აბასთუმანში „მარიოტი“-ს საერთაშორისო ქსელის უმაღლესი კლასის Autograph Collection-ის 5 ვასრკვლავიანი სასტუმრო 2022 წლის გაზაფხულზე, დათქმულ ვადებში გაიხსნება. ამჟამად მიმდინარეობს კონსტრუქციული სამუშაოების დასრულების ეტაპი.
როგორც, თანაინვესტირების ფონდში „კომერსანტს“ განუცხადეს, სასტუმროს მშენებლობის პროცესი პანდემიის გამო გარკვეული პერიოდით შეფერხდა, თუმცა დასრულების ვადა ამ ეტაპზე უცვლელია.
პროექტის დაწყების პირველ ეტაპზე სასტუმროს დასრულების თარიღად 2021 წელი დაანონსდა, თუმცა 2019 წლის ზაფხულში ვადა დაკორექტირდა.
Autograph Collection - ის სასტუმროში 150 ნომერი განთავსდება. ამ ეტაპზე, სასტუმროს ნომრის ფასი არ არის დადგენილი. როგორც ფონდში განმარტავენ, სასტუმროს ნომრის ღირებულება დამოკიდებული იქნება გახსნისას ბაზარზე არსებულ მდგომარეობაზე.
პროექტის მშენებლობის ეტაპზე 300 ადამიანი დასაქმდება, ხოლო სასტუმროს ამოქმედების შემდგომ 200-მდე ახალი სამუშაო ადგილი შეიქმნება. აღსანიშნავია, რომ საუბარი იყო 400 სამუშაო ადგილის შექმნაზე, თუმცა ეს მაჩვენებელიც ცოტა ხნის წინ დაკორექტირდა.
„მოგეხსენებათ, ჩვენი პროექტის გარდა, აბასთუმანში მიმდინარეობს კურორტის სრული რეაბილიტაციის პროცესი. ვფიქრობთ, რომ აბასთუმანი განსაკუთრებული ადგილია ვინაიდან მას აქვს ძალიან მდიდარი ისტორია და თავს უყრის ისეთ მრავალმხრივ საინტერესო შენობებს და ძეგლებს როგორიცაა სამეფო აბანო, მეფის სასახლე, ასტროფიზიკური ობსერვატორია. ამასთანავე, აბასთუმანში გამორჩეული მთის კლიმატია, შედარებით მშრალი ჰავა და სუფთა ჰაერი, ჟანგბადის გაცილებით მაღალი შემცველობით. აბასთუმნის გარშემო კი, 1-2 საათის სავალზე შესაძლებელია ისეთი ისტორიული ძეგლებისა და მონასტრების დათვალიერება, როგორიცაა ვარძია, საფარის მონასტერი, რაბათის ციხე და მრავალი სხვა. ამასთანავე, როგორც თბილისის, ასევე ქუთაისის საერთაშორისო აეროპორტებიდან მგზავრების ტრანსპორტირება აბასთუმნის მიმართულებით, საკმაოდ კომფორტული და სწრაფია.
საერთაშორისო ქსელის და სტანდარტების სასტუმროს მშენებლობაც სწორედ, ამ კურორტის აღორძინების ერთ-ერთი მნიშვნელოვანი ფუნდამენტი იქნება. ვიმედოვნებთ, რომ აღნიშნული პროექტი ხელს შეუწყობს, როგორც ტურისტების მოზიდვას, ასევე ადგილობრივი მოსახლეობის დასაქმებას და ახალი სამუშაო ადგილების შემქნას.“ - განმარტავს „თანაინვესტირების ფონდის“ საზოგადოებასთან ურთიერთობის სამსახურის უფროსი ნუცა ქისტაური.
სასტუმროს ჯამური ინვესტიცია კი 34 მლნ დოლარს შეადგენს. Autograph Collection-ის 5 ვარსკვლავიანი სასტუმრო აბასთუმანში სანატორიუმ ცისარტყელას ტერიტორიაზე, დაახლოებით 25 000 კვადრატული მეტრის ფართობზე შენდება. სასტუმრო მოიცავს სპას, აუზს, რესტორანს, საკონფერენციო დარბაზს, ტერასას 360 გრადუსიანი ხედით და ა.შ.
მარიამ მორგოშია