეთ, რომ პანდემიამ 100% ჩაძირა ყველა ტურიზმზე დაფუძნებული ბიზნესი. ამ ეტაპზე მხოლოდ შეკვეთებზე ვმუშაობთ, ისიც ძალიან მცირე რაოდენობით თვეში 1-2 ათკაციანი შეკვეთა გვაქვს, ღია კაფე და ვერანდა დაკეტილია, მხოლოდ ტივზე არის თვეში 1-2 შეკვეთა.
სანამ პანდემია დაიწყებოდა ძალიან დატვირთულები ვიყავთ, მთელი სტაფი სრული დატვირთვით მუშაობდა, მე ეხლა სახლში ვზივარ და სახელმწიფოს დახმარებას ორას ლარს ვიღებ, მაგრამ მოგეხსენებათ ეს ორასი ლარი არაფერი არ არის. ჩვენ ტერიტორიაზე რომ გაიაროთ ნახავთ რომ მაგდები ალაგებულია.“ — აცხადებენ ბორანის წარმომადგენლობაში.
პანდემიის გამო, ბორანმა თანამშრომლების რაოდენობაც შეამცირა. მათი თქმით, ზამთარში ისედაც მცირე რაოდენობით მუშაობენ, თუმცა ტურისტები ამ სეზონზეც იყვნენ და იყენებდნენ მათ მომსახურებას.
„ახლა წინასწარ თუ დაჯავშნის ვინმე, 2-3 ადამიანი გამოვდივართ და ვამზადებთ ტურს, თანამშრომლებიც შემცირებულია.
რეკლამა კი გვაქვს გაშვებული, მაგრამ მოგეხსენებათ საქართველოში არ არის მაგის მომხმარებელი, ჩვენ ზამთარში ისედაც ვამცირებთ კადრებს, მაგრამ ტუტრისტები ზამთარშიც არიან და სარგებლობენ ჩვენი სერვისით“, — აღნიშნავენ კომპანიაში.
თაკო კვაჭანტირაძე