ბოლო კვირების მანძილზე ნავთობის ფასი იზრდება და ბარელზე 40 დოლარს უკვე გადასცდა - ეს საუკეთესო მაჩვენებელია მარტში და აპრილში ნავთობის კატასტროფული გაიაფების შემდეგ.

ანალიტიკური სააგენტო OilPrice-ის მიმომხილველის ალექს კიმანის აზრით, ეს მხოლოდ დასაწყისია, და ნავთობის ღირებულება მომავალში წარმოუდგენლად გაიზრდება. ასევე  JPMorgan-ის მიმომხილველები თავიანთ წინასწარ პროგნოზს ადასტურებენ - ნავთობის ფასმა შესაძლოა ბარელზე 100 დოლარს გადააჭარბოს.

მეტიც, ინვესტბანკის ნავთობ-გაზის კვლევათა დეპარტამენტის დირექტორმა კრისტიან მალეკმა ნავთობის გაძვირება 190 დოლარამდე ივარაუდა - მისი თქმით, დღეს ნავთობკომპანიები დაბალი მოთხოვნის გამო კაპიტალდაბანდებებს, და ახალი საბადოების ამუშავებაში დანახარჯებს ამცირებენ.

შესაბამისად, პანდემიის დასრულების და ეკონომიკის აღდგენის შემდეგ, მსოფლიო ბაზარზე ნავთობის მწვავე დეფიციტი წარმოიქმნება. ეს პროცესი 2022 წელს დაიწყება, და თუ მომპოვებელი ქვეყნები დღეს არსებულ კურსს შეინარჩუნებენ, 2025 წლისთვის დეფიციტი დღე-ღამეში 6,8 მლნ. ბარელს მიაღწევს.

პანდემიის დროს შავი ოქრო კატასტროფულად გაიაფდა, ამიტომაც, მაგალითად, შტატებში ნავთობკომპანიებმა 2020 წელს კაპიტალური ხარჯები 85 მლრდ. დოლარით შეამცირეს, და ეს პროცესი სხვა ნავთობმომპოვებელ ქვეყნებშიც მიმდინარეობს. დღეს, მოხმარების კატასტროფული ვარდნის პირობებში, ეს პრობლემა არაა, თუმცა, მოთხოვნის ზრდის შემთხვევაში დეფიციტი გარდაუვალია.

ეს არ არიას უახლოესი თვეების პერსპექტივა - პირიქით, ნავთობის ფასების ბოლოდროინდელი მერყეობა მსოფლიო ეკონომიკის არამდგრად მდგომარეობაზე, და შესაბამისად, საწვავზე დაბალ მოთხოვნაზე მეტყველებს.

უოლ-სტრიტის ანალიტიკოსების აზრით, ნავთობის ბაზრის მონაწილეთა შორის კონკურენციის გამწვავებამდე სიტუაცია არსებითად არ შეიცვლება. სადღეისოდ, ამერიკის ფიკალის ინდუსტრიის ჩამოშლა მომგებიანია  რუსეთის და საუდის არაბეთისთვის, თუმცა, გრძელვადიან პერსპექტივაში მათთვის სერიოზულ რისკებს შეიცავს.

ამერიკელი პოლიტიკოსები ნავთობის ფასების ვარდნის და ფიკალის ინდუსტრიის ნგრევის პირამდე მისვლის გამო საუდის არაბეთის წინაამღდეგ სანქციების დაწესებას ითხოვენ. ამერიკამ უკვე დაუწესა სანქციები მოსკოვს, და იაფი ნავთობი რუსულ ეკონომიკის სისუსტეს ამერიკული შეზღუდვების წინაშე კიდევ უფრო ზრდის.

თანაც, ისიცაა გასათვალისწინებელია, რომ საუდის არაბეთის ბიუჯეტის მთლიანად დაბალანსებისთვის ნავთობის ფასი 80 დოლარის მიდამოებში უნდა იყოს.

ასე რომ, რუსების და საუდელების სიხარული ფიკალის ამერიკული ინდუსტრიის ჩამოშლის გამო, შესაძლოა ხანმოკლე აღმოჩნდეს.

აშკარაა, რომ ნავთობის ფასი ვერ იქნება ისეთივე დაბალი, როგორც ის დღესაა, რადგანაც არსებული ვითარება გამოწვეულია არა ფუნდამენტალური ეკონომიკური ფაქტორებით, ან ალტერნატიული ენერგეტიკის არნახული ზრდით, არამედ  პანდემიით და მსოფლიო ეკონომიკის გაჩერებით.

აპრილში შავი ოქრის ფასი უარყოფთ მაჩვენებლამდეც კი ჩამოიშალა, თუმცა, ეს დიდხანს არ გაგრძელდა - ნავთობი ზედმეტად ფასიანი რესურსია იმისთვის, რომ ის წამგებიანი დიდი ხნით გახდეს.

თუმცა, ისიც აშკარაა, რომ კრიზისიდან ეკონომიკის გამოსვლის ვადები და ტემპები არავინ იცის - ვარაუდები ნავთობის დეფიციტის წარმოქმნაზე 2022 წელს შესაძლოა ზედმეტად ოპტიმისტური აღმოჩნდეს.

დღეს კაცობრიობა კორონავირუსის შემოტევის მეორე ტალღის ტალღის მოლოდინშია, რომლის ხანგძლიობა და სავარაუდო სიმძიმე - სრულიად ბუნდოვანია.

ასე რომ შესაძლოა, ნავთობი მართლაც გაძვირდეს 100 დოლარამდე, თუმცა, ალბათ, დღეს და ხვალ ეს არ მოხდება.