ოკუპირებული აფხაზეთის ტურიზმის სამინისტრო რუსეთთან საზღვრის გახსნის შემდეგ ეპიდემიოლოგიური უსაფრთხოების ზომებს ამკაცრებს.
ტურიზმის მინისტრის მოადგილის დათო ქაჯაიას თქმით, უწყების შესაძლებლობები შეზღუდულია. ბევრი რამ თავად მოქალაქეების თვითშეგნებაზე და მათი მხრიდან რეკომენდაციების შესრულებაზეა დამოკიდებული.
საზღვრის გახსნას ათასობით ადამიანი მოუთმენლად ელოდა. ოკუპირებული აფხაზეთის დე-ფაქტო პრეზიდენტის ასლან ბჟანიას გადაწყვეტილება ამ საკითხზე ჯერ კიდევ მიღებული არ იყო, როდესაც საზღვარს ათასობით რუსი ტურისტი მიადგა.
პირველ დღეს ფსოუს გამშვები პუნქტი რუსეთის 7500 მოქალაქემ გადაკვეთა. სოჭის საბაჟოს ინფორმაციით 1 აგვისტოს აფხაზეთში რუსეთიდან 6500 მსუბუქი ავტომობილი, 370 სატვირთო მანქანა და 190 ავტობუსი შევიდა. ადამიანების და ავტოტრანსპორტის ეს ნაკადი აფხაზი მედიკოსებისთვის უსიამოვნო სიურპრიზი აღმოჩნდა.
მეორე დღეს, 2 აგვისტოს ამ საკითხზე სპეციალური ოპერატიული შტაბის სხდომა ჩატარდა, რომლის მთავარი თემაც კორონავირუსის შესაძლო ახალი აფეთქების თავიდან აცილება იყო. ჯანდაცვის მინისტრის მოადგილის ალხას კონჯარიას თქმით, აფხაზეთში დაინფიცირებულთა რაოდენობა საგანგაშო ტემპებით იზრდება და თუ ადგილობრივ პაციენტებს შემოსულები დაემატება, ჯანდაცვის სისტემა პარალიზებული იქნება და დახმარებას ვერავის გაუწევენ.
აფხაზეთის ჯანდაცვის სამინისტროს მთავარი თერაპევტის ანჟელა დარჩელიას თქმით, ვირუსი უფრო აგრესიული გახდა, და ავადმყოფების მდგომარეობა სწრაფად უარესდება. მისი თქმით, საჭიროა ახალი, მოქნილი სისტემის შექმნა, რომელიც მსუბუქი პაციენტების სახლში მკურნალობას უფრო ეფექტურს გახდის.
ოკუპირებული აფხაზეთის დე-ფაქტო პრემიერ-მინისტრის ალექსანდრ ანქვაბის რეაქცია მოულოდნელი აღმოჩნდა. მან მედიკოსები მკაცრად გააკრიტიკა და ისინი პანიკის დათესვაში დაადანაშაულა.
„საკოორდინაციო შტაბის ყველა წევრმა იცოდა, რომ რუსეთთან საზღვრის გახსნა იგეგმებოდა, თუმცა, ამ საკითხზე მოლაპარაკებების დროს თავიანთი ეჭვები არ გამოუთქვამთ. ის, რომ აფხაზეთში კადრების პრობლემაა და ჩვენ ეპიდემიის წინაამღდეგ ბრძოლისთვის სრულად მზად არ ვართ - ახალი ამბავი არაა. თუ ზოგიერთმა ხელმძღვანელმა ეს გუშინ გაიგო, გამოდის ის ცუდი ხელმძღვანელი ყოფილა. იქმნება შთაბეჭდილება, რომ ისინი ეპიდემიოლოგიური სიტუაციის გაუარესების შემთხვევისთვის თავს იზღვევენ. სხვა ახსნა არ არსებობს“, - განაცხადა ანქვაბმა.
ტურიზმის მინისტრის მოადგილემ დათო ქაჯაიამ განაცხადა, რომ რუსეთიდან შემოსული ყველა ტურისტი უსაფრთხოების ზომების შესახებ სრულადაა ინფორმირებული.
„4 აგვისტოს მდგომარეობით აფხაზეთში 17-18 ათასი რუსი ტურისტი შემოვიდა, დღეში საშუალოდ 30 საექსკურსიო ავტობუსი შემოდის. ისინი ძირითადად მდინარე რიწაზე და ახალი ათონის მღვიმეში ნაწილდებიან. ვიზიტორების რაოდენობა ყოველდღიურად იზრდება და ყველა საექსკურსიო ჯგუფმა შესაბამისი რეკომენდაციები მიიღო. კერძოდ, მძღოლებისთვის და გიდებისთვის სავალდებულოა პირბადის ტარება. ტურისტულ ობიექტებზე ჩვენი სამინისტროს წარმომადგენლები უსაფრთხოების ზომების შესრულებას გააკონტროლებენ“,- განაცხადა მან.
სამინისტრო ყველა უცხოელ მოქალაქეს პირბადის ტარებას და დისტანციის დაცვას ურჩევს. დათო ქაჯაიას თქმით, ეს ზომები სარეკომენდაციო ხასიათისაა, რადგანაც შეუძლებელია ადამიანების იძულება პირბადეები ატარონ.
„ჩვენი სამინისტრო რეკომენდაციების შესრულებას გააკონტროლებს, თუმცა, ჩვენი ძალები ამისთვის საკმარისი არაა. ჩვენ ვიცოდი, რომ საზღვარი გაიხსნებოდა, ოღონდ არ ვიცოდით, რომ ეს ასე სწრაფად და ერთბაშად მოხდებოდა“, - განაცხადა ქაჯაიმ.
გარდა ამისა, აფხაზეთისთვის სამედიცინო დახმარების გაწევის მზადყოფნას რუსეთიც გამოთქვამს. ქვეყნის ჯანდაცვის მინისტრის მოადგილემ ოქსანა გუსევამ განაცხადა, რომ სოჭში ერთ-ერთ ინფექციურ საავადმყოფოში აფხაზეთში დაინფიცირებულებისთვის სპეციალური განთავსების ადგილებია მომზადებული.
„თუმცა, სადღეისოდ ამის აუცილებლობა არაა. აფხაზეთის კლინიკებში საკმარისი ადგილებია და იმედია უკიდურესი ზომები საჭირო არ გახდება“, - განაცხადა მან.
მინისტრის მოადგილის თქმით, ამ კვირაში სოხუმში მოსკოვიდან მედიკოსების სპეციალური ბრიგადა ჩავა, რომელიც ადგილობრივ ექიმებს ინფექციის შეკავებაში დაეხმარება.
ამ დროისთვის აფხაზეთში კორონავირუსით 32 ადამიანი დაავადდა, 3 პაციენტი გარდაიცვალა.
წყარო Ekhokavkaza.com
მოამზადა თენგიზ აბლოთიამ
აფხაზეთი
