ფეხსაცმლის 5 მაღაზია მქონდა და მათგან სამი დაიწვა, რაც შეეხება დაზღვევას, მგონი აქ არავის არაფერი გვაქვს დაზღვეული— ვარკეთილის შერეული ბაზრის ერთ-ერთი მოვაჭრე, რომელიც ხანძრის ჩაქრობის პროცესში ადგილზე იმყოფება კომერსანტთან აცხადებს, რომ ამ ტერიტორიაზე მოვაჭრეებს ფართები და საქონელი თითქმის არავის დაუზღვევია.
ხანძარს სარემონტო სამუშაოებს ვუკავშირებთ, რომელიც ღამის საათებში მიმდინარეობდა. ადმინისტრაციის მოთხოვნა იყო, რომ 7 საათის მერე გაკეთებულიყო ნებისმიერი ცეცხლსაშიში სამუშაოები.ამასობაში ბაზარიც ჩაიფერფლა — ვარკეთილის ბაზრობაზე ფართის ერთერთი მფლობელი კომერსანტთან ხანძრის მიზეზებზე საუბრობს.
ადმინისტრაციას არანაირი დაზღვევა არ შემოუთავაზებია ჩვენთვის, პირიქით, საკითხი დაგვისვეს, რომ ჭერი და კედლები უნდა ყოფილიყო თეთრი. ბოლო გადადებული სახსრები გამოვიყენეთ იმაში, რომ ყველაფერი წესრიგში ყოფილიყო და რემონტი გაგვეკეთებინა. ასეთი მოთხოვნა ჰქონდათ წინააღმდეგ შემთხვევაში, უნდა დაგვეტოვებინა ადგილი და ვერ ვიმუშავებდით. ამ რემონტისთვის სესხიც კი ავიღეთ ბანკიდან,— განმარტავს დაზარალებული.
ამჟამად ბაზრობის ტერიტორიაზე ძლიერი დაკვამლიანებაა.
შეგახსენებთ, რომ ვარკეთილში ბაზრობას ხანძარი ერთ საათზე მეტია გაუჩნდა. მეხანძრეთა ბრიგადები ცეცხლის ჩაქრობას ამ დრომდე ცდილობდნენ, თუმცა უშედეგოდ. ხანძარი გავრცელდა მიმდებარე შენობაზე, რომელიც ასევე ბაზრის ტერიტორიას განეკუთვნება.
კომერსანტის ინფორმაციით ხანძრის ჩაქრობას 20 ამდე სახანძრო მანქანით ხორციელდება. პროცესს ადგილობრივები და ბაზრობის ფართების მფლობელები ადევნებენ თვალს.
აღსანიშნავია, რომ ხანძრის ზონასთან ახლოს მდებარეობს ლუკოილის ბენზინგასამართი სადგურიც.
მარიამ მორგოშია