დეკემბრის შუა რიცხვებში საცხოვრებელი ფართების დაჯავშნის სერვისი Airbnb-ი თავისი აქციების გასაყიდად გამოტანის პროცედურას დაასრულებს. პირველ ეტაპზე საუბარი იყო 30 მლრდ. დოლარის ფასიან ქაღალდებზე, დღეს კი - 35 მლრდ-ის.
წერილში, რომელიც კომპანიის პრეზიდენტმა ბრაინ ჩესკიმ ბირჟების და ფასიანი ქაღალდების კომისიას გაუგზავნა, ნათქვამია, რომ აქციების განთავსება ჯერ კიდევ მარტში იგეგმებოდა, თუმცა ეს გეგმების პანდემიამ ჩაშალა.
„როდესაც საზღვრები დაიკეტა და მოგზაურობები შეწყდა, ჩვენი ბიზნესი 80%-ით ჩამოიშალა. ალბათ არავინ არ ელოდა, რომ ჩვენ აქციების განთავსების შესაძლებლობა გვექნებოდა. იმ დროს ჩვენი გადარჩენის საკითხი იდგა“ - წერს ჩესკი.
დიდი წარმატების ისტორია 2007 წელს, სან-ფრანცისკოში დაიწყო, როდესაც დიზაინერთა საერთაშორისო კონგრესის დროს ქალაქში სასტუმროები გადაივსო და 26 წლის ბრაიან ჩესკიმ და ჯო გებიამ ბინის გასაქირავებლად მარტივი საიტი AirBedandBreakfast.com შექმნეს.
საიტის გაშვებიდან რამდენიმე საათში მათ პირველი კლიენტი გამოუჩნდათ, რომელმაც რამდენიმე ღამე მათ ბინაში, გასაბერ ლეიბზე გაატარა.
2009 წლის მარტისთვის საიტზე უკვე განთავსებული იყო 2500 ბინა და სახლი, 2012-ში კი კომპანიამ 10 ქვეყანაში წარმომადგენლობები გახსნა და ასობით თანამშრომელი დაიქირავა. 2019 წლისთვის Airbnb-ს მომსახურებით ყოველდღიურად 2 მლნ.-მდე ადამიანი სარგებლობდა.
2020 წლის სექტემბრისთვის საიტის მონაცემთა ბაზაში თავმოყრილი იყო ინფორმაცია 7,4 მლნ. გასაქირავებელ სახლზე და ბინაზე.
მოკლედ, ყველაფერი ძალიან კარგად მიდიოდა, 2020 წელს კი კორონავირუსმა საერთაშორისო მოგზაურობების ინდუსტრიას და მასთან ერთად Airbnb-ს დიდი ზიანი მიაყენა. გაყიდვების მოცულობა, რომელიც 2020 წლის მე-4 კვარტალში 1,1 მლრდ. დოლარს შეადგენდა, 2020 წლის მე-2 კვარტალში 576 მლნ. დოლარის ზარალით დასრულდა.
ბრაიან ჩესკიმ სწრაფი რეაგირება მოახდინა - პერსონალი მეოთხედით შეამცირა, მარკეტინგის და რეკლამის დანახარჯები თითქმის გაანულა და ინვესტორებს დამატებით თანხები მოსთხოვა.
აპრილში Airbnb-მ ინვესტორებისგან 2 მლრდ. დოლარის სესხი მიიღო და სტრატეგია შეცვალა - თუ აქამდე მისი შემოსავლის ძირითად წყაროს დიდ ქალაქებში ჩასული საერთაშორისო ტურისტები წარმოადგენდნენ, პანდემიის პერიოდში პრიორიტეტი შეიცვალა.
ამჟამად Airbnb-ს ძირითადი კლიენტები არიან ის ადამიანები, ვინც პანდემიისგან გაქცევას დიდი მეგაპოლისებისგან დაშორებულ პატარა ქალაქებში და სოფლებში ცდილობენ. სტრატეგიამ ძალიან კარგად იმუშავა - 2020 წლის მე-3 კვარტალში კომპანიის გაყიდვები 1,3 მლრდ. დოლარს მიაღწია. ეს მესამედით ნაკლებია ვიდრე 2019 წლის ანალოგიურ პერიოდში, თუმცა, მთავარია, რომ Airbnb-მ უარყოფითი ტრენდი დაძლია, და ახალ პირობებში მუშაობა ისწავლა.
2020 წლის მე-3 კვარტალში კომპანია უკვე მოგებაზე გავიდა, მაგრამ მენეჯმენტი ამაში საკმაოდ მაღალ ფასს იხდის - ბრაიან ჩესკიმ და კომპანიის დანარჩენმა 2-მა თანადამფუძნებელმა საკუთარ ხელფასზე უარი განაცხადეს, სხვა ტოპ-მენეჯერების გასამსჯელო კი 50%-ით შემცირდა.
თუმცა, თავად ჩესკი და კოგეგები ამით დიდად არ დაზარალდებიან, რადგანაც მათი შემოსავლის ძირითადი წყარო არა ხელფასებია, არამედ წილები Airbnb-ში. სამივე Forbes-ის სიაში 268-ე ადგილზეა, სამივეს ქონება 3-3 მლრდ,, დოლარია.. ასე რომ, მთავარია კომპანია პანდემიას გადაურჩეს- წაგებაში არავინ დარჩება.
„პანდემია Airbnb-ს ზრდას ხელს ვერ შეუშლის. მოგზაურობები ძველებური გაგებით ნაკლებია, თუმცა, გაცილებით მეტია ადამიანი, ვინც დისტანციური მუშაობის წყალობით საცხოვრებელ ადგილს ხშირად იცვლის. ადამიანები ქალაქიდან ქალაქში გადადიან, მსოფლიოს მოქალაქეები და ციფრული მომთაბარეები ხდებიან. განსხვავება სამუშაოს და მოგზაურობას შორის დღეს ისე მცირეა, როგორც არასდროს. ასე რომ ადამიანის მისწრაფებას მოგზაურობისადმი ვერაფერი მოსპობს“ - თვლის ბრაიან ჩესკი.
Forbes.ru
მოამზადა თენგიზ აბლოთიამ