ვებ-გვერდი eastfruit.com ქართული კომპანია Ajara group-ის ხელმძღვანელს გოდერძი მეტრეველს ჰოლდინგის სამომავლო გეგმებზე ესაუბრა.

ნუშის ბაღები თქვენს ჰოლდინგში შემავალი კომპანია „უდაბნო“-ს ფარგლებში 2016 წელს შეიქმნა, დღეს კი პირველი მოსავლის აღება მოხდა. რამდენი წელია საჭირო ნუშის ბაღის ასამუშავებლად?

-2016-2017 წლებში ჩვენ ნუში 1000 ჰექტარზე დავრგეთ, ბაღებს ყოველწლიურად ვაფართოვებდით, დღეს კი მისი მთლიანი ფართი 2300 ჰექტარს შეადგენს. ამ წელს 1000 ჰექტარიდან ჩვენ პირველ მოსავალს ვიღებთ. სრულიად ჯანსაღი და ხარისხიანი პროდუქტი მივიღეთ, რაც ევროპული ლაბორატორიების დასკვნებითაც დასტურდება. სავარაუდოდ, ამ წლის მოსავალი 150 ტონამდე იქნება, პარალელურად ჩვენ ნუშის კრეფის პროცესის სრულყოფაზე ვმუშაობთ. ჩვენთან ბაღში ძირითადად ესპანური Lauren, Guara, Soleta და იტალიური Supernova არის დარგული.

რაც შეეხება ბაღის გაშენებას, ჩვენ ეს პროცესი დეტალური აგრონომიული კვლევების შემდეგ დავიწყეთ. იმ დროს საქართველოში ნუშის სამრეწველო მოყვანაზე ცოდნა მინიმალური იყო. ჩვენ კალიფორნიული გამოცდილება გამოვიყენეთ, რომელიც ამ ნიადაგს ძალიან კარგად მოერგო. ბაღის ტერიტორია აღჭურვილია ავტომატიზებული სარწყავი სისტემით. 2016-2017 წლებში საკუთარი წყალსაცავი ავაშენეთ, რომელიც გრუნტის წყალს აგროვებს. ეს წყალი თავისი ბიო-ქიმიური თვისებებით ისეთია, რომ დამატებით დამუშავებას არ საჭიროებს. სწორედ მაშინ 15-კილომეტრიანი წყლის მაგისტრალი ავაშენეთ, რომლის მეშვეობითაც წყალი რეზერვუარიდან ბაღამდე მიდის.

მომავალი 4 წლის მანძილზე ბაღის ტერიტორიის 5000 ჰექტარამდე გაზრდას ვგეგმავთ, და ეს ევროპაში ნუშის ყველაზე დიდი ბაღი იქნება. პარალელურად ახალი 15-კილომეტრიანი წყლის მაგისტრალი აშენდება. ჩვენ ვართ საქართველოში ნუშის წარმოებაში პიონერები. გამოცდილებას ჩვენ კახელ ფერმერებს აქტიურად უზიარებთ. რეგიონში ნუშის ათობით ახალი პლანტაცია შეიქმნა და თითო 20-დან 100 ჰექტარამდეა. ეს ძალიან კარგია ქვეყნისთვის.

სად აპირებთ ნუშის პირველი მოსავლის გაყიდვას?

  სავარაუდოდ, ამ წელს არსად. სათანადო პირობების დაცვის შემთხვევაში ნუშის შენახვა წლების მანძილზეა შესაძლებელი, ასე რომ, 2021 წელს დაველოდებით, შემდეგ კი გავყიდით კონსოლიდირებულ მოცულობას. ჩვენთვის ძირითად ბაზარი ევროკავშირი იქნება, რომელზეც ორიენტირი ბაღების შექმნისთანავე იქნა აღებული. ჩვენ ყველა ევროპულ ნორმებს ვაკმაყოფილებთ და საერთაშორისო სერტიფიკატის Global G.A.P.-ის მიღებაზე მუშაობას ვასრულებთ.

  როგორ შეიცვალა ევროპის ბაზარზე პანდემიის ფონზე ნუშზე მოთხოვნა?

  სიტუაცია მეტ-ნაკლებად სტაბილურია, და ევროპაში მოთხოვა ნუშზე იზრდება, თუმცა, გარკვეულ სახეობებზე ფასები შემცირდა. ექსპერტების შეფასებით, სულ მალე ფასები ისევ გაიზრდება. ზოგადად, ნუშის დიდი უპირატესობაა, რომ მისი დიდი ხნის მანძილზე შენახვა შეიძლება შესაბამისად, გაყიდვა სასწრაფო და გადაუდებელი არ არის.

  როგორია მოთხოვნა ქართულ ბაზარზე?

  მოთხოვნა არის და იმ ფერმერებს, რომლებმაც 20-30 ჰექტარის ზომის ბაღები დარგეს, ქვეყნის შიგნით გასაღების პრობლემა არ ექნებათ. თანაც, საქართველოში დასუფთავებული ნუში გაცილებით უფრო ძვირია, ვიდრე ევროპაში.

  რა გეგმები გაქვთ სამომავლოდ?

  2021 წელს საერთაშორისო ორგანიზაციების დახმარებით, ახალი და მსხვილი გადამამუშავებელი ქარხნის მშენებლობას დავიწყებთ, ამ საწარმოზე ნუშის გადამუშავება, გასუფთავება და შეფუთვა მოხდება. სავარაუდოდ, ქარხანა 2023 წლის დასაწყისში ამუშავდება.

  კომპანია „უდაბნო“ 8000 ჰექტარს ფლობს, ხოლო ნუშის ბაღის გაზრდა 5000-მდე იგეგმება, დანარჩენის ათვისება როგორ მოხდება?

სავარაუდოდ, დანარჩენ 3000 ჰექტარზე ბოსტნეული დაირგება და ასევე ინფრასტრუქტურა აშენდება. უკვე დავრგეთ ვენახი - ძირითადად ჩვენს მიერ აღდგენილი ენდემური ჯიშები, რომლებიც ამჟამად კონკრეტულ ნიადაგზე და კლიმატში ცდებს გადის. ასევე საქართველოში 40 მრავალწლიანი და ერთწლიანი კულტურების სათესლე მასაა ჩამოვიტანეთ და ამჟამად მისი ტესტირების პროცესი მიმდინარეობს.

საბოლოო ჯამში ჩვენი მიზანია „უდაბნო“-ს მეურნეობის სოფლის მეურნეობის და აგროტურიზმის ცენტრად გადაქცევა.

east-fruit.com

თენგიზ აბლოთია