5 მარტს, შესაძლოა, ენგურჰესი გაჩერდეს, აფხაზეთს ჩაბნელება ემუქრება

5 მარტს, შესაძლოა, ენგურჰესი გაჩერდეს, აფხაზეთს ჩაბნელება ემუქრება

access_time2019-02-18 17:00:26

უნდა უყიდოს თუ არა ოფიციალურმა თბილისმა სეპარატისტებს ელექტროენერგია რუსეთიდან



5 მარტისთვის, შესაძლოა, ენგურჰესმა მუშაობა შეაჩეროს წყალსაცავზე წყლის დონის კრიტიკული ვარდნის გამო და ოკუპირებული აფხაზეთი უშუქოდ დარჩეს. ამიტომ თბილისი სოხუმის რეჟიმს მოუწოდებს, ან ელექტროენერგია დროებით რუსეთიდან შემოიტანოს, ან შეამციროს მოხმარება, რომელიც ბოლო წლებში 3-ჯერაა გაზრდილი და იმდენად უკონტროლოა, რომ აფხაზეთი, სადაც მხოლოდ 243 206 ადამიანი ცხოვრობს, ლამის იმდენივე ელექტროენერგიას ხარჯავს, რასაც 1.1-მილიონიანი თბილისი.



თბილისის განცხადებას გამოხმაურება მოჰყვა სოხუმში. აფხაზეთის ე.წ. სახელმწიფო კომპანია “ჩერნომორენერგოს” გენდირექტორმა ასლან ბასარიამ საგანგებო პრესკონფერენციაზე თქვა, რომ ელექტროენერგიის დეფიციტის საშიშროება არსებობს და “აფხაზეთის მთავრობას” იმედი აქვს, რომ დენის “გადმოქაჩვას” დროებით “სტრატეგიული პარტნიორი” რუსეთიდან შეძლებს, თუმცა რამდენად გამოვა ეს, ამაზე გადაჭრით პასუხი არა აქვს.


ბასარიამ ხაზი გაუსვა, რომ გადაწყვეტილების მიღება რამდენიმე დღეში უნდა მოხდეს.


“ამ ეტაპზე მთავრობა მუშაობს, რომ საკითხი გადაიჭრას რუსეთიდან ელექტროენერგიის გადმოქაჩვით. ეს არის მთავრობათაშორისი ურთიერთობა, რომლიც იმედს გვაძლევს, რომ საჭირო ელექტროენერგიას გაზაფხულზე რუსეთიდან მივიღებთ. გარდა ამისა, რა თქმა უნდა, აუცილებელია ენერგომოხმარების შემცირებაც,” – განაცხადა მან და დასძინა: “იმ შემთხვევაში, თუ შეთანხმება არ გამოვა, აუცილებელი გახდება გრაფიკის შემოღება.”


ენგურჰესის შესაძლო გაჩერებაზე განცხადებით გამოვიდა ენგურჰესის დირექტორთა საბჭოს თავმჯდომარე ლევან მებონია. მისი თქმით, თუ აფხაზეთში ელექტროენერგიის მოხმარების შეზღუდვის მხრივ გარკვეული ზომები არ გატარდა, 5 მარტისთვის ენგურჰესის წყალსაცავში წყალი აღარ იქნება და აფხაზეთი დენს ვერ მიიღებს.


“ამ დროისთვის ენგურჰესისა და ვარდნილჰესის მიერ გამომუშავებული ელექტროენერგია 100 პროცენტით აფხაზეთს მიეწოდება. აფხაზეთის მხარე ამასთან დაკავშირებით საქმის კურსშია და ველოდებით, რა გადაწყვეტილება იქნება მიღებული. ალბათ ორშაბათს გვეცოდინება, რა გადაწყვეტილებას მიიღებენ,” – აღნიშნა მებონიამ.


ელექტროენერგეტიკული ბაზრის ოპერატორის ოფიციალური ინფორმაციით, 2019 წლის იანვარში ენგურჰესმა და ვარდნილჰესმა 265,056 მილიონი კილოვატსაათი ელექტროენერგია გამოიმუშავეს, ოკუპირებული აფხაზეთის რეგიონმა კი 254,333 მილიონი კილოვატსაათი ელექტროენერგია გამოიყენა.



აფხაზეთს ენგურჰესიდან ელექტროენერგია მუდმივად უფასოდ მიეწოდება, ზაფხულში ენერგიის 40% და ზამთარში 100%. თუმცა ბოლო წლებში ოკუპირებულ ტერიტორიაზე დენის მოხმარება მნიშვნელოვნად გაზრდილია, ჰესის წყლის მოცულობა კი მათ გაზრდილ მოთხოვნებს ვერ სწვდება. ამიტომაც უკვე რამდენი წელია, აფხაზები თებერვალსა და მარტში ელექტროენერგიის გარეშე დარჩენის საფრთხის წინაშე დგებიან.


2017 წელს ოკუპირებულ ტერიტორიაზე გრაფიკიც კი ამოქმედდა და მოსახლეობას დღის განმავლობაში – 2 საათით, ხოლო ღამით 2-3 საათით ეთიშებოდა დენი. თებერვლის შუა რიცხვებიდან კი ენგურჰესი გაჩერდა და აფხაზეთს საერთოდ ჩაბნელება ემუქრებოდა, თუმცა მოსახლეობაც, სეპარატისტული ხელისუფლებაც და იქ განლაგებული რუსული არმიაც ჩაბნელებას ოფიციალურმა თბილისმა გადაარჩინა. ენერგეტიკის სამინისტრომ ოკუპირებული აფხაზეთისთვის ელექტროენერგია რუსეთიდან იყიდა და უსასყიდლოდ მიაწოდა.


ენერგეტიკის სამინისტროს ამ ნაბიჯს განსხვავებული შეფასებები მოჰყვა თბილისში. ნაწილი იწონებდა, ნაწილი – აკრიტიკებდა. კრიტიკის საგანი იყო ის, რომ დანარჩენი საქართველოს მოსახლეობის ხარჯზე ხდებოდა ოკუპირებული ტერიტორიის მომარაგება, მათ შორის რუსეთის ბაზებისა და მათი ოჯახებისა.


საგულისხმოა ისიც, რომ, მართალია, სოხუმის რეჟიმი თბილისს ერთ თეთრსაც არ უხდის მოხმარებულ ელექტროენერგიაში, თავად სოხუმის რეჟიმისთვისაც დიდი პრობლემაა მოხმარებული ელექტროენერგიის საფასურის ამოღება. მიუხედავად იმისა, რომ აფხაზეთში 1 კვ/სთ დენის ფასი მხოლოდ 0,40 რუბლია (2 თეთრი) მოსახლეობისთვის და 0,80 რუბლი ბიზნესისთვის, ითქვა, რომ მხოლოდ 35-40%-ის ამოღება ხდება და მხოლოდ გალის მოსახლეობაა კარგი გადამხდელი, რომელსაც ფიქსირებულ 400 რუბლს (15 ლარს) ახდევინებენ. დენის საფასურს იხდიან ე.წ. საჯარო დაწესებულებები, აფხაზები კი გადახდაზე უარს ამბობენ.


კონფლიქტოლოგების აზრით, მიიღებს თუ არა რუსეთიდან დენს აფხაზეთი, ეს იმაზეა დამოკიდებული, გადაუხდის თუ არა სოხუმის რეჟიმი ფულს, ან რაიმე ახალ ვალდებულებას იკისრებს თუ არა. აფხაზებს კი ყველაფერი მუქთად უნდათ, მათ მიაჩნიათ, რომ ქართველები ვალდებულნი არიან, დენი უფასოდ მიაწოდონ, რადგან ენგურჰესის სამართავი პულტი აფხაზეთშია, ისევე, როგორც რუსები არიან ვალდებულნი, აფხაზეთი შეინახონ, რადგან აფხაზებმა მიანიჭეს რუსებს სამხრეთ კავკასიაში გეოპოლიტიკური უპირატესობა.


“ექსპერტთა კლუბის” წევრ ირაკლი ცქიტიშვილის თქმით, “აფხაზეთში ელექტროენერგიის მოხმარება უკონტროლოა. ერთი, რომ ინფრასტრუქტურა მოუწესრიგებელია და დენის დანაკარგი დიდია; ასევე, რადგანაც აფხაზები დენის საფასურს არ იხდიან, მოსახლეობა მაქსიმალურად ხარჯავს დენს. თანაც ბოლო 3 წელია, კრიპტოვალუტის მაინინგისას ძალიან ბევრ ელექტროენერგიას მოიხმარენ. აფხაზები უნდა მიეჩვიონ, რომ უნდა აკონტროლონ ხარჯი და ხარჯვის ფული გადაიხადონ.”


მისი თვალსაზრისით, თბილისმა უნდა შეწყვიტოს ჰუმანიტარული ხელის გაწვდენა აფხაზეთისთვის და მათ ენგურჰესიდან ელექტროენერგიის მხოლოდ 40% უნდა მივცეთ, რაც თავიდან იყო შეთანხმებული, დამატებითი მოცულობის მიცემის შემთხვევაში კი ფულის გადახდა უნდა მოვთხოვოთ.


შერიგების ყოფილი მინისტრი პაატა ზაქარეიშვილი აცხადებს, რომ ენგურჰესის საკითხი წლიდან წლამდე რთულდება ელექტროენერგიის ხარჯვის ზრდის გამო, მაგრამ თუკი ენგურჰესი გაჩერდება, თბილისი ვალდებულია, დენი იყიდოს და აფხაზეთს მიაწოდოს.


“საქართველო ვალდებულია, თავისი ტერიტორიული მთლიანობის კონცეფციიდან გამომდინარე, შეასრულოს სახელმწიფოს ვალდებულებები. შესაბამისად, თუ აუცილებელი იქნება, უნდა მოხდეს ენერგიის შესყიდვა და ჩვენი მოსახლეობისთვის მიწოდება.


“ეს ჩვენი მოსახლეობაა. ყოველთვის უნდა ვუყიდოთ ელექტროენერგია, ვიდრე გვაქვს პრეტენზია, რომ აფხაზეთი საქართველოს სახელმწიფოს ნაწილია,” – ამბობს ზაქარეიშვილი.


მისივე თქმით, აფხაზეთში არის ხალხი, ვინც ამბობს, რომ სამარცხვინო სიტუაციაა, არასწორია ასე უაზროდ დენის ხარჯვა და ფულის გადაუხდელობა. ხოლო “დაბალი დონის ხალხს” მიაჩნია, რომ საქართველო ვალდებულია, უფასოდ მიაწოდოს დენი აფხაზეთს და აფხაზმა საფასური არ უნდა გადაიხადოს.


“აფხაზეთში არის ხალხი, ვინც ამბობს, რომ სამარცხვინო სიტუაციაა, რაც აფხაზეთში ხდება. ასე ფიქრობს გონიერი ადამიანების დიდი ნაწილი, ვისაც მიაჩნია, რომ არასწორია ასე უაზროდ დენის ხარჯვა და ფულის გადაუხდელობა. ასეთს ბევრს ვიცნობ. ეს ადამიანები ეკონომიკაში, ბიზნესსა და პოლიტიკაში არიან. გონიერი ადამიანი იხდის ფულს, მაგრამ ეს საკმარისი არ არის. ვინც არ იხდის, ის სხვანაირად ფიქრობს, ეს დაბალი დონის ხალხია. მე აფხაზეთში ვიცნობ თანამდებობის პირებს, ვისაც აწუხებს ეს საკითხი, მაგრამ არ ვიცი, ენერგეტიკის სამინისტროს გაუქმების შემდეგ ვინ მართავს აფხაზურ მხარესთან მოლაპარაკებას,” – აღნიშნა ზაქარეიშვილმა.



“რეზონანსი”



თეგები:
ენგურჰესი



ხელისუფლების არაპროფესიონალიზმი თუ მავნებლობა: სახელმწიფო საწარმოების ზარალმა ნახევარ მილიარდ ლარს გადააჭარბა

ხელისუფლების არაპროფესიონალიზმი თუ მავნებლობა: სახელმწიფო საწარმოების ზარალმა ნახევარ მილიარდ ლარს გადააჭარბა
access_time2019-03-19 13:00:33
„სახელმწიფო სახელმწიფოში“ - ასე შეიძლება აღვწეროთ მთავრობის ის ნაწილი, რომელიც ყველა სხვა შტოსთან შედარებით დღეს ყველაზე ნაკლები საკანონმდებლო და საპარლამენტო კონტროლის ქვეშ არის მოქცეული, საუბარია ასობით სახელმწიფო კომპანიაზე, რომელთა ბრუნვაც 2017 წლის მდგომარეობით 3 მილიარდ ლარზე მეტია, ხოლო მათში დასაქმებული ადამიანების მთლიანი რაოდენობა 61 ათასს აღემატება.”  Forbes Georgia-ს მთავარი რედაქტორი გიორგი ისაკაძე საავტორო...

„ქეი ბი ფი თბილისმა“ წყალტუბოში, სანატორიუმი „მეშახტეს“ გაიხსნის ვალდებულების გადავადება მოითხოვა - ქონების ეროვნული სააგენტოს განმარტება „კომერსანტს„

„ქეი ბი ფი თბილისმა“ წყალტუბოში, სანატორიუმი „მეშახტეს“  გაიხსნის ვალდებულების გადავადება მოითხოვა - ქონების ეროვნული სააგენტოს განმარტება „კომერსანტს„
access_time2019-03-19 12:00:48
წყალტუბოში, სანატორიუმი „მეშახტეს“ გახსნა  გადაიდო - ამის შესახებ „კომერსანტს“  სახელმწიფო ქონების ეროვნულ სააგენტოში განუცხადეს. მათი ინფორმაციით, პროექტის ინვესტორმა კომპანია შპს „ქეი ბი ფი თბილისმა“ 2018 წლის აგვისტოში განცხადებით მიმართა სააგენტოს, სადაც ითხოვდა 2015 წელს გაფორმებული ნასყიდობის ხელშეკრულებით გათვალისწინებული პირობის, კერძოდ კი, 5 ვარსკვლავიანი საერთაშორისო ბრენდის მქონე არანაკლებ 100 -ნომრიანი სასტუმროს 3 წლის ვადაში აშენების ვალდებულების, 2021 წლის...

არადეკლარირებული სიგარეტის შემოტანის ზრდის ტრენდი თამბაქოზე დაწესებული გაუაზრებელი გადასახადების შედეგია

არადეკლარირებული სიგარეტის შემოტანის ზრდის ტრენდი თამბაქოზე დაწესებული გაუაზრებელი გადასახადების შედეგია
access_time2019-03-19 10:00:33
2019 წელს მოსახლეობას ახალი საზრუნავი გაუჩნდა - ადამიანები ფიქრობენ როგორ ჩაანაცვლონ ძვირადღირებული სიგარეტი შედარებით იაფიანი ალტერნატივით. ახალი ფასები, რომელიც პირველ რიგში თამბაქოს მომხმარებლების ჯიბეზე აისახება, აქციზის მატებამ გამოიწვია. მმართველი გუნდის მტკიცებით, გადაწყვეტილება მოსახლეობის ჯანმრთელობაზე ზრუნვით არის განპირობებული.   ექსპერტთა ნაწილი აცხადებს, რომ თამბაქოს გაძვირება...

„თუ სებ-მა რეაგირება არ მოახდინა, ქვეყანა გადავა დაბალ ეკონომიკურ ზრდაზე„

„თუ სებ-მა რეაგირება არ მოახდინა, ქვეყანა გადავა დაბალ ეკონომიკურ ზრდაზე„
access_time2019-03-19 09:00:03
თუ ეროვნულმა ბანკმა შეინარჩუნა თავის სიმტკიცე და რეაგირება არ მოახდინა სარეგულაციო პაკეტის ნეგატიურ გავლენებზე, ქვეყნის ეკონომიკა გადავა ახალ სისტემაზე, რაც დაბალ ეკონომიკურ ზრდას გულისხმობს, — ამის შესახებ საბანკო პროდუქტების ექსპერტმა დავით კიკვიძემ განაცხადა.  “კომერსანტმა კიკვიძეს GBC-ის მიერ გავრცელებული ინფორმაციის შეფასება სთხოვა, რომლის თანახმად 2019 წლის თებერვალი ზარალით დაასრულა 15-დან 4-მა ბანკმა. როცა...

საქართველოს ეკონომიკა ჭაობშია - ჯაფარას ინტერვიუ „კომერსანტზე“

საქართველოს ეკონომიკა ჭაობშია - ჯაფარას ინტერვიუ „კომერსანტზე“
access_time2019-03-18 21:30:35
სალომე ლემონჯავას რუბრიკის „დე-მონტაჟი“ პირველი სტუმარი პოლიტიკური პარტია „გირჩის“ დამფუძნებელი ზურაბ ჯაფარიძეა. რუბრიკის პირველ შეკითხვაზე - როგორ მოგმართოთ ბატონო ზურაბ, ზურაბ-გირჩი თუ ჯაფარა, რესპოდენტმა არჩევანი ბოლო...


მსგავსი სიახლეები

up