მობილური ინტერნეტის ბაზარზე 2021 წლის იანვარში 4G-ის წილმა 88.4%-ს მიაღწია, 3G-ის წილი 11.5%-მდე შემცირდა, რაც შეეხება 2G-ს შეიძლება ითქვას, რომ ის პრაქტიკულად აღარც არსებობს მისი წილი მხოლოდ 0.1% შეადგენს. მართალია ძველ მობილურ ტელეფონს უფრო მეტი ადამიანი ფლობს, მაგრამ ისინი ინტერნეტით არ სარგებლობენ. ბოლო ერთი წლის განმავლობაში, გაორმაგდა მობილური ინტერნეტის მოხმარებაც.
4G მსოფლიოში პირველად 2009 წელს გაეშვა, საქართველოში კი 6 წლის დაგვიანებით გამოჩნდა. პირველი ლიცენზია მაგთიკომმა აიღო, რომელიც აბონენტთა რაოდენობით დღესაც ლიდერია. 2016 წელს 4G-ის წილი 38%-ს შეადგენდა, 2017 წელს უკვე დომინანტი გახდა 56%-ს მიაღწია, 2018 წელს მისი წილი 65%-მდე, 2019 წელს 77%-მდე გაიზარდა. 80%-იანი ზღვარი კი 2020 წელს გადაილახა.
საქართველოში 5G-ის მხარდაჭერის მქონე სმარტფონებს 2019 წლიდან მოიხმარენ, მაგრამ ჯერჯერობით ქსელი არ მუშაობს. გასული წლის აგვისტოში მაგთიკომმა სატესტო რეჟიმში 5G ინტერნეტი გაუშვა, თუმცა აღნიშნა, რომ უახლოესი 3 წლის მანძილზე ტექნოლოგია მომხმარებლისთვის ხელმწისაწვდომი არ იქნებოდა.
4G-ის წილის ზრდის პარალელურად ბოლო პერიოდში მკვეთრად გაიზარდა მოხმარების ტრაფიც, რასაც თავის მხრივ კარანტინმა და მობილურ ინტერნეტზე ფასების კლებამაც შეუწყო ხელი. კომუნიკაციების კომისიის ცნობით, 2021 წლის იანვარში 1 გიგაბაიტი მობილური ინტერნეტის ღირებულება 2020 წლის იანვართან შედარებით 47%-ით გაიაფდა და 79 თეთრი შეადგინა.
2021 წლის იანვარში მობილური ინტერნეტის მოხმარებამ 21.5 პეტაბაიტს (21 500 ტერბაიტს) მიაღწია, რაც გასული წლის ანალოგიური პერიოდის მაჩვენებელს 98%-ით აღემატება. თავის მხრივ 2020 წელს მობილური ინტერნეტის მოხმარებამ 190.3 პეტაბაიტი შეადგინა, რაც 2019 წლის მაჩვენებელს 117%-ით, 2018 წლის მაჩვენებელს კი 199%-ით, 2018-2019 წლების ჯამურ მაჩვენებელს კი 25%-ით აღემატება.
2021 წლის იანვრის მდგომარეობით მობილური ინტერნეტის ბაზრის 51.8%-ს მაგთიკომი აკონტოლებს, 28.5%-ს სილქნეტი (ჯეოსელი), დარჩენილ 19.7%-ს კი ბილაინი.
გიორგი ელიზბარაშვილი