როგორია აგრო ტურიზმის გამოწვევები საქართველოში და რა უნდა გაკეთდეს დარგის განსავითარებლად? - ეკონომიკის დოქტორი, პროფესორი კობა არაბული რადიო კომერსანტის გადაცემაში „აგრო სექტორი“ საუბრობს.
„პრაქტიკული ტურიზმი არამარტო ჩვენგან, მთელს მსოფლიშია გაჩერებული. მაშინ როცა ჩვენთან საუბრობენ მწვანე კორიდორების შექმნაზე და ტურიზმის გაცოცხლებაზე, ფიქრი ღირს იმაზე,შეგვიძლია თუ არა ეს და მართვადი იქნება,თუ არა იგი. რას მოგვიტანს დადებითს და უარყოფითს.აგრო ტურიზმი ერთ-ერთი საინტერესო მიმართულებაა, საუბარია როგორც სასოფლო ორიენტაციის ტურიზმზე და აგრო ტურიზმზე,როგორც ფერმერულ ტურიზმზე. ყველას თავისი მიდგომა აქვს ტერმინებთან დაკავშირებით, თუმცა ამ ტერმინს იყენებენ,როგორც სასაოფლო, ისე ფერმერული ტურიზმის კონტექსტში.
აგრო ტურიზმი კარგად განვითარებულია ევროპაში, ამერიკაში,ავსტრალიაში, ახალ ზელანდიაში, საინტერესოდ ვითარდება ჩვენს მეზობელ თურქეთშიც. თითოეული ეს ქვეყანა, რომელიც გარს გვაკრავს სერიოზული კონკურენტები არიან. მაგალითად, თურქეთი,რომელიც არ არის „ხელწამოსაკრავი“ მეზობელი ტურიზმის მიმართულებით. თეორიულად მას ჩვენზე მეტი ტურისტის მიღება შეეძლება, ვინაიდან ტერიტორია ერთ-ერთი მთავარი ფაქტორია. როცა ასეთი მეზობლები გვყავს ჩვენ მათ ვიხილავთ,როგორც კონკურენტებს. არსებობს ის თეორიებიც,როცა კონკურენტებთან საერთო ენა შეიძლება გამონახო და ტრანზიტული გზებით, თუნდაც, ის რაც მათთან კეთდება ჩვენთან,რომ გაგრძელდეს და მერე სხვაგან წავიდეს.
აგრო ტურიზმი შეიძლება იყოს ის ფორმა, რომელიც გარკვეული შეთანხმების შედეგად, ერთობლივი ტურისტული პროდუქტები მიცემენ საშუალებას დაინტერესებულ ადამიანებს, ნახონ თურქეთის აგრო ტურიზმი, მერე ჩვენთან ნახონ და მერე დაბრუნდნენ უკან. ჩვენ ძალიან კარგად შეღწევადი ქვეყანა ვართ ტრანსპორტის ნებისმიერი სახეობისთვის, და ეს მოგვეხმარებოდა იმაში,რომ ჩავებათ ასეთ ჯაჭვებში,“- ამბობს კობა არაბული.
მისი განცხადებით, დარგის განვითარება პირველ რიგში, სოფლის განვითარებით უნდა დაიწყოს. კობა არაბული სოფლად არსებულ სოციალურ და ეკონომიკურ პრობლემებზე საუბრობს.
„აგრო ტურიზმის მიმართულებით ტურიზმის განვითარება უნდა იყოს პრიორიტეტი ბევრი ფაქტორის გამო. პირველ რიგში, აგრარული ქვეყანა ვართ, მიწის სამუშაოზე ორიენტირებული, თუკი ურბანული და რურალური თვალსაზრისით გადავხედავთ ქვეყანას, ვნახავთ რომ 3500-ზე მეტი სოფელი გვაქვს. აგრო ტურიზმი ძალიან დაგვეხმარება სოფლის განვითარებაში, მიგრაციის დონის შემცირებაში. თუ კი ავიღებთ მთის რეგიონებსა და სოფლებს, ვნახავთ რომ იცლება პრაქტიკულად სოფლები, ამ ტენდეციას ვერ მოვერიეთ.
აგრო ტურიზმი რომ განვავითაროთ სოფელში, საჭიროა სოფლის, როგორც სოციალური ფენომენის და ფერმერული მეურნეობის განვითარება. შრომა არის საზოგადოების კულტურა და ცხადია,რომ შრომის პროცესიდან დანახული ქვეყანა, სასოფლო სამეურნეო ინდუსტრიის განვითარების ფორმატიდან დანახული ქვეყანა, საინტერესოა. ეს არის ქვეყნის, არა სასტუმროების და ცათამბრჯენების სიმაღლიდან, არამედ ოჯახიდან, ფერმიდან დანახვის შესაძლებლობა. ვართ მიწასთან ახლოს, ჩვენი ხელით ვიღებთ მოსავალს და ამ პროცესის მონაწილე ხდება ტურისტი.
ჩემთვის სოფლის გაცოცხლების თემატიკაა მნიშვნელოვანი, ვინაიდან ეს ბევრ სოციალურ პრობლემას მოაწესრიგებდა და სიკეთის გზაზე დააყენებდა. იმ ქვეყნებში,სადაც აგრო ტურიზმი კარგად არის განვითარებული, სასტარტო პერიოდი შიდა ტურიზმის, ქვეყნის შიგნით არსებული შრომითი პოტენციალის მოძრაობით დაიწყო. დღეს სოფელს თავისი მიწა, როგორც ასეთი, ცალკე სტატუსით არ აქვს.ჩვენ გვინდა რომ ტურიზმის განვითარების ეროვნული სტრატეგია იყოს კარგად დამუშავებული და ჩვენი ქვეყნის რესურსულ პოტენციალზე კარგად მორგებული.
ამ სტრატეგიაში აუცილებლად უნდა იყოს საუბარი აგრო ტურიზმზე და მიბმული იყოს სასოფლო სამეურნეო ინდუსტრიის განვითარებაზე. ის დამოუკიდებლად ცალკე ვერ განვითარდება, საჭიროა ინფრასტრუქტურის, მშენებლობის ინდუსტრიასთან, აგრო ინდუსტრიასთან ერთად უნდა განვითარედეს.
თუ კი გვინდა სოფლის გაცოცხლება, სოფელში გზა უნდა მივიდეს. იყო პერიოდი,როცა სოფელში გზა არ გაჰყავდათ იმის შიშით,რომ იგი არ დაცლილიყო. სოფელი დაიცალა, გზა ისევ არ არის. სოფლებში არის წყლის,ნაგვის გატანის და ნარჩენისგან გათავისუფლების, კანალიზაციის პრობლემები.დღეს არ შეიძლება რომ ინტერნეტი ითვლებოდეს ფუფუნებად აუარებელი რამ არსებობს იმისთვის,რომ მოწესრიგდეს პრობლემები. ეს ყველაფერი საჭიროა იმისთვის,რომ სოფელი იყოს იმ ბუნებრივი ლანდშატფის ადეკვატური,რომ გიხაროდეს იქ მისვლა,“- ამბობს კობა არაბული.
აგრი ტურიზმი
