ინჟინერმა კენ სოლისნკიმ თავისი ტექნოლოგიური გამოცდილებით შექმნა უხილავი „ჭკვიანი ვოლიერი“ ძაღლებისთვის, რომელიც სხვა ასეთი ტიპის ღობეებისგან განსხვავებით, უსადენოა.
ეს იდეა ინჟინერს 2010 წელს მოუვიდა, როდესაც სარწყავი სისტემის დიზაინზე მუშაობდა და რამდენჯერმე შემთხევით უხილავი ვოლიერების (ე.წ. ელექტრონული მწყემსის სისტემის) სადენები გადაჭრა. სწორედ მაშინ დაფიქრდა - რატომ არ შეიძლება ასეთივე ვოლიერის გაკეთება, მაგრამ უსადენოს?
2019 წელს მან დიდი ხნის ფიქრისა და ექსპერიმენტების შემდეგ, შექმნა „ჭკვიანი ვოლიერის“ სისტემა - ვოლიერის ერთჯერადი ღირებულება 1495 დოლარია, ასევე გათვალისწინებულია სააბონენტო გადასახადი - თვეში 6 დოლარი სისტემის მომსახურეობისთვის.
შედარებისთვის - ჩვეულებრივი უხილავი გალია 200 დოლარი ღირს.
ახალმა პროდუქტმა დიდი პოპულარობა მოიპოვა და მისი მწარმოებლის, კომპანია OnPoint Systems-ის შემოსავალმა 2019 წელს თითქმის 2 მლნ. დოლარი შეადგინა. ამ დროისთვის სულ 5000 ელექტრონული ღობე გაიყიდა.
2020 წელს სოლინსკი გაყიდვების ზრდას პროგნოზირებს - პანდემიის გამო ადამიანები ცხოველებთან მეტ დროს ატარებენ შესაბამისად, ამ ტიპის პროდუქტებზე მოთხოვნა ლოგიკურად გაიზრდება.
ანალიტიკური კომპანია Packaged Facts-ის კვლევის თანახმად, ცხოველების განთავსების ელექტრონული სისტემების გაყიდვები 2020 წელს 13%-ით გაიზრდება და 555 მლნ. დოლარს მიაღწევს.
შინაური ცხოველებისთვის საქონლის მწარმოებელთა ამერიკული ასოციაციის ინფორმაციით, შტატებში ჯერ კიდეც პანდემიამდე, ცხოველების პატრონთა 6%, ანუ 4 მლნ. ოჯახი, სხვადასხვა ტიპის ელექტროვოლიერებს იყენებდა. სოლინსკი მიიჩნევს, რომ მისი გამოგონების წყალობით ამ მაჩვენებლის 10%-მდე გაზრდაა შესაძლებელი.
უხილავი ღობე ბაზარზე პირველად 1973 წელს გამოჩნდა, დღეს კი ამ სისტემების მწარმოებლები - Invisible Fence, PetSafe და SportDog - საინვესტიციო კომპანია Radio Systems Corp.-ის სტრუქტურაში შედიან.
კლასიკური ღობე მოქმედებს მარტივად- თუ ძაღლი უხილავ ბარიერს გადალახავს, ის დენის მსუბუქ დარტყმას მიიღებს.
კენ სოლინსკი ამ ბიზნესი ახალბედა არ არის - ის ფლობდა კომპანია L-3-ს, რომელიც ამერიკული ჯარისთვის ელექტრონულ და ოპტიკურ აღჭურვილობას აწარმოებდა.
„ჩვენს მოწყობილობებს თითქმის ყველა ამერიკელი ჯარისკაცი იყენებს“ - ამაყობდა სოლინსკი თავისი კომპანიით, რომლის მან 2010 წელს 300 მლნ. დოლარად გაყიდა.
შემდეგ მან კომპანია OnPoint დაარსა, ტექნიკური დირექტორის პოსტზე L-3-ს ინჟინერი სუნგრუ ვივიტანე დანიშნა და მუშაობას შეუდგა.
მომავალში სოლინსკი ბაზარზე ცხოველებთან დაკავშირებული ახალი ტექნოლოგიების გამოტანას აპირებს თუმცა, ჯერ არაა მზად თქვას თუ რა ინოვაციაზეა საუბარი და ეს ინოვაციები კონკრეტულად როგორი იქნება.
„რა თქმა უნდა კარგია მოგების მიღება, თუმცა, ჩვენთვის შინაური ცხოველების ყოფის გაუმჯობესებაც ძალიან მნიშვნელოვანია“ - ამბობს კენ სოლინსკი.
Forbes.ru
მოამზადა თენგიზ აბლოთიამ
ვოლიერები
