სტატისტიკის დეპარტამენტის მონაცემებით, 2019 წელს მოსახლეობის 19,5% იყო სიღარიბის ზღვარს ქვევით და მოსახლეობის მეხუთედი იყო ღატაკი. კორონავირუსმა ალბათ გააორმაგა ეს მონაცემი. ბოლოს როდის ელაპარაკეთ ჩვეულებრივ ხალხს? აი, ნავთლუღის ბაზარში თუ გასულხართ მაგალითად? - ამ კითხვით, პარტია „მოქალაქეების“ ლიდერმა ალეკო ელისაშვილმა პარლამენტში პრემიერ-მინისტრობის კანდიდატ ირაკლი ღარიბაშვილს მიმართა.
„დღეს გაფაციცებით გისმენდით, მანამდე „ქართულ ოცნებას“ რომ ხვდებოდით იქაც გისმენდით, ერთხელ არ გითქვამთ „ქამრების შემოჭერა“ ზრდილობის გულისთვის. იცით თუ არა რომ კორონავირუსამდე 2019 წელს, სტატისტიკის დეპარტამენტის მონაცემებით, 19,5% მოსახლეობის იყო სიღარიბის ზღვარს ქვევით და რომ მეხუთედი მოსახლეობის იყო ღატაკი. კორონავირუსმა ალბათ გააორმაგა ეს მონაცემი. იცით თუ არა, რომ ყოველ მეორე პენსიონერს წინასწარ ნახევარი წლის პენსია აქვს გამოტანილი. იცით თუ არა რომ პენსიონერებს მთელი თანხა მედიკამენტებში ეხარჯებათ. წამლებში მეტი ფული ეხარჯებათ, ვიდრე საჭმელში. მთავრობამ, „ქართულმა ოცნებამ“ ამ წლების განმავლობაში ამ საკითხს ვერაფერი მოუხერხა“, - აღნიშნა ელისაშვილმა.
ამასთან, ელისაშვილმა პრემიერ-მინისტრს განუცხადა, რომ ოპოზიციასთან მიმართებით, კონფრონტაციული ტონის ფონზე, ქვეყანაში არსებული პრობლემების გადაფარვა ხდება. „ასევე რა თქმა უნდა ველოდი თქვენგან კონფრონტაციულ ტონს ოპოზიციასთან მიმართებით... თქვენ მათ ახლა დაესტრუქციული ოპოზიცია უწოდეთ. წლებია გულწრფელად ებრძვით და მიგაჩნიათ, რომ პოლიტიკოსის, პრემიერ-მინისტრის მთავარი ფუნქციაა ებრძოდეს ოპოზიციას. რა თქმა უნდა ეს თქვენი არჩევანია. ამბობთ რადარებიდან უნდა გაგაქროთ, გაგანადგუროთ, ხომ არ ფიქრობთ, რომ რადარებიდან ქრება საქართველო? სანამ თქვენ ოპონენტებთან ასე დაჟინებით ბრძოლაში ხართ, ეს ქვეყანა ნადგურდება, ღატაკდება. ბოლოს როდის ელაპარაკეთ ჩვეულებრივ ხალხს? აი, ნავთლუღის ბაზარში თუ გასულხართ მაგალითად? თქვენ წლებია მაღალ თანამდებობებზე ხართ. იქნებ კავშირი გაგიწყდათ, იქნება არ იცით, რომ ლუკმა-პური ენატრება ხალხს“, - აღნიშნა ელისაშვილმა.
imedinews.ge