აჭარის მთავრობა ბათუმში, კოწია ერისთავის ქუჩა N14-ში მდებარე 938,6 კვ.მ შენობა-ნაგებობ(ებ)ისა და მათზე დამაგრებული 10 855 კვ.მ არასასოფლო-სამეურნეო დანიშნულების მიწის ნაკვეთის განაშენიანებისთვის და აღნიშნულ ტერიტორიაზე ეკონომიკური საქმიანობის წარმოებისთვის ინვესტორს ეძებს.

ობიექტი ელექტრონულ აუქციონზეა გამოტანილი და მისი საწყისი ღირებულება 1 520 000 ლარია. აუქციონის პირობების მიხედვით, საპრივატიზებო საფასურის გადახდა 3 ეტაპად უნდა მოხდეს და თანხა 2024 წლის 1 ივნისამდე დაიფაროს. იმავდროულად, აუქციონში გამარჯვებული სუბიექტი ვალდებულია ხელშეკრულების გაფორმებიდან 12 თვის ვადაში მუნიციპალიტეტის საკრებულოს მიერ აღნიშნული ტერიტორიისთვის (ზონა) დაშვებული ობიექტის (გარდა საცხოვრებელი სახლების/აპარტამენტების) მშენებლობის ნებართვის მიღება და ხელშეკრულების გაფორმებიდან არუაგვიანეს 36 თვის ვადაში ექსპლოატაციაში მიღება/ამოქმედება უზრუნველყოს. სადაც დასაქმებულთა არანაკლებ 90%-ი უნდა შეადგენდეს საქართველოს მოქალაქეებს.

საპრივატიზაციო პირობების მიხედვითვე, დასაქმებულთა თანაფარდობის და საწარმოს პროფილის შენარჩუნება ობიექტის ამოქმედებიდან არანაკლებ 15 წლის განმავლობაში უნდა მოხდეს. ხოლო პროექტში არაუგვიანეს 36 თვის ვადაში არანაკლებ 500 000 ლარის ინვესტიციის განხორციელება უნდა დაფიქსირდეს.

ბათუმში, კოწია ერისთავის ქუჩა N14-ში მდებარე ლოტის გასხვისებას აჭარის ფინანსთა და ეკონომიკის სამინისტრო 15 თებერვლისთვის ჩანიშნულ აუქციონზე გეგმავს.