აფხაზეთი მზადაა რუსი ტურისტების მისაღებად მხოლოდ იმ შემთხვევაში, თუ ისინი წარადგენენ ცნობას, რომ კორონვირუსით დაავადებულები არ არიან - იუწყება სააგენტო «Интерфакс».
ეს მოთხოვნა ჩადებულია არაღიარებული რესპუბლიკის სანიტარულ-ეპიდემიოლოგიური სამსახურის რეკომენდაციათა ჩამონათვალში.
როგორც ნათქვამია დოკუმენტში, ცნობა, რომლის წარდგენაც ტურისტებს მოუწევთ, აფხაზეთში ჩასვლამდე მინიმუმ 3 დღით ადრე უნდა იყოს გაცემული. ამ სეზონზე ცნობას ყველა ტურისტულ ობიექტში მოითხოვენ - სასტუმროებში, ჰოსტელებში, პანსიონატებში, კერძო სახლებში თუ ბინებში.
ასევე პანდემიის დროს აკრძალულია უცხო ადამიანების ერთად ჩასახლება - ერთ ნომერში მხოლოდ მხოლოდ ოჯახის წევრების ყოფნაა შესაძლებელი.
მანამდე ოფიციალურმა სოხუმმა განაცხადა, რომ აფხაზეთი ერთ-ერთი პირველი ქვეყანა იქნება, რომელიც რუს ტურისტების მიიღებს.
თუმცა, ეს ასე არ მოხდა, რამაც აფხაზეთში ცხარე დებატები გამოიწვია. ერთიანი მიდგომა ამ საკითხისადმი არ არსებობს - აფხაზების ნაწილი თვლის, რომ საზღვრები რუსეთთან აუცილებლად უნდა გაიხსნას, წინაამღდეგ შემთხვევაში რესპუბლიკას ეკონომიკური კრახი ელის.
მეორე ნაწილი მიიჩნევს, რომ რუსეთისთვის კარების გახსნა ეპიდემიოლოგიურ მდგომარეობს აუცილებლად გაართულებს, ხოლო ისეთი მცირერიცხოვანი ერისთვის, როგორც აფხაზები, ეპიდემია შესაძლოა ფატალური კატასტროფა გახდეს.
შექმილი სიტუაციის გამო, აფხაზეთის და რუსეთის საზღვარზე გადაადგილება ყველასთვის მთლიანად დაკეტილია - სატვირთო გადაზიდვების, დიპლომატების და აფხაზეთში განლაგებული რუსული სამხედრო ბაზების ჯარისკაცების და მომსახურე პერსონალის გარდა.
ივლისში ოკუპირებული აფხაზეთის პრეზიდენტმა ასლან ბჟანიამ რუსეთის პრემიერ-მინისტრს მიხაილ მიშუსტინს წერილით მიმართა, სადაც გამოთქმული იყი უსაფრთხოების გარკვეული ზომებიც დაცვის შემთხვევაში საზღვრის გახსნის მზადყოფნა.
პრეზიდენტის პრეს-სამსახურის ინფორმაციით, ამ საკითხზე მოლაპარაკებები უკვე მიმდინარეობს. თუმცა, საქმე არც თუ ისე მარტივადაა, რადგანაც რუსეთის თავის მხრივ საზღვრების გახსნას არ ჩქარობს.
როსპოტრებნადზოი საზღვრების გახსნის სანაცვლოდ აფხაზეთისგან გარკვეული პირობების შესრულებას თავად ითხოვს - კერძოდ, აფხაზეთის სანეპიდემსამსახურს 100 000 მოსახლეზე კორონავირუსზე დღე-ღამეში 140 ადამიანის შემოწმების შესაძლებლობა უნდა ჰქონდეს.
ამ დროისთვის, ოკუპირებული აფხაზეთის მთავარი სანიტარული ექიმის ლუდმილა სკორიკის თქმით, რესპუბლიკა 50-70 კვლევასაც ვერ ატარებს.
მისი თქმით, რუსეთის მოთხოვნის შესასრულებლად საჭიროა 3 ლაბორატორია სადღეღამისო მორიგეობით. თანაც იქ მუშაობისთვის ყველანაირი პირობები უნდა იყოს მზად. მათ ასევე სჭირდებათ ძვირადღირებული აპარატურა და მასალები.
მოამზადა თენგიზ აბლოთიამ