უმსხვილესი აქსელერატორი 500 Startups-ს აქსელერაციის პროგრამის ინტენსიური მენტორშიპის პირველი ეტაპი წარმატებით დასრულდა და ახლა აქსელერაციაში მონაწილე 14 კომპანია მენტორშიპის მეორე ეტაპზეა. ჩვენ უკვე მოგიყევით რამდენიმე სტარტაპზე, რომლებიც პროგრამაშ მონაწილეობით ცდილობენ ინოვაციური ეკოსისტემის განვითარებას, უნიკალური იდეებისა და კონცეპტების გენერირებასა და კომპანიის უკეთეს პოზიციონირებას ინვესტირების თვალსაზრისით.

ამჯერად გვინდა გაგაცნოთ კომპანია Intrro, რომელიც ადამიანებს სამსახურის მოძიებაში ეხმარება.

ნებისმიერმა ადამიანმა, სამსახურის მოძებნამდე უნდა დასვას სამი შეკითხვა: რაში ვარ კარგი, რა მაინტერესებს და სად მინდა მუშაობა. ყველა ამ ფაქტორის სწორად გაანალიზების შემდეგაც ხშირად ხდება, რომ დამსაქმებლისგან ვერანაირ უკუკავშირს ვერ ვიღებთ. ე.წ „ჯობ ჰანთერებისგან“ ამ დროს მოვისმენთ, რომ უამრავ ვაკანსიაზე გააგზავნეს რეზიუმე და არავინ დაუკავშირდა, ხოლო დამსაქმებლები ჩივიან, რომ ერთი შესაფერისი რეზიუმეც კი არ მიუღათ.

ამ პრობლემის ერთ-ერთი გამომწვევი მიზეზი შეიძლება იყოს სამუშაოს მოძებნის მოძველებული მეთოდოლოგია. უმეტეს შემთხვევაში ვიღებთ ლეპტოპს, შევდივართ საიტზე, რომელზეც განთავსებულია ვაკანსიები, ვაგზავნით ჩვენს რეზიუმეს და გადავდივართ მოლოდინის რეჟიმში. ალბათ დამეთანხმებით, რომ ლოდინი საკმაოდ სტრესულია, რადგან სამსახური ბევრი ადამიანისათვის სასიცოცხლოდ მნიშვნელოვანია და ეს პროცესი უფრო მწვავდება, როდესაც პასუხის მიღებას თვეების განმავლობაში ველოდებით.

Intrro არის კომპანია, რომელიც ადამიანებს სამსახურის მოძებნას, ტრადიციულისგან განსხვავებული მეთოდოლოგიით სთავაზობს. კომპანიის ორ დამფუძნებელს მრავალწლიანი გამოცდილება ჰქონდა HR სფეროში. ერთად მუშაობისას მათ დაინახეს, რომ ე.წ. „ჯობ ჰანთერები“ სხვადასხვა სირთულეს აწყდებოდნენ. ბაზარზე არსებული პრობლემის გაანალიზების შემდეგ კი, 2019 წლის მაისში, მათ დაარსეს Intrro და დაიწყეს სტარტაპის განვითარებაზე მუშაობა.

„ჩვენ გვჯერა, რომ საუკეთესო დასაქმების მეთოდი არის საკუთარი თანამშრომლმების რეკომენდაცია. Intrro არის სრულიად ავტომატიზირებული სისტემა, რომელიც ერთმანეთთან აკავშირებს სამსახურის მაძიებლებს და დამსაქმებლებს. სისტემა დამსაქმებლისათვის ამარტივებს კანდიდატის შერჩევის პროცესს, ხოლო სამსახურის მაძიებელი რეკომენდაციებით მარტივად საქმდება. ამავდროულად, თანამშრომლებს ონლაინ რეჟიმში შეუძლიათ თვალი ადევნონ მათ მიერ რეკომენდირებული კანდიდატის მიმდინარე სტატუსს,“ - ამბობს ჩვენთან საუბარში კომპანიის დამფუძნებელი ნასერ ოუდჯიდანე (Nasser Oudjidane).

Intrro-ს დამფუძნებლები აქტიურად ადევნებდნენ თვალს ქართული სტარტაპების ეკოსისტემაში მიმდინარე პროცესებს. როდესაც თებერვალში ყველასათვის ცნობილი გახდა, რომ საქართველოს ბანკის ჩართულობით 500 Startups შემოვიდოდა ბაზარზე, ერთ-ერთმა დამფუძნებელმა, ნასერმა, გადაწყვიტა აქსელერაციის პროგრამაში მიეღო მონაწილეობა. Intrro სტარტაპის განვითარების საწყის, ანუ სწავლის, ეტაპზე იმყოფებოდა და პროგრამაში მონაწილეობა კომპანიისათვის იყო შესაძლებლობა მიეღო ახალი ცოდნა და გამოცდილება, რომელიც დაეხმარებოდა პროდუქტის სწრაფ განვითარებაში.

„გარდა იმისა, რომ ამ პროგრამისგან მივიღებთ ცოდნასა და გამოცდილებას, ამავდროულად ჩვენი სტარტაპისათვის მნიშვნელოვანია ის ინვესტიციაც, რომელსაც საქართველოს ბანკი ანხორციელებს. Covid-19-მა მძიმედ იმოქმედა ჩვენს ბიზნესზე და ამ პერიოდში ახალი მომხმარებლების პოვნა პრაქტიკულად ვერ მოვახერხეთ. ეს ინვესტიცია კი დაგვეხმარება სწრაფად გადავლახოთ არსებული ფინანსური სირთულეები და გავაგრძელოთ განვითარებაზე მუშაობა.რა თქმა უნდა, პროგრამაში მონაწილეობამდეც არ არსებობდა არანაირი კითხვის ნიშნები 500 Startups-ის მენტორების პროფესიონალიზმზე და ამის პარალელურად პროცესში ეფექტურად ჩაერთო საქართველოს ბანკის მარკეტინგის გუნდიც. და მინდა აღვნიშნო, რომ აქსელერატორის შემოყვანა პოზიტიურად აისახება სტარტაპების ეკოსისტემის განვითარებაზე და კარგია, რომ პროცესი ისეთმა გამოცდილმა კომპანიამ წამოიწყო, როგორიც საქართველოს ბანკია,“ - ამბობს Intrro-ს დამფუძნებელი ნასერ ოუდჯიდანე.

Intrro-ს მთავარი სამიზნე აუდიტორია სწრაფად მზარდი ტექნოლოგიური კომპანიებია. კომპანიას უკვე ჰყავს 10 მსხვილი მომხმარებელი, რომლებიც ევროპაში ოპერირებენ და სამომავლოდ ამერიკის ბაზარზე შესვლასაც გეგმავენ. 2020 წლის კორონავირუსის კრიზისმა ნათლად დაგვანახა, რომ ქართულ კომპანიებს შეუძლიათ ადაპტაცია და ყველაზე რთულ მომენტშიც კი ნერგავენ სიახლეებს, ამიტომ ვიმედოვნებ, რომ სულ მალე საქართველოშიც ვიხილავთ დასაქმების ინოვაციურ სისტემებს.
და ბოლოს, უკვე დიდი ხანია საუბრობენ კადრების მოძიების მეთოდოლოგიის ცვლილების საჭიროებაზე, ხოლო არის თუ არა სამსახურის მოძებნის ტრადიციული მეთოდი არაეფექტური, ამ კითხვაზე პასუხს მკითხველს მივანდობთ.

(R)