2007 წლიდან დღემდე მთავრობისა და კერძო სექტორისთვის გაცემული ADB-ის ფინანსური დახმარება $4 მილიარდს შეადგენს. როგორც აზიის განვითარების ბანკის მიერ გავრცელებულ ინფორმაციაშია აღნიშნული, ბანკი (ADB) და საქართველო ქვეყნის ეკონომიკის ზრდისა და მოსახლეობის ცხოვრების გაუმჯობესებისთვის 15 წელია რაც თანამშრომლობენ. მთელი ამ პერიოდის განმავლობაში, ეკონომიკის აღდგენაში გაწეული დახმარების შემდეგ, ADB საქართველოს ინფრასტრუქტურის მშენებლობაში, მუნიციპალური და საგანმანათლებლო სერვისების განვითარებაში, ფინანსური ჩართულობისა და სოციალური დაცვის გაუმჯობესებასა და მეწარმეობის განვითარებაში დაეხმარა.

რეგიონების უკეთ დასაკავშირებლად და ეკონომიკური შესაძლებლობების ხელშესაწყობად აშენდა და განახლდა 180კმ-ზე მეტი სიგრძის გზები, გვირაბები და ხიდები.

განახლდა ოთხი  ქვესადგური მოსახლეობისთვის უწყვეტი ელექტროენერგიის უზრუნველსაყოფად.

დედაქალაქში გაფართოვდა და მოდერნიზდა მეტროს ქსელი, გაუმჯობესდა მისი მისაწვდომობა და უსაფრთხოება.

300,000-ზე მეტ ადამიანს რეგიონებში უკვე აქვს უწყვეტი წყალი და წყალარინება. მიმდინარეობს მუშაობა ამ სერვისების დამატებით 12 ქალაქში უზრუნველსაყოფად.

14 ქალაქსა და სოფელში  მიმდინარეობს ისტორიული ცენტრების რეაბილიტაცია და ახალი  მუნიციპალური და განათლების სერვისების შექმნა რეგიონებში ცხოვრების ხარისხის, სწავლისა და ეკონომიკური შესაძლებლობების გასაუმჯობესებლად.

ADB-ის ხელშეწყობით შეიქმნა ახალი საპენსიო სისტემა, დაფინანსდა კოვიდ-19-ის ვაქცინაცია, სამედიცინო მასალების შეძენა და გაიცა საბიუჯეტო დახმარება პანდემიის სოციალური და ეკონომიკური გავლენის შესარბილებლად.

„ADB-ის კერძო სექტორისადმი გაწეულმა დახმარებამ ხელი შეუწყო ბაზრის მთავარი მოთამაშეების საერთაშორისო კაპიტალის ბაზრებზე გასვლას, ხოლო კომერციულ ბანკებს მცირე და საშუალო მეწარმეების დაფინანსების საშუალება მისცა.

თანამშრომლობა გრძელდება საჯარო სექტორის რეფორმებისა და მმართველობის გასაძლიერებლად, პროფესიული განათლებისა და უნარების გადამზადების გზით განათლების სისტემის გასაუმჯობესებლად სოფლის მეურნების პროდუქტიულობისა და საკვების უწყვეტი მომარაგების გასაძლიერებლად, და ქვეყნის ტრანსპორტისა და ეკონომიკის  რეგიონულ ჰაბად გარდასაქმნელად“, — განმარტავენ აზიის განვითარების ბანკში.