მაინინგის აკრძალვის მიუხედავად, კრიპტოვალუტების მოპოვება ოკუპირებულ აფხაზეთში ენერგოკრიზისის მთავარ გამომწვევ მიზეზად მაინც რჩება.
ოკუპირებული აფხაზეთის დე-ფაქტო პრეზიდენტმა ასლან ბჟანიამ ძალოვანი სტრუქტურების წარმომადგენლებთან შეხვედრის დროს განაცხადა, რომ თებერვალში, რუსეთიდან მიღებული ელექტროენერგიის მოცულობიდან გამომდინარე, მოხმარება დღე-ღამეში 8,3 მლნ. კვტ. საათს არ უნდა აღემატებოდეს.
გასათვალისწინებელია, რომ ენგურჰესის ელექტროენერგიისგან განსხვავებით, რუსეთიდან მიღებული ენერგია უფასო არაა და ის საკმაოდ ძვირია. აფხაზეთი არც მის საფასურს იხდის - არ აღიარებული ეკონომიკის მინისტრის კრისტინა ოზგანის თქმით, ამ დროისთვის აფხაზეთს 2020 წლის თებერვალ-აპრილის პერიოდის დავალიანება აქვს - 619 მლნ. რუბლი.
თუმცა, ჭარბი მოხმარება დაუძლეველ პრობლემად კვლავ რჩება. ბჟანიას თქმით, ამის ერთ-ერთი მიზეზია ბოლო პერიოდში ამინდის მკვეთრი გაუარესება, თუმც- ერთ-ერთი, მაგრამ არა მთავარი. ძირითადი მიზეზი კი ისევ იგივეა, რაც აქამდე იყო - კრიპტოვალუტების მაინინგი.
ბოლო დღეებში ბიტკოინმა მორიგი ფსიქოლოგიური ზღვარი 50 000 დოლარი გადალახა და ეს იმის შემდეგ მოხდა, რაც ილონ მასკმა განაცხადა, რომ 1,5 მლრდ. დოლარის კრიპტოვალუტის ყიდვას აპირებს.
ალბათ ნიშანდობლივი იყო, რომ ამ ახალი ამბავის გავრცელების შემდეგ სოხუმის რამდენიმე რაიონში ელექტროენერგია ისევ გაითიშა.
თავად ენერგეტიკოსები აცხადებენ, რომ მოხმარება ნორმას მცირედით აჭარბებს და ელექტროენერგიის გათიშვები ბოლო დღეებში მხოლოდ ავარიებთანაა დაკავშირებული
„დღეისთვის, დატვირთვა ენერგოსისტემაზე ბევრად უფრო დაბალია, ვიდრე დეკემბერში იყო. კრიპტოფერმების დიდი ნაწილის გათიშვის შედეგად ენერგოსისტემაზე დატვირთვა მეტ-ნაკლებად ნორმალურ დონემდეა დაყვანილი. რა თქმა უნდა, მოხმარება ისეთი დაბალი არაა, როგორც საჭიროა, თუმცა, ამ დონეზეა, რომ ჩვენ ამ მძიმე პერიოდს განსაკუთრებული სირთულეების გარეშე გავივლით“ - განაცხადა სახელმწიფო კომპანია „ჩერნომორენერგოს“ პრეს-მდივანმა ალხას გაგულიამ.
ფორმალურად აფხაზეთში კრიპტომაინინგს დაუნდობლად ებრძვიან. ფერმების მორიგ გამოვლენაზე ინფორმაცია ყოველდღიურად ქვეყნდება, მაგრამ არავისთვის საიდუმლო არაა, რომ აკრძალვები ყველას არ შეხებია, ამ ბიზნესში ბევრი მაღალჩინოსანია ჩართული.
ისინი მაინინგის წინაამღდეგ სიტყვიერ დონეზე ილაშქრებიან, თუმცა, პარალელურად ბიტკოინების მოპოვებას და ელექტროენერგიის ქურდობას კვლავ განაგრძოებენ.
პარალელურად, არ აღიარებულ რესპუბლიკაში ენერგოსისტემა ისევ გრაფიკზე გადავიდა - ამჯერად უკვე ოფიციალურად.
კერძოდ, „ჩერნომორენერგო“-ს ინფორმაციით, ენერგოსისტემაზე ჭარბი დატვირთვის გამო, ოკუპირებულ აფხაზეთში ენერგომომარეგების შეზღუდვები ისევ ამოქმედდა.
„გაუარესებული კლიმატური პირობების, ენერგოსისტემაზე გაზრდილი დატვირთვის და გახშირებული ავარიების გამო, „ჩერნომორენერგო“ მუშაობის საგანგებო რეჟიმზე გადადის. აღჭურვილობის მწყობრიდან გამოსვლის თავიდან არიდების მიზნით, ქვესადგურებზე კრიტიკული დატვირთვების შემთხვევაში დროებით შეზღუდვები ამოქმედდება“ - ნათქვამია განცხადებაში.
წყარო: ekhokavkaza.com
აფხაზეთი
