თებერვალში საქართველოს 40 516 ვიზიტორი ეწვია, რაც გასული წლის ანალოგიურ პერიოდთან შედარებით 89.5%-ით ნაკლებია. იანვარში ვარდნა 93.7%-ს აჭარბებდა. ვარდნის ტემპის კლების მიზეზი თებერვალში აღდგენილი ფრენების ნაწილი არ გამხადარა, უბრალოდ, შარშან იანვარში ჯერ კიდევ 19.7%-იანი ზრდა ფიქსირდებოდა, თებერვალში კი შესადარებელი პერიოდი უკვე აღარ იყო სახარბიელო და ვიზიტორების რაოდენობა 2019 წლის თებერვალთან შედარებით 0.7%-ით იყო შემცირებული და რომ არა ნაკიანი წელი კლება 4%-ს გადააჭრბებდა.
ვიზიტის ტიპების მიხედვით ტურისტების რაოდენობა 35 869-ს შეადგენდა. კლება 86.1%. ერთდღიანი ვიზიტორების რაოდენობა 4647-ს, რაც 96.7%-იან ვარდნას ნიშნავს, კიდევ უფრო მეტად 98.1%-ით 1559-მდე შემცირდა სხვა არატურისტული ვიზიტების რაოდენობა. მთლიანად საერთაშორისო მოგზაურების რაოდენობამ კი 2020 წლის თებერვალთან შედარებით 91%-ით ნაკლები - 42 075 შეადგინა.
ვიზიტორთა რაოდენობით პირველ ადგილზე თურქეთია, საიდანაც თებერვალში საქართველოში 15 983 პირი შემოვიდა, ეს რიცხვი მეორე ადგილზე მყოფ სომხეთის მაჩვენებელს 176%-ით აღემატება. გასულ წელს სხვაობა მხოლოდ 11% იყო. რადგანაც ვიზიტორთა აბსოლუტური უმრავლესობა სატვირთო გადაზიდევებს უკავშირდება, თურქეთის ასეთი დაწინაურება უკვე ლოგიკურია. ტურისტად წოდებული პირების უდიდესი ნაწილიც საერთაშორისო განმარტების გამოა ტურისტი - საქართველოში 24 საათზე მეტ ხანს გაჩერდნენ, სინამდვილეში მათი ვიზიტის მიზანიც ტვირთებთან იყო დაკავშირებული.
ევროკავშირის ქვეყბებიდან ვიზიტორთა რაოდენობა 95%-ითაა შემცირებული, ყველაზე დაბალი 66%-იანი კლება ბულგარეთიდან ფიქსირდება, ყველაზე მაღალი - 99.5%-იანი პოლონეთიდან. ფორმალურად სრული 100%-იანი ვარდნაა მალტიდან, მაგრამ რაოდენობრივად ეს მხოლოდ 32 ვიზიტორია, პოლონეთიდან კი დანაკარგი 4000-ს აჭარბებს.
საზღვრის ტიპების მხრივ სახმელეთო მიმოსვლა 88%-ითაა შემცირებული, საჰაერო 94.7%-ით, საზღვაო - 90.7%-ით და სარკინიგზო - 90.5%-ით.
თბილისის აეროპორტის მეშვეობით თებერვალში საქართველოს საზღვარი 4822-მა ვიზიტორმა გადმოკვეთა, რაც 92.7%-იანი კლებაა, ქუთაისის აეროპორტით სულ 15-მა ადამიანმა ისარგებლა, ბათუმის აეროპორტით - 9 ადამიანმა. ორივე შემთხვევაში კლება 99.9%-ს შეადგენდა.
მარტში ვარდნის ტემპის მნიშვნელოვანი ვარდნაა მოსალოდნელი, აპრილში დიდი ალბათობით მცირე მატებაც დაფიქსირდება. მიზეზი ისევ და ისევ საბაზისო მონაცემებია. გასული წლის მარტში ვიზიტორების რაოდენობა 62.3%-ით, აპრილში კი 94.5%-ით შემცირდა.
ეროვნული ბანკის პროგნოზით, იმ შემთხვევაში ტუ ტურიზმი არ აღდგა, 2021 წელს ეკონომიკა მხოლოდ 1%-ით გაიზრდება, ასეთ შემთხვევაში 2019 წლის დონესთან დაწევა 2022 წელსაც გაჭირდება.
გიორგი ელიზბარაშვილი