ბოლო დღეებში ოკუპირებულ აფხაზეთში კორონავირუსით დაავადებულთა რაოდენობა მკვეთრად იზრდება - მაგალითად, 10 იანვარს 169 ახალი დაინფიცირებული გამოვლინდა. მათ შორის 13 ბავშვია.

ამ დროისთვის აფხაზეთში კორონავირუსით დაავადებულთა რაოდენობა 10 000-ს მიუახლოვდა, 141 ადამიანი გარდაიცვალა.

შექმნილი სიტუაციიდან გამომდინარე აფხაზმა ექიმებმა სპეციალური თათბირი ჩაატარეს და არ აღიარებულ მთავრობას შეზღუდვების 15 თებერვლამდე გახანგძლივების რეკომენდაციით მიმართეს.

დე ფაქტო რესპუბლიკის მთავარი სანიტარული ექიმის ლიუდმილა სკორიკის თქმით, ეპიდემიოლოგიური მდგომარეობა გაუარესებისკენ მიდის და ყველაზე საშიში ისაა, რომ დაინფიცირებულებს შორის სულ უფრო მეტი მოზარდი და ბავშვია.

„ბოლო დღეებში აფხაზეთი ეპიდემიოლოგიური ვითარება მკვეთრად გაუარესდა. ადგილი აქვს დაავადებულთა რაოდენობის ზრდას და ეს უკვე ახალგაზრდებს და ბავშვებსაც ეხება. სავარაუდოდ, ამის მიზეზია ახალი წელი და სადღესასწაულო წვეულებებია, რომლებიც რესტორნებში ტარდებოდა. დღეს არსებული ეპიდემიოლოგიური აფეთქება - სწორედ ამის შედეგია“ - მიიჩნევს სკორიკი.

მისი თქმით, პირველ რიგში პრობლემა ისაა, რომ არ აღიარებული აფხაზეთის ჯანდაცვის სისტემა დაავადებულთა ზრდადი ნაკადის მისაღებად მზად არაა. სექტემბერ-ოქტომბერში აფხაზ მედიკოსებს გუდაუთის კოვიდ-ჰოსპიტალში ჩამოსული რუსი სპეციალისტები ეხმარებოდნენ, თუმცა, მათ ოკუპირებული აფხაზეთი უკვე დატოვეს.

ამ ეტაპზე მთელი დატვირთვა სწორედ აფხაზ ექიმებს დააწვა.

„ადრე კორონავირუსი ტესტირებების 10-15%-ში დასტურდებოდა. დღეს კი ეს მაჩვენებელი 30%-მდეა გაზრდილი. ამიტომაც არ აღიარებული მთავრობის  ჯანდაცვის მინისტრიც და სანიტარული ექიმის აპარატიც დე ფაქტო მთავრობას შეზღუდვების გახანგძლივებას ურჩევს. მეტიც, ზომები უნდა გამკაცრდეს, კერძოდ, საზოგადოებრივი კვების ობიექტებთან მიმართებით. ყველა რესტორანი უნდა დაიხუროს და მხოლოდ მიტანის სერვისზე გადავიდეს. ასევე უნდა გამკაცრდეს ეპიდემიოლოგიური რეგულაციები საზოგადოებრივ ტრანსპორტში - კერძოდ, პირბადეების ტარება სავალდებულო  უნდა გახდეს“ - მიიჩნევს ლუიდმილა სკორიკი.

მისი თქმით, დღეს არსებული შეზღუდვები  როგორც მოქალაქეების, ასევე ბიზნესის მხრიდან სისტემატურად და უხეშად ირღვევა. აკრძალვის მიუხედავად, საახალწლოდ რესტორნებშიც და სახლებშიც ხალხმრავალი წვეულებები ტარდებოდა, მთელი დეკემბრის მანძილზე მოსახლეობა ქორწილებში და პანაშვიდებზე დადიოდა.

ოკუპირებული აფხაზეთის მთავარი სანიტარული ექიმის თქმით, მიდგომის გამკაცრება და ჯარიმების მკვეთრი ზრდა - არ აღიარებული პარლამენტის გადასაწყვეტი საკითხია.

„სამართალდამცავ ორგანოებს მუშაობა უჭირთ, რადგანაც ადმინისტრაციულ სამართალდარღვევათი კოდექსში ჯერ შესაბამისი ცვლილებები არაა შეტანილი. საჯარიმო სანქციები მინიმალურია - 1800 რუბლი, ეს სასაცილოა. ჩვენ ჯარიმის როგორც მინიმუმ, 50 000 რუბლამდე გაზრდას ვითხოვთ. დე ფაქტო მთავრობაში გვითხრეს, რომ შესაბამის კანონპროექტს მოამზადებენ და პარლამენტს წარუდგენენ“ - ამბობს სკორიკი.

„სტაციონარების გადატვირთულობა, სამედიცინო პერსონალის მწვავე დეფიციტი, მედიკოსების ფიზიკური გამოფიტვა, წამლების უკმარისობა - ეს ყველაფერი სასწრაფო და საგანგებო ზომებს, და მკაცრი კარანტინის შემოღებას საჭიროებს. პასუხისმგებელი უწყებების მხრიდან კონტროლის არარსებობის გამო, დაწესებული შეზღუდვები არ სრულდება, და ამიტომაც აუცილებელია დადგენილი ნორმების დარღვევისთვის ჯარიმების მკვეთრი ზრდა“ - ნათქვამია არ აღიარებული მთავრობისადმი მედიკოსების კოლექტიურ მიმართვაში.

30 დეკემბერს კორონავირუსი არ აღიარებული აფხაზეთის პრემიერ-მინისტრს ალექსანდრ ანკვაბს დაუდასტურდა. ამჟამად ის მოსკოვში მკურნალობს. მანამდე კი კორონავირუსი ოკუპირებული აფხაზეთის პრეზიდენტმა ასლან ბჟანიამ გადაიტანა.

წყარო:/www.ekhokavkaza.com