ორ
თვეზე მეტი გავიდა მას
შემდეგ, რაც ქვეყანაში ახალი
კორონავირუსით დაინფიცირების პირველი შემთხვევა ოფიციალურად დადასტურდა. მას შემდეგ მთელი
ქვეყანა ვირუსთან ბრძოლაში ჩაება. ჯანდაცვის სამინისტროს მთავარი საზრუნავი ახლა სწორედ ეს
პრობლემაა. დღეს აღარავის ახსოვს
520-ე
დადგენილება, რომელსაც სრულიად ჰოსპიტალური სექტორი აპროტესტებდა, ყველა ექიმი აცხადებდა, რომ დადგენილი ტარიფები რეალურ დანახარჯებს არ შეესაბამებოდა. თუმცა,
როცა ჯანდაცვის სამინისტოში 520-ე დადგენილება ახსოვდათ, სახელმწიფო უწყება პრობლემის მოგვარებით არც მაშინ იყო დაკავებული.
ჯანდაცვის სექტორის წარმომადგენლები აცხადებენ, რომ რეფორმის შედეგად კლინიკები მივიდნენ იმ რთულ ფინანსურ მდგომარეობამდე რომელზეც რამდენიმე თვის წინ ხმამაღლა საუბრობდნენ. ეკატერინე ტიკარაძის მიერ გატარებული რეფორმის შედეგად დღეს სამედიცინო პერსონალს ხელფასი დაახლოებით 35 პროცნტით შეუმცირდა, ხოლო გარკვეული პერიოდი შეჩერებული იყო გეგმიური ოპერაციები.
კლინიკა ,,ღია გულის“ აღმასრულებელი დირექტორი დავით მიქელთაძე აცხადებს, რომ 520 დადგენილებას ზუსტად იგივე შედეგი აქვს როგორიც კორონავირუსს ამერიკაში, ესპანეთში, იტალიასა და დიდ ბრიტანეტში. ექიმის თქმით, პანდემიის პირობებში სამედიცინო დაწესებულებების მდგომარეობა კიდევ უფრო გართულდა. დავით მიქელთაძე განმარტავს, რომ კორონავირუსის გავრცელებამდე დადგენილ ტარიფებთან დაკავშირებით შექმნილი სამუშაო ჯგუფის შეხვედრები ძალიან გაიწელა, შედეგი არ დაიდო, COVID-19-ის პანდემიის დროს კი ,,ღია გულის“ აღმასრულებელი დირექტორის თქმით, 520 დადგენილებისთვის აღარავის ეცალა.
„გატარებული რეფორმის შედეგი არის ის, რომ ამ რთულ პირობებში სამედიცინო პერსონალს ხელფასი შეუმცირდა. 520 დადგენილება როდესაც ამოქმედდა ლარის კურსი დოლართან მიმართებით 2,7 ლარი იყო დღეს არის 3,2. დადგენილება ძირითადად კარდიოქირურგიას შეეხო, მაღალტექნოლოგიურ დარგს, სადაც ერთჯერადი სახარჯი მასალა ევროპული ქვეყნებიდან შემოდის, ეს დაკავშირებულია დოლართან და ევროსთან, ამ ხარჯის მატება და სახელმწიფოს მხრიდან მომსახურების დადგენილი დაბალი ფასი მთლიანობაში კატასტროფულ მდგომარეობას ქმნის. რეალობა არის ის, რომ სამედიცინო დარგს არ აქვს ფასწარმოქმნის საშუალება რადგან ჯანდაცვის სამინისტრომ გადაწყვიტა, რომ მედიცინა ბიზნესი არაა. მედიცინა ბიზნესი არ იყო საბჭოთა კავშირის დროს, რადგან მაშინ ყველაფერი სახელმწიფოს მხრიდან ფინანსდებოდა. დღეს ფარმაცია ბიზნესია, კომუნალური გადასახადები, რომელიც ორგანიზაციას სჭირდება ბიზნესია, ექიმი და ექთანი რომელიც პაციენტს ემსახურება იღებს განათლებას, განათლება კი სწავლის საფასურის გადახდის გარეშე არ გამოდის და ესეც ბიზნესია და თუ მედიცინის ყველა შემადგენელი ნაწილი ბიზნესია მაშინ რა აღარაა ბიზნესი? აი ესაა საკითხავი“, - განაცხადა დავით მიქელთაძემ.
„თბილისის ცენტრალური საავადმყოფოს“ დირექტორი, გიორგი ლობჟანიძე აცხადებს, რომ COVID-19-ის პანდემიასთან ბრძოლის პარალელურად უნდა განახლდეს 520 დადგენილებასთან დაკავშირებით სამუშაო შეხვედრები, რათა მოხდეს დადგენილი ტარიფების გადახედვა. მისი განმარტებით, რეფორმის მიერ შექმნილი პრობლემები უახლოეს მომავალში უფრო მეტად გამოჩნდება, რა დროსაც სამედიცინო სექტორი საკითხს კვლავ გაააქტიურებს.
„520 დადგენილებას პანდემიის პერიოდი დაემთხვა, რა დროსაც რეალური სურათი ბუნდოვანი გახდა, რადგან იმ სერვისებს რომელსაც 520 დადგენილება არეგულირებს ზიანი ისედაც მიადგა, რეფორმა რომც არ ყოფილიყო კორონავირუსის გამო გეგმიური ოპერაციები მაინც გადავადდებოდა. დადგენილება კარდიოქირურგიის გარდა შეეხო ისეთ მიმართულებებს როგორიც იყო რეანიმაცია, ინტენსიური მოვლა და ნევროლოგია, ცხადაია შემოსავლები შემცირდა, ამას დაემატა ისედაც შემცირებული პაციენტები რაოდენობა, ამ ყველაფერმა სამედიცინო დაწესებულებები რა თქმა უნდა მძიმე მდგომაროებაში ჩააგდო. ვფიქრობ, რომ დადგენილი ტარიფები დაბალია და დღევანდელ რეალობას არ შეესაბამება, მით უმეტეს მაშინ, როდესაც ეკონომიკური გარემო გაუარესდა. სასურველია გადაიხედოს ფასები, აქ არ არის საუბარი იმაზე, რომ ანაზღაურების წესი ან მეთოდოლოგია არ არის სწორი. ვსაუბრობთ, რომ მოცემული ტარიფები არის არარეალურად დაბალი განსაკუთრებით არითმოლგიის მიმართულებით, რაც შეუძლებელს ხდიდა ამ სერვისის მიწოდებას“- აცხადებს გიორგი ლობჟანიძე.
ბაჩო ადამია