დღეიდან, რუსეთში ერთთკვირიანი არასამუშაო პერიოდი დაიწყო. როგორც რუსეთის ფედერაციის პრეზიდენტმა ვლადიმერ პუტინმა განმარტა,  ჯანდაცვასთან დაკავშირებული სტრუქტურები მუშაობას ჩვეულებრივ აგრძელებენ, როგორებიცაა სამედიცინო დაწესებულებები, აფთიაქები, მაღაზიები, ასევე საბანკო სერვისცენტრები, ტრანსპორტი.

შესაბამისად, შეჩერდება საწარმოებისა და ქარხნების მუშაობაც. რა გავლენას მოახდენს ქართულ იმპორტზე რუსეთის ერთკვირიანი შესვენება და ხომ არ აისახება ეს იმ პროდუქციის მარაგებზე რომელიც ქართულ სადისტრიბუციო კომპანიებს რუსეთიდან შემოაქვთ? ამასთან დაკავშირებით „კომერსანტი“ სადისტრიბუციო კომპანია „შარმ ტრეიდინგის“ დირექტორს ვახტანგ საძაგლიშვილს ესაუბრა, რომელიც აცხადებს, რომ იმპორტიორი კომპანიები, რომლებიც რუსეთიდან არა რუსული პროდუქციის, არამედ რუსეთში წარმოებული საერთაშორისო პროდუქციის იმპორტს ახორციელებენ, დეფიციტის საფრთხის წინაშე არ დადგებიან, რადგან მეზობელ ქვეყანაში საერთაშორისო საწარმოებს ფუნქციონირება არ შეუჩერებიათ.

 „პროდუქციის დეფიციტი არ შეგვექმნება ორი მიზეზის გამო - პირველი ის არის, რომ ჩვენი კომპანია ინარჩუნებს ორთვიან მარაგს ჩვეულებრივ სიტუაციაში და როცა გართულდა სიტუაცია და შეიძლებოდა შექმნილიყო დეფიციტი, მარაგის მოცულობა გავზარდეთ.  შესაბამისად, 3 თვეც რომ გაჩერდნენ საწარმოები, მაინც პრობლემა არ შეგვექმნება.  მეორე მიზეზია ის, რომ რუსეთის პრეზიდენტის განკარგულება ვრცელდება რუსულ კომპანიებზე, რაც იმას ნიშნავს, რომ არცერთ სართაშორისო კომპანიას წარმოება არ შეუწყვეტია რუსეთში.  ჩვენ არ ვართ რუსული პროდუქციის დისტრიბუტორები, ჩვენ ვართ იმპორტიორები საერთშოროსო კომპანიების, რომელთაც საწარმო აქვთ რუსეთში და წარმოება არ გაჩერებულა.“ - აღნიშნა ვახტანგ საძაგლიშვილმა.

შეგახსენებთ, რომ რუსეთში კორონავირუსის გავრცელების პრევენციის მიზნით შესვენება  28 მარტიდან 5 აპრილამდე გაგრძელდება, ხოლო მცირე და საშუალო ბიზნესს გადასახადები 6 თვით გადაუვადდებათ.

მარიამ მორგოშია