„მოსახლეობის საყოველთაო ჯანმრთელობის დაცვის“  პროგრამა დეფიციტურია, 2020 წლის ბიუჯეტიდან გამოყოფილი 802 მილიონი ლარი უკვე ათვისებულია. იმისათვის, რომ პროგრამა შეუფერხებლად გაგრძელდეს ჯანდაცვის სამინისტრომ 95 მლნ ლარი დაამატა.  

ექსპერტი ჯანდაცვის საკითხებში ვატო სურგულაძე აცხადებს, რომ სახელმწიფო საყოველთაო ჯანდაცვის პროგრამის სწორ დაგეგმარებას ვერ ახერხებს. ექსპერტისთვის გაუგებარია, როგორ მოახერხა ჯანდაცვის სამინისტრომ ბიუჯეტის სრულად ათვისება, მაშინ როცა გეგმიური ოპერაციები ქვეყანაში თითქმის არ ტარდებოდა:

„დაგეგმარების, რისკების და ინფლაციის ინდექსის გამიჯვნის შნო არ გააჩნიათ. წელს ძალიან ცოტა გეგმიური ოპერაციები ტარდება. საყოველთაო ჯანდაცვის პროგრამის ფარგლებში გეგმიური ოპერაციის დაყოვნების პერიოდი 2-3 თვიდან 4-5 თვემდე გაიზარდა. 23 ოქტომბრიდან გეგმიური ოპერაციების დაფინანსებას, პრაქტიკულად აღარ განიხილავენ. ამასთანავე მთელი მარტი, აპრილი და მაისი, როდესაც ჩაკეტილები ვიყავით, გეგმიური ოპერაციები თითქმის არ კეთდებოდა. სად მოახერხეს ამ თანხის დახარჯვა? ექიმების ხელფასებს არაფერი შეეტყო და არც არაფერი შეუძენიათ. დავით სერგეენკოს დროსაც ბიუჯეტი ხან 100 მილიონი დაამატეს, ხან 120 მილიონი. 8 წელია საყოველთაო „ბედნიერების“ პროგრამა გვაქვს და ბიუჯეტის სათანადოდ დაგეგმვა ვერ ისწავლეს. ველოდებოდი რომ ეს მოხდებოდა, რადგან ჯანდაცვის სამინისტროში მართვის და მენეჯმენტის გვერდით არავის გაუვლია“, - აცხადებს ვატო სურგულაძე.

„კომერსანტის“ კითხვაზე საყოველთაო ჯანდაცვის პროგრამის ბიუჯეტის სრულად ათვისება და 95 მლნ ლარით გაზრდა ხომ არ უკავშირდება კოროვანირუსს, ექსპერტი გვეუბნება, რომ ინფექციური დაავადება საყოველთაო პროგრამით არ უნდა დაფინანსებულიყო. ვატო სურგულაძე აცხადებს, რომ საკითხით პროკურატურა უნდა დაინტერესდეს.

„ბიუჯეტის გაზრდა კორონავირუს ვერ დაუკავშირდება, რადგან ვირუსთან საბრძოლველად 5 მლრდ იყო გამოყოფილი. კოვიდ 19 არ ფინანსდება საყოველთაო პროგრამიდან, რადგან ინფექციური დაავადებების პროგრამა არის აბსოლუტურად სხვა პროგრამა. ნამდვილად არ ვიცი სად წავიდა ეს ფული, ჩემი აზრით ეს რეალურად საპროკურატურო საქმეა“,- ვატო სურგულაძე..

ეკონომიკის ექსპერტი ზვიად ხორგუაშვილი აცხადებს, რომ საქართველოს მთავრობას საყოველთაო ჯანდაცვის პროგრამისთვის თითქმის ყოველ წელს უხდებოდა თანხის დამატება, რადგან მისი თქმით, საყოველთაო ჯანდაცვის ბიუჯეტი არის უძირო ქვევრი, რომელიც ყოველთვის მეტ თანხას მოითხოვს.

„2020 წელს თუ  ძალიან დიდი თანხა იყო გამოყოფილი ჯანდაცვის სამინისტროს ბიუჯეტში კოვიდ 19- თან ბრძოლისთვის, ამის უდიდესი ნაწილი გაუქმდა და 2021 წელს ეს ხარჯები განულებულია. ამას ერთი მიზეზი შეიძლება იყოს, რომ ხარჯი საყოველთაო ჯანდაცვისკენ გადმოთამაშდა, იქედან გამომდინარე, რომ შეიძლება პროგრამას კორონაპანდემიის გამო გარკვეული მომსახურებები დაემატა. მეორე ვარაუდი არის ის, რომ შეიძლება 2021 წელს იგივე საფრთხის წინაშე აღმოჩნდნენ, თანხა არ ეყოთ და გარკვეულ წილად მეტობით იღებდნენ. ამ გადაწყვეტილებას სავარაუდოდ იმიტომ იღებენ, რომ მკვეთრად იზრდება მიმართვიანობა, დაავადებულთა რაოდენობა და ზოგადად მოთხოვნა ჯანდაცვის სერვისებზე. ბიუჯეტი რომ უნდა გაზრდილიყო ეს ცალსახაა, რადგან ქვეყანაში ავადობის ხარისხი გაიზრდება. მთავარი კითხვა არის ის, იქნება თუ არა ეს გაზრდილი ბიუჯეტი საკმარისი“, - განაცხადა ზვიად ხორგუაშვილმა.

საყოველთაო ჯანდაცვის პროგრამის ბიუჯეტი დადგენილზე ადრე პირველად არ ამოწურულა. მთავრობამ პროგრამას 2014 წელს 138 მილიონი ლარი დაამატა, 2015 წელს 103,  2016- ში 53 მილიონი ლარი. გამონაკლისი არ ყოფილა არც 2017 წელი, რა დროსაც ჯანდაცვის სამინისტრომ დამატებითი ფინანსური რესურსი 40 მილიონი გამოჰყო.  2018 წელს კი საყოველთაო ჯანდაცვის პროგრამის გადასარჩენად მთავრობამ პროგრამის ბიუჯეტს 47 მლნ ლარი დაამატა,  2019 წელს კი 11 მილიონ ლარამდე.

შეგახსენებთ, რომ 2013 წელს „ქართული ოცნების“ მთავრობა მიიღო დადგენილება, რომლითაც საყოველთაო ჯანდაცვის სისტემის ამოქმედება განისაზღვრა. პროგრამის შედეგად, მოსახლეობის წვდომა სამედიცინო სერვისებზე გაიზარდა, თუმცა ასევე წლიდან წლამდე იზრდებოდა პროგრამის ბიუჯეტიც.

საყოველთაო ჯანდაცვის ბიუჯეტი წინა წლებში შემდეგნაირად გამოიყურებოდა:

2013 წელი — 70 მილიონი ლარი;

2014 წელი — 338 მილიონი ლარი, თავდაპირველი გეგმა — 200 მილიონი;

2015 წელი — 573 მილიონი ლარი, თავდაპირველი გეგმა — 470 მილიონი;

2016 წელი — 623 მილიონი ლარი. თავდაპირველი გეგმა — 570 მილიონი;

2017 წელი — 700 მილიონი ლარი, თავდაპირველი გეგმა — 660 მილიონი;

2018 წელი — 760 მილიონი ლარი, თავდაპირველი გეგმა — 713 მილიონი;

2019 წელი — 765 მილიონი ლარი, თავდაპირველი გეგმა — 754 მილიონი.

2020 წელი — 802 მილიონი ლარი, თავდაპირველი გეგმა — 897 მილიონი.

ბაჩო ადამია