ბიზნესისა და ტექნოლოგიების უნივერსიტეტმა ტექნოლოგიური და ინოვაციური ტენდენციების შესახებ ყოველთვიური კვლევითი ანგარიში გამოაქვეყნა. თებერვლის ანგარიში ფინტექ ბაზარს, არსებულ ტენდენციებს, პერსპექტივებსა და სტრუქტურას ეხება. რადიო „კომერსანტის“ დილის ეთერში ბიზნესისა და ტექნოლოგიების უნივერსიტეტის ასოცირებული პროფესორმა ვახტანგ ჩქარეულმა განაცხადა, რომ საქართველოში ინტერნეტ მომხმარებლებიდან ინტერნეტ ბანკინგს ყოველი მე-4 იყენებს, რაც იმას ნიშნავს, რომ ადამიანები ფინტექ-სერვისების მიღებაში ჩართული არიან.
„საქართველოში ფინტექ ბაზრის და მისი მოცულობის შეფასებისთვის მთავარი ინდიკატორი ფინტექ გადახდებია. თუ ის 2022 წელს დაახლოებით 1 მლრდ დოლარის ფარგლებში მერყეობდა, 2023 წელში 19%-იანი ზრდის მოლოდინი არსებობს და 2027 წლისთვის ფინტექ გადახდები 2 მილიარდს გადააჭარბებს, რაც დიდი ზრდის ტემპი,“ - აცხადებს ვახტანგ ჩქარეული.
მისი თქმით, ფინტექ ბაზარზე გადახდები მოიცავს მობილური POS-ები საშუალებით გადახდას და ციფრულ კომერციას. ციფრული კომერცია გულისხმობს ნებისმიერი ტიპის სამომხმარებლო ონლაინ გადახდებს, მობილურ POS-ები - ელექტრონული საფულით გადახდებს.
„მობილურ POS-ს მთლიანი გადახდების დაახლოებით 332-მილიონიანი წილი უჭირავს, ციფრული კომერცია ამ მხრივ 3-ჯერ დიდია და მისი მოცულობა დაახლოებით 830 მილიონს უახლოვდება. 2027 წლისთვის მობილური პოსების წილის გასამმაგებას ვარაუდობენ.
2017-2022 წლებში ინტერნეტით განხორციელებული ფინანსური ოპერაციები, 7.5-ჯერ - 1 მილიარდიდან 8 მილიარდ ლარამდე გაიზარდა. გასულ წელს 115 მილიონი ტრანზაქცია განხორციელდა, რაც 2021 წელთან შედარებით 16%-იანი ზრდაა, ხოლო გადარიცხვების კუთხით 8 მილიარდს გადააჭარბა და თითქმის 25%-იანი ზრდა იყო 2021 წლის ნიშნულთან შედარებით“, - აცხადებს ვახტანგ ჩქარეული.