პანდემიის პერიოდში განხორციელებული ბევრი ცვლილების მიუხედავად, Gucci-ის მოდის სახლის კრეატიულმა დირექტორმა ალესანდრო მიკელემ თანამდებობა დატოვა.

„მისმა პრინტებმა, ახალმა ორმაგმა G ლოგომ და „ბებიების სტილის“ დაბრუნებამ, 2021 წელს Gucci-ს შემოსავლის გაორმაგება გამოიწვია და ამ ციფრმა 9,7 მილიარდ ევროს (10 მილიარდი აშშ დოლარი) მიაღწია, მაშინ როცა 2015 წელს კომპანიის შემოსავალი 4 მილიარდ ევროზე ნაკლები იყო. ხოლო საოპერაციო მარჟა 26,5%-დან 38,2%-მდე გაიზარდა“, წერს Bloomberg-ი.

49 წლის იტალიელი დიზაინერი ალესანდრო მიქელე Gucci-ის სახლის კრეატიული დირექტორი 2015 წელს გახდა და მნიშვნელოვანი როლი ითამაშა Gucci-ს გარდაქმნაში. როგორც New York Times Style-ი წერს, ერთ ღამეში, Gucci-ი გლამურის გამქრალი სიმბოლოდან ექსცენტრიკული მომწოდებლად იქცა და მომხმარებელი ისეთ საკითხებზე დააფიქრა, როგორიცაა გენდერი, სექსუალური იდენტობა და რასა.

მისმა ახლებურმა ხედვამ მოდის მთელი ინდუსტრია მოიცვა და ფრანგულმა კონგლომერატმა Kering-მა, რომელიც Saint Laurent-სა და Balenciaga-საც ფლობს, ათობით მილიონი დოლარი გამოიმუშავა.

მიუხედავად იმისა, რომ მიკელე Gucci-ის გაფართოებას მეტავერსთან, Adidas-თან და Harry Styles-თან თანამშრომლობით ცდილობდა, ბოლო პერიოდში ბრენდის ზრდის პროცესი შენელდა. სწორედ ეს გახდა მისი თანამდებობის დატოვების მიზეზი.

„დღეს ჩემთვის არაჩვეულებრივი მოგზაურობა მთავრდება, რომელიც კომპანიაში ოც წელზე მეტხანს გაგრძელდა და რომელსაც მთელი ჩემი სიყვარული და შემოქმედებითი ვნება დაუღალავად მივუძღვენი,“ ამ სიტყვებით გამოემშვიდობა მიკელე Gucci-ს.

როგორც bloomberg-ი წერს, 100 წლიან ბრენდს არასოდეს ჰყოლია იმხელა თაყვანისმცემლების არმია, როგორც მიკელეს დროს ჰყავდა და არც იმხელა მოგება ქონია, რაც ბოლო 7 წელიწადში.

Gucci-ს კრეატიული დირექტორის შემცვლელის ვინაობას მოდის სახლი ჯერ-ჯერობით არ ასახელებს.

მოამზადა მაკა ბიბილაშვილმა