„გასულ კვირას „აგარის შაქარი“ 75 ლარი ღირდა, დღეს კი 81 ლარი და 40 თეთრი ღირს“, - ამის შესახებ „კომერსანტს“ შ.პ.ს. „ლუანა“-ს კომერციულმა დირექტორმა ლევან ზეგარდელმა განუცხადა. კომპანიაში, რომელიც დაკავებულია საკვები, სასმელი, სამომხმარებლო და აგრარული პროდუქციის სადისტრიბუციო საქმიანობით აცხადებენ, რომ ყველაზე მეტად ბოლო პერიოდში შაქრის ფასი გაიზარდა, ლევან ზეგარდელის თქმით, ცვლილება დაახლოებით 10% - მდეა. იმპორტიორი აცხადებს, რომ ფასის ზრდა რუსული შაქრის გაძვირებამ გამოიწვია. მისი განმარტებით, ბაზარზე შექმნილი მდგომარეობით ისარგებლა ადგილობრივმა წარმოებამ, რადგან დისტრიბუტორებს „აგარის შაქრის“ კომბინატის გარდა სხვა ალტერნატივა არ აქვს.

„ბოლო ერთი თვის განმავლობაში ყველაზე მეტად შაქარი გაძვირდა. შემოგვქონდა რუსული შაქარი, თუმცა, რუსეთში ცოტა ჭარხლის მოსავალი მოვიდა რის გამოც შაქრის ფასი კატასტროფულად გაიქცა. გარკვეული დროით შემდეგ აგარის შაქარზეც გადავედით, თუმცა ეგეც გაძვირდა. აღსანიშნავია, რომ აგარის შაქარმა ნედლეული კორონავირუსის დაწყებამდე შეისყიდა. კომპანიას რუსულ შაქარს უწევდა კონკურენციას და როცა რუსული შაქარი 90 ლარი გახდა, ფასი მათაც გაზარდეს,“, - განაცხადა ლევან ზეგარდელმა.

შ.პ.ს. „ლუანა“ პროდუქციის იმპორტს რუსეთიდან, თურქეთიდან და ყაზახეთიდან ახორციელებს. კომპანიის კომერციული დირექტორი აცხადებს, რომ პროდუქციის გაძვირება დამოკიდებულია იმაზე, თუ როგორ გაუფასურდება ლარი.

„ჩვენთვის მნიშვნელოვანი სტაბილურობაა, გვირჩევნია ლარის კურსი დოლართან მიმართებით 4 იყოს და არ შეიცვალოს, ვიდრე ხან 3 და ხან 2.5. ეროვნული ვალუტის თამაში ჩვენი საქმიანობისთვის დამღუპველია. გაძვირებულ პროდუქტებს შორისაა ასევე მაკარონი. იქედან გამომდინარე, რომ  შაქარზე და მაკარონზე დაბალ პროცენტზე ვმუშაობთ ლარის გაუფასურება  პროდუქტის ფასს პირდაპირ ურტყამს, ვინაიდან შესყიდვას დოლარში ვახორციელებთ. გვქონია შემთხვევა, როდესაც რუსეთში სხვა კურსით გადაგვიხდია ფული, როცა  პროდუქტი საბაჟოზე შემოსულა  იმ დროისთვის უკვე არსებული კურსით უნდა გადაგვეხადა. არის ისეთი პროდუქტები, რომლებიც შედარებით  მაღალ პროცენტში გვაქვს, მაგ. შესქელებული რძე, რაზეც ვალუტის ცვალებადობა დიდად არ აისახება. გვაქვს ინფორმაცია, რომ რუსეთში შვრიის ცუდი მოსავალია, რის გამოც შვრია 10-დან 15%-მდე უნდა გაძვირდეს. ასევე შემოგვაქვს შესქელებული რძე. მთელი საქართველოს მასშტაბით საბავშვო ბაღებს ჩვენ ვამარაგებთ. ფასები ამ კუთხით ჯერჯერობით სტაბილურია“, - განმარტავს ლევან ზეგარდელი.

კომპანიის კომერციული დირექტორი ვარაუდობს, რომ უახლოეს მომავალში შესაძლებელია ლარი კიდევ უფრო გაუფასურდეს, რაც სამომხმარებლო კალათას კიდევ უფრო გააძვირებს.

„საახალწლოდ ძვირი იმპორტი შემოდის, დოლარზე მოთხოვნა იზრდება ლარი კი უფასურდება. ჩვენი კომპანიაც ახალი წლისთვის ბევრ პროდუქტს შეიძენს, ამ პერიოდში შესყიდვები ხშირად სამმაგდება, შესაბამისად ბევრი პროდუქტი ბევრ დოლარს ითხოვს და ლარიც უფასურდება“, - განაცხადა ლევან ზეგარდელმა.

შპს „ლუანა“ დაარსდა 2015 წლის 29 სექტემბერს. კომპანია ახორციელებს, პროდუქციის შესყიდვას, როგორც ადგილობრივი მწარმოებლებისგან, აგრეთვე იმპორტს სხვადასხვა ქვეყნებიდან. „ლუანა“ სავაჭრო წარმომადგენლების საშუალებით პროდუქციას აწვდის როგორც ჰიპერმარკეტებს, აგრეთვე საცალო, საბითუმო და ქსელურ მარკეტებს. მათი პროდუქციის პორტფელი მოიცავს: მაკარონს, ფქვილს, ბრინჯს, წიწიბურას, შვრიის ფანტელს, შესქელებული რძეს, სხვადასხვა დაკონსერვებული პროდუქციას, კანფეტს, ორცხობილას, ვაფლს, სხვადასხვა ტკბილეულს და ა.შ.

„კომერსანტი“ დაინტერესდა თუ რატომ გაზარდა ბოლო ერთ თვეში „აგარის შაქარმა“ ფასი, მედიაჰოლდინგმა ამ კითხვებით კომპანიასაც მიმართ, პასუხებს კი ჩვენს მკითხველს მიღებისთანავე გავაცნობთ.