„შეიზღუდა საოჯახო ტექნიკის რეალიზება, თუმცა, ტელესაკომუნიკაციო და IT მოწყობილობის გაყიდვა დაშვებულია და ამაზე ვართ ფოკუსირებული“, -ამის შესახებ კომერსანტს „ალტას“ დირექტორმა გიორგი ჟურულმა განუცხადა. მისი თქმით, ტექნიკის მაღაზიაში ონლაინ გაყიდვები მხოლოდ ერთი დღით იყო შეჩერებული და დღეს კომპანია მუშაობას აგრძელებს. „ალტას“ დირექტორი ამბობს, რომ ჯერჯერობით არც ერთი თანამშრომელი სამსახურიდან არ გაუთავისუფლებიათ. გიორგი ჟურულის განმარტებით, კომპანია ყველა მათგანს საბაზისო ანაზღაურებას ამ დრომდე ურიცხავს, თუმცა, შექმნილი სიტუაცია თუ დიდხან გაგრძელდა, ყველაფერი კითხვის ნიშნის ქვეშ დადგება.
„ვემორჩილებით იმ შეზღუდვებს და წესებს, რომელიც საქართველოს მთავრობამ დაადგინა, მაგრამ რისი უფლებაც გვაქვს იმას ვიყენებთ და ვაგრძელებთ მუშაობას. ჯერ ზარალის დათვლა ადრეა, რადგან ეს ზარალი კიდევ აკუმულირდება. ჩვენი ამოცანა ახლა არის, რომ არ გავჩერდეთ და ვიმუშაოთ. ჩვენ ახლა, რასაც ვუყურებთ, ეს ყველაფერი საქმიანობის შეფერხების ნაწილში გადის, მაგრამ ამ ეტაპზე სამსახურიდან არავინ გაგვიშვია. ნებისმიერ მოქმედ კომპანიაში არის გარკვეული ადამინების რაოდენობა, რომელებიც სხვადასხვა მიზეზების გამო უხელფასო შვებულებას ითხოვს, გარდა ამ შემთხვევებისა, ყველა თანამშრომელი იღებს ანაზღაურებას, მიუხედავად იმისა, რომ მათი ნახევარი აქტიურად აღარაა დაკავებული საქმიანობით“, - განმარტავს გიორგი ჟურული.
გიორგი ჟურული „კომერსანტთან“ საუბარში ამბობს, რომ „ალტა“ საკმაოდ ძლიერი და გამართული ორგანიზაციაა, სწორედ ამიტომ, კომპანიაა არ გაჩერებულა და მუშაობას აგრძელებს, თუმცა როგორც თვითონ ამბობს ნებისმიერ შემთვევაში კორონავირუსის გავლენა ბიზნესსზე მტკივნეულად აისახება.
„გაყიდვები რამდენჯერმეა შემცირებული, ეკონომიკური საქმიანობის შეზღუდვა საკმაოდ სერიოზული დარტყმაა ნებისმიერი ორგანიზაციისთვის და ფინანსური სირთულეების წინაშე ყველა კომპანია დადგება. ჩვენ აღარ ვართ ჩვეულებრივ გარემოში, როდესაც გადასახადებს და იჯარას ჩვეულებრივ ვიხდიდით, რადგან შემოსავლები გვქონდა, ახლა ვართ სიტუაციაში, როდესაც შეზღუდული მუშაობა გვაქვს და ამ დროს იგივე ვალდებულებების შენარჩუნება იგივე დონზე შეუძლებელია. ფინანსური წნეხი უნდა იყოს იმ შემოსავლების ადეკვატური რა შემოსავალიც დღეს კომპანიებს აქვთ. მთავრობის მხრიდან ყველაზე დიდი მხარდაჭერა იქნება ის, რომ ეკონომიკა მალე გაიხსნას. ყველას კარგად გვესმის რა საშიშროების და გამოწვევის წინაშე დგას მთელი ქვეყანა და ვაფასებთ იმ ღონისძიებებს, რასაც მთავრობა ახორციელებს მაგრამ, ეკონომიკის გარეშე ყველაფერი ფუჭი იქნება“, - განაცხადა გიორგი ჟურულიმა.
ბაჩო ადამია