ალბათ ყველას ახსოვს ავსტრალიაში ტყის ხანძრისგან გადარჩენილი კოალა სახელად ლუისი, რომელიც ტონი დოერტიმ ცეცხლიდან გამოიყვანა. ეს ისტორია სევდიანად დამთავრდა და ლუისი მიღებული დამწვრობებისგან მოკვდა. თუმცა კოალის ისტორიამ ძალიან იმოქმედა 6 წლის უენი კოლიზე, რომელიც მასაჩუსეტსის შტატში ცხოვრობს.
უენმა და მისმა მშობლებმა, რომლებიც გარკვეული პერიოდი ავსტრალიაში ცხოვრობდნენ (მამა სულაც სიდნეიში გაიზარდა), ტყის ხანძრების წინააღმდეგ ბრძოლის ფარგლებში კამპანია დაიწყეს. ბიჭმა და მისმა დედ-მამამ თიხისგან კოალას დასაწებებელი ფიგურების კეთება და მეგობრებ-ნათესავებში დონაციის სანაცვლოდ გაყიდვა დაიწყეს, მიღებული ფულის გაგზავნას კი ახალ სამხრეთ უელსში იმ მაშველებისთვის გეგმავდნენ, რომლებიც ცხოველების გადარჩენას ცდილობენ.
თავდაპირველად რამდენიმე ათასი დოლარის შეგროვებას აპირებდნენ, თუმცა ბიჭმა 174 ათას დოლარამდე შეაგროვა. სათამაშო კოალები იმდენად პოპულარულები გახდნენ, რომ მათ შემქმნელებს თიხის მარაგი ამოეწურათ. მაშინ, უენ კოლის დედამ 30 კილომეტრის რადიუსში მდებარე მაღაზიებში არსებული თიხა სრულად იყიდა. მოგვიანებით კოლის მეგობრებიც შეუერთდნენ, რომლებიც ახალი ფიგურების კეთებაში ეხმარებოდნენ.
ტყის ხანძრები ავსტრალიაში სექტემბრიდან მძვინვარებს. სტიქიას 28 ადამიანი ემსხვერპლა, 2000-ზე მეტი სახლი კი ხანძარმა გაანადგურა. ახალი სამხრეთ უელსის შტატში ტყის ხანძრებს დაახლოებით მილიარდი გარეული ცხოველი ემსხვერპლა.
imedinews