მალე თბილისთან ახლოს ახალი აეროკლუბი 1*209 (ერთი ორას ცხრა) გაშენდება. აეროკლუბის დაარსების იდეა სფეროთი დაინტერესებულ რამდენიმე ადამიანისგან შემდგარ ჯუფს გაუჩნდა.
1*209 (ერთი ორას ცხრა) – ამ სახელის უკან ცნობილი მფრინავი ბესარიონ ქებურია დგას. ის იყო პირველი ქართველი, რომელმაც ოფიციალურად მიიღო მფრინავის დიპლომი პარიზში და მსოფლიოს 209-ე პილოტი გახდა. სწორედ ამას უკავშირდება კლუბის სახელის წარმომავლობა.
„კომერსანტი“ აეროკლუბის ერთერთ თანადამფუძნებელს ილია ინჯიას გაესაუბრა, რომელიც აღნიშნავს, რომ კლუბი 1 თვის წინ დარეგისტრიდა და მიზნად ისახავს რეგიონებს შორის თვითმფრინავით გადაადგილებისა და ავიაციის პოულარიზაციას.
„ჩვენი პატარა ქვეყნისთვის ვფიქრობთ, რომ ლანდშაფტიც და პირობებიც ძალიან საინტერესოა, ვიფიქრეთ რომ ეს სფერო განვითარებადია და ამას მომავალი ექნებოდა. 2019 წლის დეკემბერში დავიწყეთ და 1 მაქსიმუმ 2 თვეა რაც დავარეგისტრირეთ ჩვენი აეროკლუბი. კლუბში მოსული სტუმარი პირველ რიგში გაეცნობა ავიაციას,, შეძლებს პილოტთან ერთად თვითმფრინავით გასეირნებას, ქვეყნის დათვალიერებას.
ამ დიდი საქმისთვის, მარტო თავის გართმევა ძალიან ძნელია, სწავლის პერიოდში აღმოჩნდა, რომ ჩვენსავით ფრენით შეპყრობილი ადამიანებიც ყოფილან და შევიკრიბეთ 8-9 ადამიანი, ვინც ჩამოვაყალიბეთ და დავნიშნეთ კლუბის პრეზიდენტად ანზორ ყურაშვილი. ჯერჯერობით საიტიც და პროექტიც დამუშავების პროცესშია,“ - განმარტავს ილია ინჯია.
აეროდრომის ადგილმდებარეობა ჯერჯერობით განხილვის პროცესშია, თუმცა როგორც კლუბში აღნიშნავენ, ეს იქნება თბილისთან ახლოს და სავარაუდოდ ბაზისთვის მოხდება ძველი საბჭოთა აეროდრომის რეაბილიტაცია.
„ იმის პერსპექტივა, რომ ყველა რეგიონში პატარ-პატარა აეროდრომები აშენდეს საქართველოში ნამდვილად არის, ეს ხელს შეუწყობს მცირე საჰაერო გადაზიდვებს და ასევე ამ მიმართულებით განავითარებს ტურიზმს.
ახლა ძიების პროცესში ვართ, თუ სად გვქონდეს პირველი ბაზა, ვცდილობთ რომ თბილისთან ახლოს იყოს. სახელმწიფოს აქვს ბევრი საბჭოთა დროინდელი მიტოვებული აეროდრომები და ვფიქრობთ რამდენიმეს რეაბილიტაციას,“ - განმარტავენ აეროკლუბში.
პროექტის საინვესტიციო მოცულობა დაახლოებით ნახევარი მილიონიდან ერთ მილიონ ლარამდე თანხას შეადგენს. რაც შეეხება თვითმფრინავებს, ილია ინჯიას თქმით მოლაპარაკებები მიმდინარეობს რამდენიმე კომპანიასთან , მათ შორის ერთერთი საბერძნეთში მდებარეობს, სწორედ მათგან იგეგმება პირველი თვითმფრინავის Cessna 72 ის შეძენა.
მარიამ მორგოშია