კრიპტოვალუტების უკონტროლო მოპოვებამ ოკუპირებული აფხაზეთის ენერგოსისტემა ჩამოშალა. სანამ ამინდი თბილი იყო, სისტემა მდგრადობას მეტ-ნაკლებად ინარჩუნებდა, მაგრამ როგორც კი აცივდა და მოსახლეობამ ელექტროენერგიის გამოყენება გათბობისთვის დაიწყო, ვითარება მკვეთრად გაუარესდა.
15 ნოემბრიდან მთელს ოკუპირებულ აფხაზეთში ელექტროენერგიის შეზღუდვები დაიწყო. დღე-ღამეში 6 საათით, თუმცა, ამან პრობლემა ვერ გადაწყვიტა - სისტემამ გადატვირთულობა გამოიწვია, რის გამოც დადგენილ 6 საათს დაზიანებული ხაზების შეკეთებისთვის საჭირო დრო ემატება.
მოსახლეობა აღშფოთებულია იმით, რომ ვიღაცა უკანონო შემოსავალს იღებს და ამ დროს მთელი რეგიონი დენის გარეშეა.
აფხაზეთის საბაჟო დეპარტამენტის ცნობით, სულ რესპუბლიკაში შემოტანილია კრიპტოვალუტების მოპოვებისთვის საჭირო 64 000 დანადგარი. მარტივი დასათვლელია, რომ საშუალოდ, ეს აღჭურვილობა 120 მეგავატს მოიხმარს, მაშინ, როდესაც აფხაზეთი ენგურჰესიდან 1300 მეგავატს იღებს.
ენერგეტიკოსები ამბობენ, რომ ყველანაირად ცდილობენ მოაგვარონ პრობლემა, რომელიც არა ამ წელს, არამედ გაცილებით უფრო ადრე გაჩნდა. კრიპტოფერმების წინაამღდეგ მიღებულმა ზომებმა გარკვეული შედეგები უკვე გამოიღო. ელექტროენერგიის დღიური გათიშვები 6-დან 4 საათამდე შემცირდა.
სახელმწიფო ენერგოკომპანია „ჩერნომორენერგოს“ მთავარი ინჟინრის თემურ კაციას თქმით, რომ არა გეგმიური გათიშვები, ენერგოსისტემას სრული კოლაფსი ელოდებოდა.
„ტრანსფორმატორი, რომელიც ენერგიას გაგრის და გუდაუთის რაიონებს აწვდის რამდენიმეჯერ გაითიშა 15-20%-ით გადატვირთულობის გამო. ენერგოსისტემა დღესაც გადაჭარბებული დატვირთვით მუშაობს და ეს ძალიან მაღალი რისკია. ტრანსფორმატორები დღესაც ყოველდღე ითიშება სხვადასხვა რაიონებში. ჯერ კიდევ ვინარჩუნებთ. იგი უკიდურესი გადატვირთულობის პირობებში მუშაობს“ - ამბობს ის.
სპეციალურმა კომისიამ 17-20 ნოემბერს 85 კრიპტოფერმა გათიშა, რომელიც ჯამურად 42 მეგავატს მოიხმარდა.
კომისიის ხელმძღვანელის დაურ დელბას თქმით, ეს საკმაოდ რთული საქმეა.
„რეიდები ყველა რაიონში მიმდინარეობს და ეს მუშაობა ენერგომომარაგების ნორმალიზებამდე გაგრძელდება. როდესაც ვსაუბრობთ მაინინგზე, ცხადია, რომ ყველა სადენი - უკანონოა. ზოგიერთი მსხვილი ფერმა პირდაპირ გადამცემ ხაზებთანაა მიერთებული, შესაბამისად, მათი მოხმარებაც გაცილებით მეტია. მთავარი სირთულე კი ისაა, რომ დიდი ფერმები იშლება და შემდეგ ჩვენ ვიღებთ არა ერთ დიდს, არამედ ათობით პატარა ფერმას, რომელიც საცხოვრებელ სახლში მდებარეობს“ - განაცხადა დელბამ.
მისი თქმით, დახურული ფერმების აღჭურვილობა არსად ქრება. მას სხვები ყიდულობენ და შემდეგ ეს აპარატურა სახლებში, ფარეხებში და სარდაფებში ნაწილდება.
„ჩვენთან თითქმის ყოველ მეორე სახლში კრიპტოვალუტის მაინინგის აპარატები დგას. ესაა ყველაზე დიდი პრობლემა, რადგანაც მათი აღმოჩენა ძალიან რთულია. ჩვენ საქმე არა 10 დიდ, არამედ 1000 პატარა ობიექტთან გვაქვს. რა თქმა უნდა, როდესაც ჩვენ ვხედავთ, რომ კონკრეტულ სახლში ძალიან ბევრი ელექტროენერგია იხმარება, ცხადია, იქ რაღაცა ხდება. მაგრამ კიდევ ერთხელ ვამბობ - საუბარია ათასობით ობიექტზე, ყველა სახლში შესვლა და შემოწმება გვიწევს. ჩვენი ძალები კი შეზღუდულია“ - ამბობს დაურ დელბა.
მისი თქმით, კიდევ ერთი პრობლემაა - გადამცემი ხაზების გადატვირთულობა.
„სადენები, რომლებიც შედის სახლებში 5-6 კილოვატის მოხმარებაზეა გათვლილი, რეალურად კი 20-30 კილოვატის გატარება უწევს. ეს ძალიან მაღალი რისკია, ერთხელაც სადენი დაიწვება და სახლი საერთოდ დენის გარეშე დარჩება“ - განაცხადა დელბამ.