აფხაზეთის დე ფაქტო მთავრობამ 2021-2022 წლების შემოდგომა-ზამთრის სეზონზე ქაფშიას მოპოვება შეზღუდა და წესები გაამკაცრა. მიზეზად წყლის ბიორესურსის შეზღუდული რაოდენობა სახელდება. ამის შესახებ ინფორმაციას „აფსნიპრესი“ ავრცელებს.
აფხაზები შარშანდელი სეზონის თევზჭერის მონაცემებს საგანგაშოდ მიიჩნევენ. დე ფაქტო მთავრობის სოფლის მეურნეობის მინისტრ ბესლან ჯოპუას მონაცემებით, გასულ წელს 11 ათას ტონაზე ნაკლები ქაფშია იქნა დაჭერილი, რაც რეკორდულად დაბალი მაჩვენებელია. ჯოპუა ამის მიზეზად მოძველებულ მოქმედ კანონმდებლობას ასახელებს, რომელიც გასული საუკუნის 60-70-იან წლებში არის მიღებული და უკანონო თევზჭერაზე, ბრაკონიერობაზე მაქსიმალურ სასჯელად მხოლოდ ადმინისტრაციული პასუხისმგებლობა და უმნიშვნელო ჯარიმები არის დაწესებული.
ახალი წესებით, მიმდინარე სეზონისთვის ქაფშიას თევზჭერის დასაშვები ზღვარი 31 ათასი ტონა, ხოლო რეკომენდირებული თევზჭერის მოცულობა 25 ათასი ტონა იქნება, საერთო მარაგის მოცულობად კი 90 ათასი ტონა განისაზღვრა. დე ფაქტო მინისტრთა კაბინეტის მიერ ახალი წესების დამტკიცებამდე, აფხაზებმა ისინი, როგორც წესი, რუსებთან შეათანხმეს.
2021-2022 წლების შემოდგომა-ზამთრის სეზონზე აფხაზეთში ქაფშიას რეკომენდირებული დაჭერის მოცულობა მეთევზეობის აფხაზურ-რუსული კომისიის მეშვიდე სესიაზე განისაზღვრა, რომელიც სექტემბრის ბოლოს გაიმართა და მუშაობა ერთობლივი ოქმის ხელმოწერით დაასრულა.
„მეჩვენება, რომ ეს არის ქაფშიას მაქსიმალური რაოდენობა, რისი დაჭერაც შავი ზღვის სანაპიროზე უნდა იქნეს დაშვებული. ჯერ კიდევ საბჭოთა დროის კვლევების თანახმად, აფხაზეთის შავი ზღვის სანაპიროზე მთლიანი მოცულობის 25%-ზე მეტის დაჭერა არავითარ შემთხვევაში არ შეიძლება, რადგან ქაფშიას მეურნეობა საგრძნობლად შემცირდება,“ - აცხადებს რუსულ რადიო „სპუტნიკთან“ ინტერვიუში აფხაზეთის თევზაობისა და ნადირობის სპორტის დე ფაქტო ფედერაციის პრეზიდენტი, ალბერტ ბონდარენკო.
მისი მონაცემებით, ორი წლის წინათ აფხაზეთის წყლებიდან 70 ათასი ტონა ქაფშია ამოიღეს მაშინ, როცა რეკომენდაციები 22-25 ათასი ტონაზე იყო გაცემული. ამის შედეგად ერთი წლის განმავლობაში ზღვა ნახევრად ცარიელი იყო.
„შარშან სეზონი, ფაქტობრივად, ჩავარდა, რადგან უკანონო თევზჭერის გამო ქაფშია აღარ დარჩა. თუ წესებს არ დავიცავთ, ცარიელ ზღვას მივიღებთ,“ - აცხადებს ბონდარენკო.
მისი პროგნოზით, წლევანდელ სეზონზე ქაფშიას მოპოვება აფხაზეთში წინა წლების ანალოგიურად რეკორდულად დაბალი იქნება.
„მეთევზეებს გემებზე ეკოლოგები არ ჰყავთ, რომლებიც დაჭერილი თევზის რაოდენობას გააკონტროლებდნენ. ასევე, არც ერთი ეკოლოგი არასდროს არ იმყოფებოდა ქარხნებში თევზის გადაზიდვის დროს. ქარხნების დიდი რაოდენობა არარენტაბელურია, რადგან თითოეულს მხოლოდ 4-5 ათასი ტონა თევზი მიეწოდება. იმისათვის, რომ ქარხანამ იმუშაოს ნულზე, ანუ მხოლოდ ხელფასები და დენის გადასახადი გადაიხადოს, მან უნდა გადაამუშაოს 7-დან 8 ათას ტონამდე თევზი. მარტივი მათემატიკაა: ჩვენ უნდა გავამრავლოთ 7-დან 8 ათასი ტონა ქარხნების რაოდენობაზე და მივიღებთ კვოტას, რომელიც მეთევზეებმა უნდა დაიჭირონ,“ - აცხადებს ბონდარენკო.
აფხაზეთის ეკოლოგიის ინსტიტუტის დირექტორი, რომან დბარი მიიჩნევს, რომ ბიორესურსების, განსაკუთრებით კი ქაფშიას რაოდენობის შემცირება სერიოზული სიგნალის მაჩვენებელია.
„ეს ფაქტორი სერიოზულად საგანგაშოა, რადგან შესამჩნევად მცირდება ბიოლოგიური რესურსები და, პირველ რიგში, ქაფშია. გასულ წელს აზოვის ზღვიდან აზოვის ქაფშიას მხოლოდ 1,3%-მა შემოცურა ჩვენთან მაშინ, როცა ეს მაჩვენებელი ზამთრის სეზონზე, როგორც წესი, დაახლოებით, 20-25%-ს შეადგენდა,“ - აცხადებს რომან დბარი.
bpn.ge