თურქული ლირა ისტორიულ მინიმუმზეა. 12 ოქტომბერს აშშ დოლარის ღირებულება 9.00-იან ნიშნულს გადასცდა, 13 ოქტომბერს დილით Bloomberg-ის სავაჭრო პლატფორმაზე კურსი 9.03-ს შეადგენდა. წინა წლების გამოცდილების საპირისპიროდ, ლარი მეზობელი ქვეყნის ვალუტის გაუფასურებაზე ჯერჯერობით არ რეაგირებს.
თურქეთი საქართელოს #1 სავაჭრო პარტნიორია. იმპორტში მისი წილი 17.7%-ს შეადგენს - 1.7-ჯერ მეტს, ვიდრე მეორე ადგილზე მყოფი რუსეთი.
სხვა თანაბარ პირობებში ლირის გაუფასურება თურქული პროდუქციის გაიაფებას და იმპორტის მოცულობის ზრდას უნდა იწვევდეს. თუმცა საქართველოში ლირის ვარდნას ლარის ვარდნაც მოჰყვებოდა ხოლმე. 2018 წლის აგვისტოში ლირა დოლართან მიმართებაში 4.90-დან 6.65-მდე გაუფასურდა, იმავე პერიოდში დოლარის ღირებულება 2.45 ლარიდან 2.64 ლარამდე გაიზარდა. 2019 წლის მარტიდან მაისამდე ლირა 5.47-დან 6.07-მდე გაუფასურდა, პარალელურად ლარის კურსიც 2.67-დან 2.80-მდე შეიცვალა. 2020 წლის სექტემბრიდან ნოებრამდე ლირა 7.35-დან 8.51-მდე გაუფასურდა ლარი კი შესაბამისად 3.07-დან 3.36-მდე. ლირის გაუფასურება პირდაპირ ლარის გაუფასურებას ვერ გამოიწვევს. წინა მოვლენები ნაწილობრივ შეიძლება ცრუ მოლოდინებით ყოფილიყო გამოწვეული, ნაწილობრივ კი „საგარეო ფაქტორები“ უბრალოდ თავის სამართლებელ მიზეზად იყო დასახელებული.
ლირა დოლარის პარალელურად სხვა ვალუტებთანაც გაუფასურდა, თუ წლის დასაწყისში 1 ლირა 44 თეთრი ღირდა, 12 ოქტომბრის ოფიციალური კურსით მისი ფასი 35 თეთრამდეა შემცირებული. მეზობელი ქვეყნის ვალუტის ვარდნა უარყოფითად აისახა ემიგრანტების ნაწილის ოჯახების შემოსავლებზეც. 1000 ლირა იანვარში 440 ლარი იყო, დღეს კი მხოლოდ 350.