„ბიზნესის მთავარი გამოწვევა საშუალო ფენის სიმცირეა, მოსახლეობაში მეტი ფული უნდა ბრუნავდეს“, - ამის შესახებ კომერსანტს ჰიპერმარკეტების ქსელის „აგროჰაბი“-ის დამფუძნებელმა აკაკი ახვლედიანმა განუცხადა. მისი თქმით, საშუალო ფენის სიმცირესთან ერთად ბიზნესზე უარყოფითად ქვეყანაში ინფლაციის ძალიან მაღალი მაჩვენებელიც აისახება, რაც, მისი განცხადებით, მოსახლეობის მსყიდველუნარიანობას საგრძნობლად ამცირებს.

ბიზნესმენი მედიაჰოლდინგთან კორონავირუსით გამოწვეული პანდემიის უარყოფით შედეგზეც საუბრობს. „აგროჰაბი“-ს დამფუძნებელს იმედი აქვს, რომ უახლოეს მომავალში პანდემია დასრულდება. სწორედ ამიტომ აკაკი ახვლედიანი განვითარებაზეა ორიენტირებული და მუშაობას აქტიურად აგრძელებს. შესაბამისად, როგორც ბიზნესმენი აცხადებს, მომავალ წელს ჰიპერმარკეტის ორი ახალი ფილიალის გახსნაა დაგეგმილი.

„კორონავირუსი ბიზნესისთვის ამ დრომდე დიდი გამოწვევაა. სწორედ ამ მიზეზით ჩვენ 2020-21 წლებში ახალი ფილიალი არ გაგვიხსნია. იმედია, პანდემია მალე დასრულდება, თუ ვერ დავამარცხებთ, ვირუსთან თანაცხოვრებას მაინც ვისწავლით. ამ პერიოდში სახელმწიფო გვერდში დაგვიდგა. ბიზნესისთვის 1500 ლარამდე ხელფასის მაქსიმუმ 750 ლარის შესაბამისი  საშემოსავლო გადასახადისგან გათავისუფლება დიდი შვება იყო. პანდემიის გამო ხარჯები საგრძნობლად გაგვეზარდა, იმ პერიოდში კი ეს შეღავათი ძალიან დაგვეხმარა. სამომავლოდ გარკვეული პროექტების მონახაზი შემუშავებული გვაქვს და გეტყვით, რომ 2022 წელს „აგროჰაბი“ კიდევ ორ ახალ ფილიალს გახსნის“, - განაცხადა აკაკი ახვლედიანმა.

შეგახსენებთ, რომ „აგროჰაბი“ პირველი აგრარული ჰიპერმარკეტია, რომელიც  2016 წელს გაიხსნა და დღეს სულ სამ ფილიალს ფლობს, მათ შორის ორს თბილისში და ერთს ბათუმში.

ბაჩო ადამია