საბანკო ასოციაცია კომერციული ბანკების ფინანსური მაჩვენებლების 2019 წლის ნიშნულთან დაბრუნებას წლის მეორე ნახევრიდან ელის. ალექსანდრე ძნელაძის განმარტებით, აღნიშნული მოლოდინი ოპტიმისტურ გათვლებს ეყრდნობა.

„2020 წელს პანდემიამ შეცვალა გარკვეული მიდგომები არა მხოლოდ საქართველოში არამედ მთელ მსოფლიოში. ვფიქრობ, პირველი კვარტლის ანალიზი იქნება მნიშვნელოვანი იმისთვის, რომ შევძლოთ გავაკეთოთ 2021-ის ზუსტი პროგნოზი. თუმცა, საბანკო სექტორში უფრო მეტი აქტივობა ალბათ, უფრო გაზაფხულზე იქნება. წლის მეორე ნახევრიდან არის ოპტიმისტური გათვლა რომ მაჩვენებლები 2019-ის ნიშნულს დაუბრუნდება,“ - აღნიშნა ალექსანდრე ძნელაძემ.

მისივე განმარტებით, უმოქმედო სესხების მატებასთან დაკავშირებით ეროვნულ ბანის პროგნოზი ზედმეტად კონსერვატულია და ასოციაცია იმედოვნებს, რომ ამ მაჩვენებლების 10%-მდე ზრდა არ დაფიქსირდება.

„სესხების ვადაგადაცილებებთან მიმართებით ეროვნული ბანკის პროგნოზი ცოტა უფრო კონსერვატულია. ვიმედოვნებ, ამ მაჩვენებლამდე არ მივა საბანკო სექტორის უმოქმედო სესების მოცულობა. იქიდან გამომდინარე თუ რა მაჩვენებლებიც იყო გასულ წელს. თუმცა, ამ გადმოსახედიდან ზუსტი პროგნოზირება ძალიან რთულია. იმ დარგებში, რომლებსაც სეზონური გრაფიკები აქვთ და მოხდა მათი სესხების რესტრუქტურიზება, სექტემბრამდე ჩვენ ვერ დავინახავთ აღდგა თუ არა მათი გადახდები. ამიტომ შეფასებები ცოტა პირობით იქნება,“ - განაცხადა საბანკო ასოციაციის ხელმძღვანელმა.

შეგახსენებთ, რომ 2020 წელი საბანკო სექტორმა პანდემიით გამოწვეული პრობლემების მიუხედავად 99.2 მლნ ლარის მოგებით (კონსოლიდირებული) დაასრულა. ბაზარზე წარმოდგენილი 15 ბანკიდან 7 მოგებაზე (206 მლნ ლარი) გავიდა.

აღსანიშნავია, რომ სექტორს ყველაზე მოცულობითი, 1 მლრდ-მდე, 943 მლნ ლარის ზარალი ჰქონდა მარტში, პანდემიის დარტყმისას, სებ-მა ნამეტი რეზერვის შექმნა რომ დაავალდებულა.

business-partner.ge