საბანკო სექტორი წელს, პირველად დამოუკიდებელი საქართველოს ისტორიაში, 6 თვეში მილიარდიან მოგებაზე გავიდა. მოგების - 45.8% ანუ 486 მლნ ლარი თიბისის ეკუთვნის, რომელიც ბოლო წლებში მის უშუალო კონკურენტს, საქართველოს ბანკს თითქმის ყველა კომპონენტში ჯობნის.

თავად საქართველოს ბანკის მოგებამ 6 თვეში 435 მლნ ლარი შეადგინა, რაც იმას ნიშნავს, რომ 2 დომინანტ ბანკზე მოგების 87% ნაწილდება, მთლიან აქტივებში ამ 2 ბანკის წილი 77%-ა, გაცემულ სესხებსა და მიღებულ დეპოზიტებში კი 67%.

სიდიდით ქვეყნის მესამე ბანკის - ლიბერთის წმინდა მოგებამ წლის პირველ ნახევარში მხოლოდ 23 მლნ ლარი შეადგინა, რაც წილობრივად 2.3%-ზე ნაკლებია. სხვა ბანკების წილი კი მოგებაში 1–დან 2 პროცენტამდე მერყეობს, ან 1 პროცენტზე ნაკლებია.

მოგებამ თვეში შვიდნიშნა მაჩვენებელს ლიბერთის გარდა კიდევ 6 ბანკში: ვითიბიში, პროკრედიტში, კრედოში, ქართუში, ბაზისბანკსა და ტერაბანკში გადააჭარბა. ზირაათ ბანკისა და სილქ როუდ ბანკის მოგება 1 მლნ–ზე ნაკლები იყო, პაშა ბანკი კი 1.4 მილიონიან ზარალზე გავიდა.

ბანკებმა ივლისში დამატებით 178 მლნ-ის წმინდა მოგება დაწერეს და 7 თვეში 1.240 მლრდ-იან მოგებაზე გავიდნენ. ორნიშნა ეკონომიკური ზრდის მსგავსად ბანკების შემთხვევაშიც აღნიშნულის უმთავრესი მიზეზი ცუდი საბაზისო წელია, თუმცა სხვა სფეროებისგან განსხვავებით 2020 წელს საბანკო სექტორი მინუსში არ გასულა თუმცა მოგება 8.5-ჯერ 99 მლნ-მდე შემცირდა. პირველ ადგილზე ამ შემთხვევაშიც 21.7 მლნ–ით თიბისი იყო. ბანკებმა კონსერვატიული მეთოდით იხელმძღვანელეს და კრიზისის პერიოდში სავალდებულოზე მეტი თანხები დაარეზერვეს, 2021 წელს კი რეზერვები ბრუნვაში გაუშვეს, რამაც მათი ბუღალტრული მოგება კიდევ უფრო გაზარდა.

მას შემდეგ, რაც 2017 წელს თიბისიმ ბანკი რესპუბლიკა შეიძინა, ნელ-ნელა მეორიდან პირველ ადგილზე გადაინაცვლა. 2021 წლის მეორე კვარტლის მიხედვით მისი წილი აქტივებსა და გაცემულ სესხებში ისევე როგორ წმინდა მოგებაში საქართველოს ბანკის მაჩვენებელს რამდენიმე პროცენტული პუნქტით აჭარბებს.