2019 წლის ნოემბერში ჯანდაცვის მინისტრმა ეკატერინე ტიკარაძემ პირველი რეფორმა გაატარა. შედეგად საყოველთაო ჯანდაცვის პროგრამაში ჩართული კლინიკებისთვის ერთიანი ტარიფი ამოქმედდა. მთავრობის გადაწყვეტილება მაშინ ჯანდაცვის სფეროში მომუშავე ყველა პირმა, მედიკოსმა თუ ექსპერტმა გააკრიტიკა. დღეს 520-ე დადგენილება აღარავის ახსოვს, თუმცა უნდა ითქვას ისიც, რომ როცა 520-ე დადგენილება ჯანდაცვის სამინისტოში ახსოვდათ, უწყება პრობლემის მოგვარებით არც მაშინ იყო დაკავებული.
„კომერსანტი“ დადგენილების მიღების მიზეზებზე და მის ირგვლივ არსებულ პრობლემატიკაზე ჯანდაცვის ყოფილ მინისტრს დავით სერგეენკოს ესაუბრა. მისი თქმით, ასეთი დადგენილებები მომავალაშიც იქნება, რათა მოსახლეობამ მიიღოს ხარჯეფექტური და ხარისხიანი სერვისები.
„სფეროს აქვს თავისი გამოწვევები და მთავრობა მათზე რეაგირებას ახდენს. 520-ე დადგენილება ერთ-ერთი რგოლია, არ ვთვლი რომ ის საკვანძო დადგენილებაა, მაგრამ ამ რეფორმების მწკრივში ის ერთ-ერთი რგოლია, რომელიც ყველა ქვეყანას სჭირდება ჯანდაცვის სისტემაში, იმისთვის, რომ უპასუხოს თანამედროვე გამოწვევებს. ასეთი დადგენილებები მომავალაშიც იქნება, რათა მოსახლეობამ მიიღოს ხარჯეფექტური და ხარისხიანი სერვისები.
სამედიცინო სერვისების ანაზღაურების ზღვარი ნებისმიერ ქვეყანაში ყოველთვის დადგენილი იყო, ამ პროცესს ესა თუ ის მეთდოლოგია უზრუნველყოფს. 520-ე დადგენილება არ გამხდარა ზღვარის დაწესების დადგენილება, ასეთი ზღვარი ყოველთვის არსებობდა. რაც შეეხება იმას, თუ რომელ სფეროსა და სერვისს შეეხო, მე ვფიქრობ, რომ გადამწყვეტი არის დეტალური კომუნიკაცია სფეროს სპეციალისტებთან, წამყვანი საკითხი ამ შემთხვევაში არა სერვისების თვითღირებულება, არამედ გარკვეული სახარჯო მასალების ღირებულებაა, რომელიც სახელმწიფომ გადაწყვიტა, რომ კონსოლიდირებული შესყიდვებით შეეძინა, ასეთი მიდგომა უკვე არსებობდა. მაგალითად, დიალიზის სახელმწიფო პროგრამაში, ახლა კი ეს მიდგომა კიდევ უფრო ფართოვდება. ჩემი აზრით, ცვლილებები ყოველთვის საჭირო იყო, ანაზღაურების სისტემაც ყოველთვის დახვეწას საჭიროებს და ეს სულ ასე გაგრძელდება“, — განაცხადა დავით სერგეენკომ.