„ამ წლის აკადემიურ წლად გამოცხადება და მისი გაცნობიერება მიგვიყვანს დიდ პრობლემათა პანდემიამდე“ -ამის შესახებ ფილოლოგიის მეცნიერებათა დოქტორმა გია მურღუალიამ „კომერსანტთან“ განაცხადა.
გამოცხადდება თუ არა 2019-2020 სასწავლო წელი აკადემიურ წლად, ამ თემაზე - სოციალურ ქსელში, მსჯელობა აქტიურად მიდის, თუმცა, როგორც განათლების სფეროსა და სამინისტროს წარმომადგენლებს მიაჩნიათ, რომ ამის საფუძველი არ არსებობს და ქვეყანაში ყველა ის ზომა ტარდება რაც თავიდან აგვარიდებს აკადემიურ სასწავლო წელს.
„ამ წლის აკადემიურად გამოცხადება მიმაჩნია დიდ აბსურდად და ამის ვერნაირ საჭიროებას ვერ ვხედავ. ამ გადაწყვეტილების მიღების შემდეგ დაიწყება ნამდვილი პანდემია, რომელიც დიდხანს ვერ დალაგდება. მის გამოცხადაებას მთელი რიგი პრობლემები ახლავს თან. კერძოდ, ფუჭად დაკარგული დრო და სახსრები, რომელიც სახელმწიფოს მიერ გატარდა, როგორც დისტანციური სწავლების ასევე ტელესკოლის შექმნის მხრივ.თუ აკადემიურ წლად უნდა გამოვაცხადოთ ეს სასწავლო წელი, რატომ კეთდებოდა ამდენი რამ, ამის საფუძველს ვერც განათლების სამინისტროში ხედავენ.ალბათ ვერ აცნობიერებენ, რამდენ დროსა და ფინანსებზეა საუბარი, როგორც პედაგოგებისთვის გადახდილი ხელფასების, ასევე სხვა გადასახადების სახით, ეს ყველაფერი წყალში ჩაიყრება.
ჩვენ დისტანციური სწავლაზე გადავედით, რომელიც არის საერთაშორისოდ აპრობირებული მეთოდი , ასე სწავლობენ და ასწავლიან მსოფლიოს სხვადახვა ქვეყნებში. ამ გზას კი საქართველო ახლა გადის და ცოტა უცნაურად მიაჩნიათ, თუმცა, მალე გაითავისებენ.“-ამბობს გია მურღულია.
2019-2020 წლის აკადემიურ წლად გამოცხადების აუცილებლობას ვერ ხედავენ ვერც, განათლების, მეცნიერების, კულტურისა და სპორტის სამინისტროში. მინისტრ მიხეილ ჩხენკელის განცხადებით, ამ ეტაპზე ეროვნული გამოცდების ფორმატის ან თარიღების ცვლილების საკითხი არ განიხილება. როგორც მიხეილ ჩხენკელმა აღნიშნა, „ტელესკოლის“ პროექტის ფარგლებში განსაკუთრებული როლი ენიჭება აბიტურიენტის საათს, სადაც აბიტურიენტები იღებენ კონსულტაციებს წამყვანი სპეციალისტებისაგან ეროვნულ გამოცდებთან დაკავშირებით.
„როგორც მოგეხსენებათ, ტელესკოლის პროექტის ფარგლებში განსაკუთრებული როლი ენიჭება აბიტურიენტის საათს, სადაც აბიტურიენტები იღებენ კონსულტაციებს ჩვენი წამყვანი სპეციალისტებისაგან ეროვნულ გამოცდებთან დაკავშირებით. ასევე მოგეხსენებათ, რომ ჩვენი სამინისტროს გადაწყვეტილებით, ჩვენ გავახანგრძლივეთ ეროვნული გამოცდებისთვის რეგისტრაციის ვადა, მაგრამ ეს არანაირად არ ეხება თვით ეროვნული გამოცდების თარიღებს. ამ ეტაპზე, ეროვნული გამოცდების ფორმატის ან თარიღების ცვლილების საკითხი არ განიხილება“, – განაცხადა მიხეილ ჩხენკელმა.
ცნობისთვის, ახალი კორონავირუსის გავცელების პრევენციის მიზნით, საკოორდინაციო საბჭოს გადაწყვეტილებით, საგანმანათლებლო დაწესებულებებში სასწავლო პროცესი 2 მარტს შეწყდა და სასწავლო დაწესებულებები დისტანციურ სწავლაზე გადავიდა.
ნათია ლომიძე.