YouTube-არხთან Everyday Astronaut ინტერვიუში ილონ მასკმა მუშაობის ორგანიზების იმ სისტემაზე ისაუბრა, რომლებიც თავად დანერგა Tesla–სა და SpaceX–ში. სისტემა 5 ნაბიჯს მოიცავს, რომლებიც ქვემოთ პრიორიტეტულობის რიგითობითაა წარმოდგენილი.
ნაბიჯი 1
მოთხოვნები ნაკლებად სულელური გახადეთ
მოთხოვნები, ვინც არ უნდა წამოაყენოს ისინი, ყოველთვის შეიძლება მცდარი აღმოჩნდეს. განსაკუთრებით საშიშია, თუ ამას ჭკვიანი ადამიანი აკეთებს, ვინაიდან მის მითითებებს თქვენ ეჭვქვეშაც არ დააყენებთ. „მიუხედავად იმისა, თუ ვინ ხართ, ზოგჯერ ყველა უშვებს შეცდომებს“, – თქვა მასკმა და დასძინა, რომ რაღაცით ყველა მოთხოვნა არასწორია და საქმე ისაა, თუ რამდენად არასწორია ისინი.
როგორიც არ უნდა იყოს ამოცანა, Tesla–ს დამფუძნებლის აზრით, ის ერთ კონკრეტულ შემსრულებელს უნდა დაავალო და არა მთელ განყოფილებას. ხოლო ის, ვინც ამ დავალებას გასცემს, ვალდებულია მასზე პასუხისმგებლობა აიღოს. სხვა შემთხვევაში შეიძლება ყველაფერი აირიოს.
ნაბიჯი 2
თავიდან მოიშორეთ უსარგებლო დეტალები და პროცესები
„ფაქტობრივად, თუ დროის 10% არ იხარჯება იმაზე, რომ ყველაფერი თავის ადგილზე დააბრუნოთ, ნიშნავს, რომ თქვენ საკმარისი რაოდენობით ვერ იშორებთ თავიდან უსარგებლო დეტალებსა და პროცესებს“, – თქვა მასკმა. არსი ისაა, რომ ადამიანები პროექტებში ბევრი დეტალის დამატებისკენ არიან მიდრეკილი, რომლებიც, მათი აზრით, დაეხმარება, ან დააზღვევს მაინც. თუმცა, ამას პროექტების გადატვირთულობა მოაქვს შედეგად.
ნაბიჯი 3
გამარტივება და ოპტიმიზაცია
ეს ნაბიჯი წინასთან მჭიდრო კავშირშია. ის გასაგებია, მაგრამ მთლად უბრალოდაც არ დგას მესამე ადგილზე. ინჟინრების ხშირი შეცდომა ისაა, რომ ისინი იმ ნივთების გაუმჯობესებასა და ოპტიმიზაციას იწყებენ ხოლმე, რომელთა არსებობაც საერთოდ არ იყო საჭირო. „ეს რატომ ხდება? უბრალოდ ყველას ასე ასწავლიდნენ სკოლასა და უნივერსიტეტში: კითხვა არსებობს – საჭიროა პასუხი. არ შეიძლება პედაგოგს უთხრა, რომ მისი კითხვა იდიოტურია, უნდა უპასუხო. ამიტომ ყველას აქვს თავისებური გონებრივი შემრიგებლური პერანგი“, – დასძინა მასკმა.
ნაბიჯი 4
დააჩქარეთ ციკლი
აქამდე ნელა მოძრაობდით, ამიტომ მომდევნო ნაბიჯია – დაჩქარება. მაგრამ ეს მხოლოდ მას შემდეგ უნდა გააკეთოთ, რაც დარწმუნდებით, რომ წინა ნაბიჯები წარმატებით გაიარეთ. „თუ საფლავს ითხრით, არ არის საჭირო ამის უფრო სწრაფად გაკეთება, უბრალოდ შეწყვიტეთ ეს საქმე“, – ამბობს მასკი იმ მეწარმეებზე, რომლებიც მოვლენებს უსწრებენ.
ნაბიჯი 5
გადადით ავტომატიზაციაზე
ეს ბოლო ნაბიჯია. მასკი იმასაც ამბობს, რომ არაერთხელ დაუშვია შეცდომა, დინების საპირისპიროდ წასულა. ანუ, იწყებდა ავტომატიზაციით, შემდეგ ციკლის დაჩქარებაზე გადადიოდა და ა.შ. ამის შემდეგ ყველაფრის თავიდან დაწყება უწევდა. „Tesla Model 3–ის შექმნისას ავტომატიზება მოვახდინე, დავაჩქარე, გავამარტივე და შემდეგ მოვაშორე“, – განმარტავს მასკი.