15 ივნისს, აჭარაში ზაფხულის ტურისტული სეზონი ოფიციალურად გაიხსნება. ინფორმაციას აჭარის ტურიზმისა და კურორტების დეპარტამენტი ავრცელებს.

გახსნის დღისთვის ბათუმის ბულვარში სხვადასხვა ღონისძიებებია დაგეგმილი. მათ შორის იქნება ფრანების შოუ ზღვის სანაპიროზე, მოძრაობის თეატრის პანტომიმა, მოსწავლე-ახალგაზრდობის სასახლის ავიაშოუ ანბანის კოშკთან, ბალეტი ღია ცის ქვეშ და DJ საზაფხულო თეატრთან.

სპეციალურად სეზონის გახსნისთვის რეგიონში მოქმედ ყველა მუზეუმში, პეტრას ციხესა და გონიო აფსაროსის ციხე-მუზეუმში შესვლა იქნება უფასო. ბათუმის სახელმწიფო დრამატული თეატრის ეზოში სტუმრებისთვის გაიმართება სპექტაკლი „ჰელადოსი“, რომელზე დასწრებაც ასევე ნებისმიერ მსურველს შეეძლება.

„15 ივნისს, აჭარაში ზაფხულის ტურისტული სეზონი ოფიციალურად გაიხსნება, რაც ნიშნავს რომ, პანდემიის პარალელურად კვების, განთავსების და სხვა სერვისების მიმწოდებლების მიერ დანერგილია ის სტანდარტი, რაც ვიზიტორების უსაფრთხოდ მიღებისთვის არის საჭირო. წელს, ტურისტული სეზონი და ვიზიტორების მიღება განსაკუთრებულ პასუხისმგებლობას გვანიჭებს. ჩვენ მოგზაურებს ველოდებით, როგორც ჩვენი მეზობელი, ისე იმ სამიზნე ქვეყნებიდან, საიდანაც ბათუმის მიმართულებით რეგულარული ფრენები ხორციელდება. რეგიონის სტუმრებს ზღვის ტურისტულ პროდუქტებთან ერთად მრავალფეროვან ტურისტულ მიმართულებებს ვთავაზობთ მთიან აჭარაში, სადაც ახალი ტურისტული მარშრუტები და პროდუქტები განვავითარეთ,“ განაცხადა აჭარის ტურიზმის დეპარტამენტის ხელმძღვანელმა თინათინ ზოიძემ.

პროგრამა

ზღვის სანაპირო, კოლონადებთან

• ფრანების შოუ სანაპიროზე 12:00 – 20:00

საზაფხულო თეატრთან

• DJ 12:00 – 22:00

• ბალეტი ღია ცის ქვეშ 16:30 – 17:30

ზღვის სანაპირო ანაბანის კოშკთან -

• საზღვაო ტურისტული სეზონის ოფიციალური გახსნა, ჯაზ ბიგ ბენდის თანხლებით 16:00 – 16: 30

• პანტომიმა - მოძრაობის თეატრი საზღვაო თემატიკით 16:00 -17:30

ანბანის კოშკთან

• მოსწავლე -ახალგაზრდობის სასახლის ავია შოუ 16:00 – 17:00

დრამატული თეატრის ეზოში

• სპექტაკლი „ ჰელადოსი“ 20:30 – 22 :00

ბათუმის მუზეუმებში, პეტრასა და გონიოში შესვლა უფასოდ

• 10:00 – 20:00

ბულვარი, კოლონადებთან

• ფოიერვერკი 22:00

imedinews.ge